ប្រទេសម៉ិចស៊ិក ៖ អាជ្ញាធរម៉ិចស៊ិករាយការណ៍កាលពីថ្ងៃទី១៧ កុម្ភៈ ថា មនុស្ស១៣នាក់ស្លាប់ក្នុងគ្រោះថ្នាក់ធ្លាក់ឧទ្ធម្ភាគចក្រ១គ្រឿងរបស់រដ្ឋមន្ត្រីមហាផ្ទៃម៉ិចស៊ិក លោក ALFONSO NAVARRETE តែលោកនៅរស់រានមានជីវិត ។ រដ្ឋមន្ត្រីរូបនេះជិះឧទ្ធម្ភាគចក្រទៅកាន់តំបន់ដែលរងការប៉ះពាល់ដោយការរញ្ជួយដីមួយកាលពីថ្ងៃទី១៦ កុម្ភៈ ។
យោងតាមអាជ្ញាធររដ្ឋ OAXACA ភាគខាងត្បូងប្រទេសជាកន្លែងកើតមានគ្រោះថ្នាក់កាលពីល្ងាចថ្ងៃទី១៦ កុម្ភៈ ថា យើងបានប្រមូលសាកសពមនុស្ស១២នាក់នៅនឹងកន្លែងដោយក្នុងចំណោមជនរងគ្រោះទាំងនេះមាននារី៥នាក់ បុរស៤នាក់ ក្មេងស្រី២នាក់ និងក្មេងប្រុសម្នាក់ ។ ចំណែកមនុស្សម្នាក់ទៀតស្លាប់នៅមន្ទីរពេទ្យក្រុង JAMILTEPEC រួចមនុស្ស១៥នាក់រងរបួស ។
រដ្ឋមន្ត្រីរូបនេះធ្វើដំណើររួមគ្នាជាមួយលោក ALEJANDRO MURAT អភិបាលរដ្ឋ OAXACA ដែលក៏នៅរស់រានមានជីវិតដែរ ព្រមទាំងមន្ត្រីច្រើននាក់ទៀតទៅកាន់ទីក្រុង PINOTEPA DESAN LUIS ស្ថិតនៅចម្ងាយប្រមាណជា៦០០គីឡូម៉ែត្រ ខាងត្បូងទីក្រុងម៉ិចស៊ីកូ ដែលប៉ុន្មានម៉ោងមុននេះរងការប៉ះពាល់ដោយការរញ្ជួយដីខ្លាំងមួយ ។
ប្រធានាធិបតីម៉ិចស៊ិក លោក ENRIQUE PENA NIETO សរសេរតាម TWITTER ថា រដ្ឋមន្ត្រីលោក NAVERRETE និងអភិបាលរដ្ឋលោក ALEJANDRO MURAT ព្រមទាំងក្រុមយានិកនៅរស់រានមានជីវិតទាំងអស់គ្នា ។ ក៏ប៉ុន្តែគួរឱ្យសោកស្តាយមនុស្សច្រើននាក់នៅលើដីបានត្រូវស្លាប់ ហើយមួយចំនួនទៀតរងរបួស ។ លោកបានសម្តែងការចូលរួមមរណទុក្ខចំពោះគ្រួសារជនរងគ្រោះ ។
លោក ALFONSO NAVARRETE ថ្លែងតាមទូរទស្សន៍ TELEVISA ថា អ្នកបើកឧទ្ធម្ភាគចក្រយោធាបានបាត់បង់ការត្រួតត្រាពេលឧទ្ធម្ភាគចក្រនេះហោះកម្ពស់ត្រឹម៤០ម៉ែត្រពីលើដី ។ បណ្តារូបភាពបង្ហាញឧទ្ធម្ភាគចក្រយោធាមួយផ្អៀងមកម្ខាងពេលធ្លាក់ចំពីលើរថយន្តកាំមីញ៉ុងធុនតូចមួយគ្រឿង ។ បណ្តាកៅអីហាក់ដូចជាដាច់ធ្លាក់នៅក្បែរៗ ។
រដ្ឋមន្ត្រីមហាផ្ទៃ និងបណ្តាអ្នកអមដំណើរធ្វើដំណើរឆ្ពោះទៅកាន់តំបន់មានការរញ្ជួយដីខ្លាំងមួយកម្លាំង៧,២រីស្ទ័រ ដែលកើតមាននៅរដ្ឋ OAXACA ញ័ររង្គើដល់រដ្ឋធានី ។ ការរញ្ជួយដីនេះពុំបណ្តាលឱ្យមានជនរងគ្រោះ ឬការខូចខាតធ្ងន់ធ្ងរនានាឡើយ ។ នេះបើតាមព័ត៌មានដំបូងៗផ្តល់ឱ្យដោយអាជ្ញាធរ ៕
ចែករំលែកព័តមាននេះ