រាជធានីភ្នំពេញ ៖ តារាសម្តែង និងពិធីការិនីវ័យក្មេងអន រ៉ាស៊ីសុមេត្តា ហៅណូម័រ បានទិញផ្ទះថ្មីមួយជុងបន្ថែមទៀត មានតម្លៃរាប់ម៉ឺនដុល្លារ ។
ផ្ទះ១ជុងនោះស្ថិតនៅតំបន់ចម្ការដូងមានតម្លៃជាង៦ម៉ឺនដុល្លារ នាងបានទិញជាកាដូពិសេសសម្រាប់ជូនម្ដាយ ក្នុងថ្ងៃបុណ្យនៃក្ដីស្រលាញ់ ប៉ុន្តែផ្ទះនេះនាងមិនមានបំណងទិញស្នាក់នៅឡើយ ព្រោះនាងមានផ្ទះ១ជុងទៀតនៅ ម្ដុំផ្លូវ២០០៤ ជិតវត្តអង្គតាមិញ ដែលកំពុងតែស្នាក់នៅជាមួយម្ដាយបច្ចុប្បន្ន ។
ណូម័រ បានបង្ហោះរូបភាពដោយភ្ជាប់ជាមួយផ្ទះថ្មីរបស់នាង ជាមួយនឹងសារថា «អូនសុខចិត្តលះបង់ការធ្វើច្រមុះដើម្បីយកលុយមកបង្កប់ទិញផ្ទះមួយល្វែងទៀតជាកាដូថ្ងៃបុណ្យនៃសេចក្តីស្រឡាញ់ជូនអ្នកម្តាយ គ្រាន់ឲ្យអ្នកម្តាយដាក់ជួលបានកម្រៃ៤០០ដុល្លារទៅ៥០០ដុល្លារក្នុងមួយខែនៅដៃគាត់ដែរ ។ សូមអ្នកម្តាយចាំថា ទោះគ្មានថ្ងៃបុណ្យនៃសេចក្តីស្រលាញ់ក៏សេចក្តីគោរពអាណិតស្រលាញ់របស់កូនតែងមានចំពោះអ្នកម្តាយគ្រប់វិនាទី » ។
អន រ៉ាស៊ីសុមេត្តា ហៅណូម័រ បញ្ជាក់ថា សម្រាប់ប្រាក់ដែលយកមកទិញផ្ទះទាំង២ជុងនេះ គឺមិនមានអ្នកនៅពីក្រោយខ្នងចាំជួយនោះឡើយ ពោលគឺបានមកពីកម្លាំងញើសឈាមក្នុងអាជីពសិល្បៈ និងការងាររកស៊ីរបស់នាងផ្ទាល់ខ្លួនប៉ុណ្ណោះ ។
កញ្ញាអន រ៉ាស៊ីសុមេត្តា ហៅណូម័រ ថ្មីៗនេះកំពុងតែទាក់ទាញប្រជាប្រិយភាពពីទស្ស និកជន ព្រោះតែទេពកោលស្យ និងសម្រស់របស់នាង ទាំងការសម្ដែង និងពិធីការិនី ធ្វើឲ្យនាងលេចធ្លោពីមួយថ្ងៃទៅមួយថ្ងៃ ។
ណូម័រ ទើបតែបោះជំហានចូលសិល្បៈជាង ៣ឆ្នាំនេះទេ ប៉ុន្តែតារាសម្ដែង និងជាពិធីការិនីតូចច្រឡឹងរូបនេះហាក់ដូចជារាសីឡើងខ្លាំងគួរឲ្យកត់សម្គាល់ ។ តារារូបនេះតែងតែប្តូររថយន្តជាបន្តបន្ទាប់ ខណៈពេលដែលនាងទើបតែទិញផ្ទះ១ល្វែងកាលពីជាង១ឆ្នាំមុន ។
ដោយឡែកពាក់ព័ន្ធទៅនឹងជីវិតស្នេហាវិញ ណូម័រធ្លាប់បានបញ្ជាក់ថា នាងចង់ពន្យារពេលយ៉ាងតិច៣ទៅ៤ឆ្នាំទៀតដែរ ដើម្បីសម្រេចចិត្តទទួលយកស្នេហា ព្រោះតែពេលនេះនាងកំពុងទទួលបានការគាំទ្រច្រើនពីទស្សនិកជន និងចង់មានឱកាសជួយដល់ក្រុមគ្រួសារឲ្យបានច្រើនជាងនេះ ពិសេសនាងមិនចង់ទទួលយកស្នេហាដែលមិនច្បាស់លាស់ ៕
ចែករំលែកព័តមាននេះ