ខេត្តឧត្តរមានជ័យ ៖ លំនៅឋាន១ខ្នងដែលមានទំហំ៧គុណ៩ម៉ែត្រសាងសង់អំពីឈើត្រូវបានអគ្គីភ័យឆាបឆេះហ្មត់កាលពីវេលាម៉ោង១១និង១០នាទីយប់ ថ្ងៃទី១៧ កុម្ភៈ បានបង្កការភ្ញាក់ផ្អើល ។ ហេតុការណ៍នេះកើតឡើងនៅក្នុងអូររុំដេង ឃុំត្រពាំងប្រាសាទ ស្រុកត្រពាំងប្រាសាទខេត្តឧត្តរមានជ័យ ខណៈម្ចាស់ជាប់រវល់មិននៅផ្ទះ ។
ក្នុងហេតុការណ៍គ្រោះដោយអគ្គីភ័យឆាបឆេះផ្ទះនេះ យោងតាមការរៀបរាប់ពីម្ចាស់ផ្ទះឈ្មោះ ឈាង ផាច ភេទប្រុសអាយុ៤៨ឆ្នាំ មុខងាជាអនុប្រធានភូមិអូររុំដេងបានឱ្យដឹងថា មុនពេលកើតហេតុនៅភូមិស្រែកណ្តាល ឃុំត្រពាំងប្រាសាទមានរៀបចំកម្មវិធីបុណ្យបញ្ចុះខ័ណ្ឌសីម៉ានៅវត្តស្រែកណ្តាល ខណៈនោះក្រុមគ្រួសារគាត់បាននាំគ្នាទៅទាំងអស់ដោយដុតភ្លើងទៀនទុក្ខចោល ។ ម្ចាស់ផ្ទះដដែលបានបញ្ចាក់ថា ទំហំនៃការខូចខាតម៉ូតូចំនួន២គ្រឿង សាឡុង១ឈុត និងទ្រព្យសម្បត្តិនៅក្នុងផ្ទះមួយចំនួនធំផ្សេងៗទៀតត្រូវបានឆេះទាំងស្រុង ។
ប៉ូលិសស្រុកត្រពាំងប្រាសាទបានឱ្យដឹងថា នៅក្នុងហេតុការគ្រោះដោយអគ្គីភ័យនេះកងកំលាំងប៉ូលិស កំលាំងពលរដ្ឋអ្នកភូមិមួយចំនួនរួមទាំងរថយន្តពន្លត់អគ្គីភ័យ១គ្រឿងបានជួយអន្តរាគមន៍ពន្លត់ដែរតែមិនអាចជួយពន្លត់បានខណៈភ្លើងឆាបឆេះយ៉ាងសន្ធោសន្ធៅក្នុងរយៈពេលលឿនបំផុតតែមិនមានការប៉ះពាលដល់អាយុជីវិតមនុស្សនោះទេ ៕
ចែករំលែកព័តមាននេះ