ប្រទេសអេត្យូពី ៖ អាជ្ញាធរក្រុងអាឌីសអាបេបាអះអាងកាលពីថ្ងៃទី១៧ កុម្ភៈ ថា ការប្រកាសអាសន្ននៅអេត្យូពីត្រូវបានបង្កើតឡើងរយៈពេល៦ខែ ។
ប្រទេសអេត្យូពី បានចេញការប្រកាសអាសន្នកាលពីថ្ងៃទី១៦ កុម្ភៈ ក្រោយការសុំលាលែងរបស់នាយករដ្ឋមន្ត្រីលោក HAILEMARIAM DESALEGN ខណៈប្រទេសជួបវិបត្តិនយោបាយ និងអំពើហិង្សា៣ឆ្នាំមកហើយ ដែលបណ្តាលឱ្យមនុស្សស្លាប់ជាច្រើនរយនាក់នៅទូទាំងប្រទេស ។
រដ្ឋមន្ត្រីការពារប្រទេសអេត្យូពី លោក SIRAJ FEGESSA ថ្លែងទៅកាន់ក្រុមអ្នកកាសែតកាលពីថ្ងៃទី១៧ កុម្ភៈ ថា នៅមានតំបន់មួយចំនួនដែលអាចផ្ទុះអំពើហិង្សា ។
យោងតាមការប្រកាសអាសន្នរាល់បាតុកម្មត្រូវហាមឃាត់ ក៏ដូចជារាល់ការផ្សព្វផ្សាយដែលសាបព្រោះការបំបែកបំបាក់ ។ រដ្ឋមន្ត្រីការពារប្រទេសថ្លែងថា រដ្ឋាភិបាលបានចាត់រួចហើយ វិធានការនានាដើម្បីកាត់បន្ថយអំពើហិង្សា ក៏ប៉ុន្តែការបាត់បង់ជីវិតមនុស្សនៅបន្ត មនុស្សច្រើននាក់នៅតែរត់ភៀសខ្លួន ព្រមទាំងបណ្តាហេដ្ឋារចនាសម្ព័ន្ធរងការបំផ្លាញ ។ លោកសន្យាប្រកាសពីការផ្តួចផ្តើមគំនិតថ្មីៗទៀត ។
តាមរយៈស្ថានទូតខ្លួនប្រចាំក្រុងអាឌីសអាបេបាសហរដ្ឋអាមេរិកថ្លែងនាថ្ងៃទី១៧ កុម្ភៈ ជំទាស់ទាំងស្រុងការបង្កើតការប្រកាសអាសន្ន ។ ក្នុងសេចក្តីប្រកាសមួយស្ថានទូតនេះនិយាយថា យើងជំទាស់ទាំងស្រុងជាមួយការសម្រេចរបស់រដ្ឋាភិបាលអេត្យូពីបង្កើតការប្រកាសអាសន្នដែលគ្រោងរឹតត្បិតសិទ្ធិមួយចំនួនក៏ដូចជាសេរីភាពនៃការដើរហើរ និងការសម្តែងមតិ ៕
ចែករំលែកព័តមាននេះ