សហរដ្ឋអាមេរិក ៖ ពេលមានការបាញ់ប្រហារនាងពួនក្នុងថ្នាក់រៀនក្រោយទ្វារ នាង LORENA SANABRIA ដែលរួចនៅរស់រានមានជីវិតពីការបាញ់សម្លាប់រង្គាលនៅរដ្ឋផ្លរីដាបានចេញមុខចូលរួមតស៊ូ ដើម្បីឱ្យការលក់អាវុធទីបំផុតត្រូវមានការត្រួតពិនិត្យឱ្យបានម៉ត់ចត់នៅសហរដ្ឋអាមេរិក ។
សិស្សស្រីអាយុ១៦ឆ្នាំរូបនេះដែលស្រក់ទឹកភ្នែកក្នុងបទសម្ភាសន៍មួយជាមួយ AFP អះអាងថា ពេលនេះជាងពេលណាៗទាំងអស់ យើងក្នុងឋានៈជាសិស្សសាលាត្រូវតែបញ្ចេញសំឡេងរបស់យើងនិយាយនៅមុខកាមេរ៉ា ដើម្បីផ្ញើសារដោយផ្ទាល់ដល់រដ្ឋាភិបាល ហើយទទូចឱ្យរដ្ឋាភិបាលផ្លាស់ប្តូរច្បាប់នានាស្តីពីអាវុធ ។ យើងពុំអាចអនុញ្ញាតឱ្យបណ្តាមនុស្សមានបញ្ហាបញ្ចេញកំហឹងរបស់ពួកគេ ដោយសម្លាប់អ្នកដទៃៗឡើយ ។
ក្រោយការសម្លាប់មនុស្សដល់ទៅ១៧នាក់ ក្នុងវិទ្យាល័យមួយនៅក្រុង PARKLAND បណ្តាអ្នកនៅរស់រានមានជីវិតបាននាំគ្នាធ្វើបាតុកម្មប្រឆាំងអាវុធដូចនាង LORENA ទោះជានៅក្មេងចេញមុខប្រឆាំងអាវុធនៅតាមសារព័ត៌មាន ដោយបរិហារពីទំនាក់ទំនងរវាងគណបក្សសាធារណរដ្ឋ និងក្រុម LOBBY អាវុធ NATIONAL RIFLE ASSOCIATION (NRA) ។
គាំទ្រដោយ NRA ពេលធ្វើយុទ្ធនាការឃោសនាបោះឆ្នោតប្រធានាធិបតីលោកដូណាល់ ត្រាំ ពុំបានលើកពីបញ្ហាអាវុធឡើយក្នុងសង្កថារបស់លោកក្រោយការបាញ់ប្រហារដោយលើកតែពីបញ្ហាសរសៃប្រសាទរបស់ខ្មាន់កាំភ្លើង ។
នាង LORENA SANABRIA និយាយថា មែនហើយក្នុងរដ្ឋធម្មនុញ្ញ គេមានសិទ្ធិទិញកាំភ្លើងប្រើដើម្បីការពារខ្លួន ។ ក៏ប៉ុន្តែសិទ្ធិបែបនេះពុំមែនជាការការពារខ្លួនឡើយ ។ គេបាញ់សម្លាប់បណ្តាជនស្លូតត្រង់ ៕
ចែករំលែកព័តមាននេះ