រាជធានីភ្នំពេញ ៖ ក្នុងពេលមានឈ្មោះបោះសំឡេងក្នុងពិភពសិល្បៈ តារាមួយចំនួនបានបង្កើតមុខរបរក្រៅអាជីពសិល្បៈថែមទៀត។ ការប្រកបមុខរបរទាំងនោះ ខ្លះបានតែមួយរយៈពេលខ្លីខាតចុងខាតដើមបិទទៅវិញ ។
អ្នកនាងស៊ឹម សូលិកា ៖ ធ្លាប់បើកហាងរក្សាសម្រស់កាលពី៤ទៅ៥ឆ្នាំមុននៅម្តុំបឹងសាឡាង។ ហាងនោះបិទវិញបន្ទាប់ពីនាងមិនមានពេលវេលាគ្រប់គ្រាន់ជាមួយអាជីពសិល្បៈដែលមមាញឹក។ តារារូបនេះបានចំណាយដើមទុនច្រើនពង្រីកមុខរបរក្រៅសិល្បៈមួយនោះ ។
អ្នកនាងស៊ឹម សូលីកា នៅរក្សាបានទីតាំងមួយកន្លែងទៀតជាហាងផាត់មុខធ្វើសក់ នៅទល់មុខភោជនីយដ្ឋានពិភពថ្មីក្រោយមន្ទីរពេទ្យគន្ធបុប្ឋាជិតវត្តភ្នំ ។
តារាសម្តែងញឹម ចាន់ថន ៖ ធ្លាប់បើកហាងលក់សម្លៀកបំពាក់ទំនើបទាន់សម័យកាលពីយូរឆ្នាំមុន ប៉ុន្តែបិទវិញបន្ទាប់ពីយុទ្ឋសាស្ត្ររកសុីមិនអាចទប់ទល់បានក្នុងពេលអាជីពសិល្បៈមមាញឹក ។
កន្លងមកពេលសួរនាំញឹម ចាន់ថន លើកឡើងថា ចិត្តចង់បើករបរថ្មីដែរ តែខ្លាចចោលទុន ទទេៗ ដូច្នេះមានតែចាំពេលគិតច្បាស់ទើបសម្រេចម្តងទៀត ។
លោកអ៊ែនឌី ៖ ធ្លាប់មានប្រវត្តិលក់សម្លៀកបំពាក់ដែរ តែបានបិទទៅវិញ ។
តារារូបនេះនៅតែតាំងចិត្តរកមុខរបរថ្មីទៀត ខណៈមួយរយៈចុងក្រោយដែលមិនទាន់បើកបានមុខរបរថ្មី តែអ៊ែនឌី មមាញឹកជាមួយអាជីពសិល្បៈខ្លាំងជាងមុន ។ ជាពិសេសលោកចាប់ឱកាសសម្តែងនៅក្រៅប្រទេសជាបន្តបន្ទាប់អាចធ្វើឱ្យសល់ទុនសម្រាប់គិតដល់អាជីពសិល្បៈ ។
តារាកំប្លែងនាយហុងដា ៖ ធ្លាប់បើកហាងខារ៉ាអូខេចំណាយទុនច្រើនគួរសមរហូតអ្នកគាំទ្រជាច្រើនសរសើរពីភាពលូតលាស់នេះ ។ ទោះជាយ៉ាងណាក្តីបានតែមួយរយៈខ្លីក៏បិទទៅវិញ ។ ទន្ទឹមនោះធ្លាយរឿងថានាយហុងដាជំពាក់បំណុលគេត្រូវសងរំលស់ជាប្រចាំ ខែដូច្នោះហើយធ្វើឱ្យនាយលំបាករហូតសម្រេចចិត្តឈប់នឹកនារបរអ្វីក្រៅពីសម្តែងកំប្លែង ។
តារាកំប្លែងស្រីលន់ ដាណេ ៖ ធ្លាប់បើកហាងផឹកស៊ីប្តូរពីមួយទៅមួយ តែមិនជោគជ័យក៏បិទទៅវិញ ។ លន់ ដាណេ ពេលនេះវិលមកចូលរួមសម្តែងកំប្លែងវិញជាមួយនាយក្រឹម។
