រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា មុននេះបន្តិច មានបុរសម្នាក់ត្រូវបានប្រជាពលរដ្ឋ រួមទាំងរថយន្តអ្នកធ្វើដំណើរនាំគ្នាដេញតាមបុក បន្ទាប់ពីបុរសរូបនេះបានអារ.កសម្លាប់ស្ត្រីជាសង្សារបស់ខ្លួន ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៥ល្ងាច ថ្ងៃទី18 ខែកុម្ភៈ ឆ្នាំ2018 នៅមុខសណ្ឋាគារបាលី ស្ថិតក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ ។
សេចក្តីរាយការណ៍បន្តទៀតថា បុរសខាងលើឈ្មោះ ភាព ម៉ក អាយុ២៤ឆ្នាំ មុខរបរជាកម្មករសំណង់ មានទីលំនៅឋានស្ថិតនៅភូមិ-ឃុំកើតហេតុខាងលើ ចំណែកស្ត្រីរងគ្រោះឈ្មោះ ខាត់ សុដា អាយុ២៨ឆ្នាំ មុខរបរជាកម្មករសំណង់តង់ហ្វាន ស្នាក់នៅក្នុងសង្កាត់អូរបែកក្អម ក្បែរកន្លែងកើតហេតុខាងលើ ព្រោះស្ត្រីរងគ្រោះត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈ ។
ប្រភពពីកើតហេតុបានឱ្យដឹងថា មុនពេលកើតហេតុ គឺនារីរងគ្រោះកំពុងផឹកស៊ីច្រៀងជាមួយមិត្តភក្តិនៅកន្លែងកើតហេតុ ស្រាប់តែជនដៃដល់ដែលជាសង្សារស្រឡាញ់គ្នានោះ មកចាប់អារ.កសម្លាប់តែម្តង ។
បើតាមប្រភពពីបុរសជនដៃដល់បានប្រាប់សមត្ថកិច្ចឱ្យដឹងថា មូលហេតុដែលបណ្តាលឱ្យរូបគេចាក់សម្លាប់ស្រីស្នេហ៍របស់ខ្លួន គឺមកពីខឹងស្រីស្នេហ៍រូបនោះ ។
បើតាមសម្តីរបស់នារីរងគ្រោះបានឱ្យដឹងថា នាងមិនបានស្រឡាញ់ជនដៃដល់នោះទេ គឺបុរសរូបនេះតាមស្រឡាញ់សុំស្នេហ៍នាង តែនាងមិនព្រម ហើយនៅថ្ងៃកើតហេតុ ខណៈនាងកំពុងផឹកស៊ីជាមួយមាមីនៅសំយ៉ាបផ្ទះក្រៅផ្ទះ ស្រាប់តែជនដៃដល់យកកាំបិតមកចាប់នាងបោកសក់ រួចអារ.កតែម្តង ។
ក្រោយពេលកើតហេតុ កងកម្លាំងសមត្ថកិច្ចខណ្ឌទួលគោក និងខណ្ឌសែនសុខ ទាំង២បានដណ្តើមគ្នាដើម្បីយកជនង្ស័យ ប៉ុន្តែចុងក្រោយត្រូវកងកម្លាំងរាជអាវុធខណ្ឌសែនសុខ នាំយកជនសង្ស័យទៅបាត់ ហើយប៉ូលិសរួមទាំងកងរាជអាវុធហត្ថនាំគ្នាដណ្តើមយកជនសង្ស័យបង្កមានការភ្ញាក់ផ្អើលពេញផ្លូវសាធារណៈមុខសណ្ឋាគារបាលី ។
ចែករំលែកព័តមាននេះ