ខេត្តកំពង់ឆ្នាំង ៖ ល្បែងស៊ីសង ភ្នាល់ចាក់មាន់ជល់តាមកញ្ចក់ទូរទស្សន៍កើតមានពេញបន្ទុក នៅក្រោយប៉ុស្តិ៍ នគរបាលរដ្ឋបាលសង្កាត់ប្អេរ ក្នុងកំពង់ឆ្នាំង ហើយក៏មិនឆ្ងាយពីមុខសាលាខេត្តកំពង់ឆ្នាំង ប៉ុន្មានដែរ ដែលបានធ្វើឲ្យប្រជាពលរដ្ឋមានការរិះគន់អាជ្ញាធរ មូលដ្ឋានថា បណ្តោយឲ្យក្រុមអ្នកញៀនល្បែងផ្កាប់មុខ ទាំងនោះហ៊ោកញ្ជ្រៀវជារៀងរាល់ថ្ងៃ រំខានដល់ការរស់នៅរបស់ប្រជាពលរដ្ឋ អ្នកជិតខាង និងបង្កការកកស្ទះចរាចរណ៍ តាមដងផ្លូវសាធារណៈ ទៀតផង។ កាលពីថ្ងៃសៅរ៍ ចុងសប្តាហ៍នេះ គេឃើញមានក្រុមអ្នកសារព័ត៌មានមួយក្រុមបានទៅថតផ្តិត យករូបភាពដែលក្រុមអ្នកញៀន និងល្បែងទាំងនោះកំពុងចាក់ភ្នាល់គ្នាហ៊ោកញ្ជ្រៀវ ក្នុងហាងកាហ្វេ ដែលនៅខាងក្រោយប៉ុស្តិ៍នគរបាលសង្កាត់ប្អេរ នោះបន្ទាប់មកក្រុមអ្នកសារព័ត៌មានបានទូរសព្ទ័ទៅលោក ឡុច វណ្ណារ៉ា ស្នងការនគរបាលខេត្ត រាយការណ៍ពីសកម្មភាពល្បែងស៊ីសង នៅចំណុចខាង ត្រូវបានស្នងការប្រាប់ថា ឲ្យទៅសួរលោក អធិការនគរបាលក្រុងទៅ។
បន្តិចក្រោយមកគេឃើញកម្លាំងនគរបាលក្រុង២នាក់ បានមកដល់ និងបានហៅម្ចាស់ហាងកាហ្វេ មានល្បែងស៊ីសងមកធ្វើកិច្ចសន្យានៅប៉ុស្តិ៍ប្អេរ ក្នុងថ្ងៃនោះដែរ។ ប៉ុន្តែនៅរសៀលថ្ងៃទី១៨ ខែកុម្ភៈ នេះ ល្បែងស៊ីសងភ្នាល់មាន់ខាងលើ នៅតែបន្តលេងយ៉ាងគគ្រឹកគគ្រេង ហាក់ផ្គើននឹងសមត្ថកិច្ចនគរបាល ដែលបានហៅមកធ្វើកិច្ចសន្យា កាលពីថ្ងៃសៅរ៍។ ជាមួយគ្នានេះដែរ នៅរសៀលថ្ងៃអាទិត្យទី១៨ កុម្ភៈនេះ មានប្រជាពលរដ្ឋ បានទូរសព្ទ័មកប្រាប់ភ្នាក់ងារយើងជាបន្តបន្ទាប់ដោយពួកគាត់ប្រាប់ថា ល្បែងស៊ីសង នៅក្រោយប៉ុស្តិ៍នគរបាល សង្កាត់ប្អេរ នៅតែរំខានការរស់នៅរបស់ពួកគាត់ដេកពួនមិនបាន ជាង៥ឆ្នាំហើយ ចាប់ពីម៉ោង១២ ថ្ងៃត្រង់ទៅ គឺអ្នកលេងល្បែងស៊ីសងទាំងនោះបានហោរ កញ្ជ្រៀវដេកថ្ងៃមិនបាន។
ម្យ៉ាងវិញទៀត បានបង្កការស្ទះចរាចណ៍ដល់អ្នកធ្វើដំណើរចូលទៅផ្ទះ ពួកគាត់ទៀតផង ពួកគាត់បានសំណូមពរឲ្យជួយអន្តរាគមន៍ ដោះស្រាយបញ្ហានេះឲ្យពួកគាត់ផង។ សូមបញ្ជាក់ថា ផ្ទះលក់កាហ្វេ មានល្បែងស៊ីសងខាងលើ នៅចម្ងាយប្រហែល១០ម៉ែត្រពីប៉ុស្តិ៍នគរ បាលសង្កាត់ប្អេរ និងមានចម្ងាយប្រមាណ៥០០-៦០០ម៉ែត្រពីមុខសាលាខេត្តកំពង់ឆ្នាំង បានកើតមានយូហើយ ដោយកាលមុនមានការចាក់ប្រដាល់ តែសព្វថ្ងៃចាក់មាន់ជល់ តាមកញ្ចក់ទូរទស្សន៍ កើតពេញបន្ទុក។ សមត្ថកិច្ចនគរបាលប៉ុស្តិ៍បានហៅអប់រំជាច្រើនលើកមកហើយ តាមបណ្តឹងរបស់អ្នកជិតខាង តែហាក់គ្មានប្រសិទ្ធភាពសោះ។ ហេតុនេះទើបប្រជាពលរដ្ឋ រាយការណ៍មកអ្នកកាសែតម្តង ដើម្បីឲ្យចុះផ្សាយដឹងដល់ចៅហ្វាយខេត្ត សូមមេត្តាជួយប្រជាពលរដ្ឋផង បើអភិបាលខេត្តបិទល្បែងស៊ីសងខាងលើនេះបាន ប្រជាពលរដ្ឋនឹងគាំទ្រ១០០ភាគរយ តែបើផ្សាយប៉ុណ្ណឹងហើយ នៅតែមានល្បែងស៊ីសងនេះទៀត មិនបាច់ប្រឹងអួតពីគោលនយោបាយ ភូមិឃុំសវត្ថិភាពស្អីនោះទៀតទេដាក់លេខសូន្យបណ្ដោយ៕
ចែករំលែកព័តមាននេះ