លោកបណ្ឌិតគី សិរីវឌ្ឍន៍ បណ្ឌិតសេដ្ឋកិច្ច និងជាអ្នកស្រាវជ្រាវនៅរាជបណ្ឌិត្យសភាបានបញ្ជាក់ប្រាប់កោះសន្តិភាពកាលពីព្រឹកថ្ងៃទី១៤ ខែកម្ភៈ ២០១៨ថា ការបើកអាជីវកម្មមួយគឺមិនងាយស្រួលទេ គឺត្រូវសិក្សាទៅលើអតិថិជន ព្រោះវាជារបត់ដែលសំខាន់ជាងគេ ថាតើឥរិយាបថរបស់អតិថិជនស្របនឹងទំនិញដែលគាត់លក់ ត្រូវនឹងអ្វីដែលអតិថិជនចង់បានដែរឬទេ ? គឺយើងត្រូវមានការសិក្សាឲ្យបានច្បាស់លាស់មុននឹងបង្កើតអាជីវកម្មនោះឡើង។ មួយទៀតគឺប្រព័ន្ធគ្រប់គ្រងត្រូវគិតថាចំណេញប៉ុន្មាន ខាតប៉ុន្មានគឺគិតឲ្យបានច្បាស់លាស់ ទាំងខ្លួនឯង និងសម្រាប់បុគ្គលិក ។
លោកបណ្ឌិតគី សិរីវឌ្ឍន៍ ថ្លែងថា៖ «សរុបមកអ្វីដែលខ្ញុំចង់ឲ្យអ្នកដែលគាត់បើកអាជីវកម្មមិនថាលក្ខណៈតូចធំទេ គឺសុំឲ្យគិតទៅលើកត្តា៣យ៉ាង។ ក្នុងនោះរួមមាន៖
ទី១-ទីផ្សារ ៖ បើសិនជាគាត់បើកហាងមួយកន្លែងដែលជាកម្មសិទ្ធិផ្ទាល់ខ្លួន គឺមានតែគាត់ទេដែលជាអ្នកpromote ដល់ហាងរបស់គាត់ខ្លួនឯង អ៊ីចឹងការpromotion ដដែលៗហ្នឹងធ្វើឲ្យអតិថិជនអត់ចាប់អារម្មណ៍ ដោយសារហាង នីមួយៗគេមិនមែនហៅតែតារាម្នាក់មកផ្សព្វផ្សាយទេ គឺប្តូរគ្នាទៅតាមសម័យកាល និងការពេញនិយមរបស់អ្នកទិញ ។
២-ប្រព័ន្ធគ្រប់គ្រង ៖ តារាដែលគាត់បើកហាងផ្ទាល់ខ្លួនរបស់គាត់ភាគច្រើនជាអ្នកបង្ហាញម៉ូដខ្លួនឯង លក់ គិតចំណេញខាតលើខ្លួនឯងទាំងអស់ ជួនកាលលក់អត់ដាច់ តែបើសិនជាពេលហ្នឹងគាត់ទៅដើរម៉ូដឲ្យគេផ្សេងគឺបានលុយច្រើនជាងនៅអង្គុយលក់ អី៊ចឹងធ្វើឲ្យតារាទាំងនោះបោះបង់អាជីវកម្មហ្នឹង ហើយសុខចិត្តបង្ហាញម៉ូតទិឲ្យក្រុមហ៊ុន ផ្សេងៗ នេះគឺពាក់ព័ន្ធនឹងឯកទេសគ្រប់គ្រង ព្រោះមនុស្សម្នាក់មិនអាចធ្វើការគ្រប់មុខបានទេ ហើយដើម្បីឲ្យអាជីវកម្មរបស់ខ្លួនចំណេញគឺត្រូវប្រគល់អាជីវកម្មនោះទៅឲ្យអ្នកផ្សេងគ្រប់គ្រង ហើយយើងគ្រាន់តែជាអ្នកតំណាងបានហើយ ។
៣-ឥរិយាបថរបស់អតិថិជន ៖ គឺត្រូវសិក្សាទៅលើផលិតផល និងឥរិយាបថរបស់អ្នកទិញជាចម្បង ។ គ្រប់ក្រុមហ៊ុនគឺគេមានអ្នកជំនាញខាងអង្គុយគិតថាតើនេះជាចរន្តសម័យកាលអី ទំនិញណាខ្លះអាចលក់បាន ឬផលិតផលណាខ្លះលក់ទៅបានចំណេញច្រើន ប៉ុន្តែចំពោះតារាភាគច្រើនគឺគាត់មិនបានសិក្សាទៅលើទីផ្សារប៉ុន្មានទេ គឺគាត់មើលតាមអ្វីដែលគាត់ស្រឡាញ់ ហើយគិតថាពេលគាត់ពាក់ទៅគឺមានអ្នកទិញច្រើន ហើយពាក់តាមដែរ »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