ខេត្តបន្ទាយមានជ័យ ៖ បញ្ជូនជនសង្ស័យជួញដូរប្រើប្រាស់គ្រឿងញៀនចំនួន៦នាក់ទៅសាលាដំបូងខេត្តនៅវេលាម៉ោង ០៦និង០០នាទីយប់ ថ្ងៃទី១៦ ខែកុម្ភៈ ឆ្នាំ២០១៨ នៅចំណុចទំនប់ទឹកអូរខៃដន ស្ថិតនៅភូមិកូនដំរី សង្កាត់និមិត្ត ក្រុងប៉ោយប៉ែត កម្លាំងមូលដ្ឋានកងរាជអាវុធហត្ថក្រុងប៉ោយប៉ែតដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុង បានចុះប្រតិបត្តិការបង្ក្រាបករណីបទល្មើសជួញដូរ និងប្រើប្រាស់នូវសារធាតុញៀនខុសច្បាប់ ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានបញ្ជាក់ថា ដោយទទួលបានព័ត៌មានពីករណីជួញដូរ និងប្រើប្រាស់សារធាតុញៀនខុសច្បាប់ លោកបានដឹកនាំកម្លាំងចុះប្រតិបត្តិការភ្លាមៗ និងឃាត់ខ្លួនជនសង្ស័យបានចំនួន០៦នាក់ ។ ក្រោយធ្វើការសាកសួរលោកបានកសាងសំណុំរឿងបញ្ជូនជនសង្ស័យ និងវត្ថុតាង មកទីបញ្ជាការកងរាជអាវុធហត្ថខេត្ត ដើម្បីចាត់ការបន្តតាមនីតិវិធី ។
លោកវរសេនីយ៍ឯក ស ប៊ុនសឿង មេបញ្ជាការរងទទួលការងារប្រយុទ្ធប្រឆាំងគ្រឿងញៀនបានបញ្ជាក់បន្ថែមថា ក្រោយពីការសាកសួររបស់កម្លាំងជំនាញការធ្វើតេស្តទឹកនោម ដើម្បីរកនូវសារធាតុញៀនក្នុងនោះបានបញ្ជាក់ឱ្យឃើញថា ជនសង្ស័យទាំង០៦នាក់គឺមានសារធាតុញៀនពិតប្រាកដមែន បច្ចុប្បន្នបានកសាងសំណុំរឿងបញ្ជូនជនសង្ស័យទាំង៦នាក់ និងវត្ថុតាងទៅតុលាការដើម្បីចាត់ការតាមនីតិវិធីតាមច្បាប់ហើយដែរ ៕
ចែករំលែកព័តមាននេះ