ខេត្តបន្ទាយមានជ័យ ៖ ដោយយោងតាមដីកាបង្គាប់ឱ្យចាប់ខ្លួនលេខ ១៣១ ដក.បចខ របស់សាលដំបូងខេត្តកណ្តាលស្តីពីករណី ឃាតកម្មគិតទុកជាមុន ប្រព្រឹត្តនៅភូមិតាឡឹក ឃុំត្រពាំងវែង ស្រុកកណ្តាលស្ទឹង ខេត្តកណ្តាល កាលពីថ្ងៃទី២៦ ខែវិចិ្ឆកា ឆ្នាំ២០១៥ តាមបញ្ញត្តិមាត្រា ២០០ នៃក្រមព្រហ្មទណ្ឌ ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានបញ្ជាក់ថា កន្លងទៅថ្មីៗនេះដោយអនុវត្តន៍តាមដីកាបង្គាប់ឱ្យចាប់ខ្លួនរបស់សាលាដំបូងខេត្តកណ្តាល កម្លាំងជំនាញដែលចុះធ្វើការស្រាវជ្រាវរកមុខសញ្ញាជនសង្ស័យបានទទួលបានព័ត៌មានថា មានជនសង្ស័យឈ្មោះ យឺន ចន្ទី (ហៅ ទី) ភេទប្រុស អាយុ ២៦ឆ្នាំ ដែលជាជនដៃដល់បានប្រព្រឹត្តបទល្មើសឃាតកម្មគិតទុកជាមុនបានមកសម្ងំលាក់ខ្លួន និងស្នាក់នៅក្នុងបន្ទប់ជួលមួយកន្លែង ស្ថិតក្ន្ងងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។ លោកដឹកនាំកម្លាំងមូលដ្ឋានកងរាជអាវុធហត្ថក្រុងប៉ោយប៉ែត ចុះប្រតិបត្តិការធ្វើការឃាត់ខ្លួនជនសង្ស័យនៅក្នុងបន្ទប់ជួលតែម្តង ។
លោកវរសេនីយ៍ត្រី នួន នីណារ៉ូ បានបញ្ជាក់បន្ថែមថា ពេលធ្វើការសាកសួររបស់កម្លាំងជំនាញជនសង្ស័យឈ្មោះ យឺន ចន្ទី (ហៅ ទី) បានសារភាពថា កាលពីថ្ងៃទី២៦ ខែវិចិ្ឆកា ឆ្នាំ២០១៥ រូបគេជាមួយបក្សពួកម្នាក់ទៀតឈ្មោះ ផារ៉ូត និងជនរងគ្រោះឈ្មោះ លី បានជិះម៉ូតូទាំង០៣នាក់ (ម៉ូតូរបស់ជនរងគ្រោះ) ទៅសេពគ្រឿងញៀននៅក្នុងព្រៃឬស្សី ក្រោយវត្តពោធិសាត់ ខេត្តកណ្តាល ពេលសេពគ្រឿងញៀនរួចក៏មានការទាស់សម្តីគ្នាជាមួយជនរងគ្រោះ ហើយរូបគេ និងឈ្មោះ ផារ៉ូត ក៏បានព្រួតគ្នាវាយទៅលើជនរងគ្រោះ និងបានយកខ្សែក្រវ៉ាត់រឹត.កជនរងគ្រោះ និងយកសោរម៉ូតូចាក់ទៅលើបំពង់.កជនរងគ្រោះបំណងសម្លាប់បំបិទមាត់តែម្តង ។
បន្ទាប់មករូបគេ និងឈ្មោះ ផារ៉ូត បានយកទ្រព្យសម្បត្តិនៅជាប់ខ្លួនរបស់ជនរងគ្រោះ និងជិះម៉ូតូរបស់ជនរងគ្រោះយកទៅលក់នៅទីក្រុងភ្នំពេញ ។ ក្រោយពីប្រព្រឹត្តអំពើឃាតកម្មរួចរូបគេ បានគេចខ្លួនមកធ្វើជាកម្មករសំណង់នៅស្រុកម៉ាឡៃ ខេត្តបន្ទាយមានជ័យ បានប្រមាណ០៤ខែរួចរូបគេបានគេចទៅលាក់ខ្លួននៅខេត្តសៀមរាបក្នុងអំឡុងពេលរស់នៅខេត្តសៀមរាបរូបគេបានប្រព្រឹត្តបទល្មើសនៅទីនោះ ហើយបានគេចមកសម្ងំលាក់ខ្លួនមករស់នៅក្រុងប៉ោយប៉ែតក៏ត្រូវបានសមត្ថកិច្ចកងរាជអាវុធហត្ថក្រុងប៉ោយប៉ែត ឃាត់ខ្លួនតែម្តង ។
លោកមេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឱ្យដឹងទៀតថា ក្រោយទទួលបានចម្លើយសារភាពរបស់ជនសង្ស័យលោកបានកសាងសំណុះរឿងបញ្ជូនជនសង្ស័យមកទីបញ្ជាការកងរាជអាវុធហត្ថខេត្តដើម្បីចាត់ការបន្តតាមនីតិវិធី ៕
ចែករំលែកព័តមាននេះ