មើលឱ្យហើយទៅក្រុមជំនាញឆបោកនិងលូកហោប៉ៅ
- បន្ទាយមានជ័យ
ខេត្តបន្ទាយមានជ័យ ៖ យោងពាក្យបណ្តឹងរបស់ជនរងគ្រោះឈ្មោះ រិទ្ធ សំណាង ភេទស្រី អាយុ៣៧ឆ្នាំ មានទីលំនៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត…
ខេត្តបន្ទាយមានជ័យ ៖ យោងពាក្យបណ្តឹងរបស់ជនរងគ្រោះឈ្មោះ រិទ្ធ សំណាង ភេទស្រី អាយុ៣៧ឆ្នាំ មានទីលំនៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ពីបទ លួច ប្រព្រឹត្តនៅវេលាម៉ោង១០និង០០នាទី នៅថ្ងៃទី១៥ កុម្ភៈ នៅចំណុចបរិវេណកាស៊ីណូស្តាប៉ារ៉ាម៉ិច ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
លោកវេសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឱ្យដឹងថា ក្រោយទទួលបានពាក្យបណ្តឹងនៅថ្ងៃទី១៥ កុម្ភៈ លោកបានចាត់តាំងកម្លាំងចុះធ្វើការស្រាវជ្រាវរកមុខសញ្ញា និងបានធ្វើការឃាត់ខ្លួនជនសង្ស័យចំនួនម្នាក់ឈ្មោះ ឆាន់ សាញ់ ភេទស្រី អាយុ២៣ឆ្នាំ មានទីលំនៅភូមិត្រាចជ្រុំ ឃុំសំព្រោច ស្រុកស្ទោង ខេត្តកំពង់ធំ បច្ចុប្បន្នស្នាក់នៅបណ្តោះអាសន្នក្នុងផ្ទះជួលមួយកន្លែង ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
លោកវេសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានបញ្ជាក់បន្ថែមថា ក្រោយធ្វើការឃាត់ខ្លួន និងសួរនាំពីអង្គហេតុជនសង្ស័យបានសារភាពថា ខ្លួនពិតជាបានប្រព្រឹត្តអំពើលូកហោប៉ៅ និងបន្លំយកគ្រឿងអលង្ការក្លែងក្លាយដើម្បីបោកបញ្ឆោតទៅប្តូរ យកគ្រឿងអលង្ការពិតពីជនរងគ្រោះដោយសកម្មភាពទាំងនេះគឺបានប្រព្រឹត្តជាច្រើនលើកមកហើយតាំងពីនៅខេត្តកំពង់ធំមកម្ល៉េះ ដោយការធ្វើសកម្មភាពទាំងនេះគឺមានបក្សពួកជាច្រើននាក់ពេលចេញធ្វើសកម្មភាពម្តងៗ ។ ដោយយោងលើចម្លើយសារភាពរបស់ជនសង្ស័យ នៅថ្ងៃទី១៦ ខែកុម្ភៈ ឆ្នាំ២០១៨ កម្លាំងមូលដ្ឋានកងរាជអាវុធហត្ថក្រុងប៉ោយប៉ែតបានបន្តចុះធ្វើការស្រាវជ្រាវ និងបានធ្វើការឃាត់ខ្លួនបក្សពួកជនសង្ស័យបន្តបន្ទាប់ទៀតបានចំនួន០៨នាក់ទៀត ។
លោកវេសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានបញ្ជាក់បន្ថែមថា ៖ ក្រោយធ្វើការសាកសួរ និងស្តាប់ចម្លើយសារភាពរបស់ជនសង្ស័យទាំង៩នាក់ខាងលើ លោកបានកសាងសំណុំរឿងបញ្ជូនជនសង្ស័យទាំង៩នាក់ទៅទីបញ្ជការកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ៕
ចែករំលែកព័តមាននេះ