ខេត្តព្រៃវែង ៖ រថយន្តហាយឡែនឌ័រ១គ្រឿង បានបើករេចង្កូតធ្លាក់ចេញពីផ្លូវជ្រុលទៅបុករះតូបលក់ និងផ្ទះអ្នកស្រុករហូតទៅមុខលែងរួច បណ្តាលឱ្យស្លាប់ម្នាក់ ហេតុការណ៍ដ៏គួរឱ្យរន្ធត់នេះ កើតឡើងកាលពីម៉ោង២និង៣០នាទីរសៀល ថ្ងៃទី១៦ កុម្ភៈ តាមបណ្តោយផ្លូវជាតិលេខ៨អា ស្ថិតក្នុងភូមិស្វាយអាត់ ឃុំជ្រៃ ស្រុកស្វាយអន្ទរ។
ស្ត្រីរងគ្រោះជាអ្នកលក់សាច់គោម្នាក់ឈ្មោះ ភាន់ ស៊ិក អាយុ២១ឆ្នាំ ស្លាប់បាត់បង់ជីវិតនៅនឹងកន្លែង និងក្មេងស្រីម្នាក់ឈ្មោះ សឿន សូ អាយុ២ឆ្នាំ ត្រូវជាកូនស្ត្រីរងគ្រោះបានរងរបួសធ្ងន់។ ចំណែករថយន្តបង្កម៉ាកហាយឡែនឌ័រ ពណ៌ស ពាក់ស្លាកលេខភ្នំពេញ២R.៧៩៩២ មានម្ចាស់ឈ្មោះ ទេស ចាន់ថុល ភេទប្រុស អាយុ៥៨ឆ្នាំ រងរបួសធ្ងន់ មានទីលំនៅក្នុងភូមិម៉ាស៊ីនទឹក ឃុំម៉ាស៊ីនទឹក ស្រុកមេមត់ ខេត្តត្បូងឃ្មុំ និងរួមដំណើរម្នាក់ជាប្រពន្ធតែគេមិនស្គាល់ឈ្មោះ រងរបួសស្រាល។
បើតាមប្រភពពីកន្លែងកើតហេតុឲ្យដឹងថា គេឃើញរថយន្តបង្កបើកក្នុងល្បឿនយ៉ាងលឿនពីកើតទៅលិច ពេលដល់ចំណុចកើតហេតុ ស្រាប់តែរេចង្កូតធ្លាក់ចេញពីផ្លូវជ្រុលទៅបុកតូបលក់សាច់គោដែលស្ត្រីរងគ្រោះ និងកូនកំពុងអង្គុយលក់ បណ្តាលឱ្យតូបលក់ និងសាច់គោ ព្រមទាំងម្ចាស់ប៉ើងខ្ចាត់ខ្ចាយ ហើយរថយន្តក៏ទៅបុកម៉ូតូ១គ្រឿងទៀតម៉ាកហុងដា C125 ពណ៌ខ្មៅ ដែលម្ចាស់បញ្ឈរទុកក្បែរនោះ ។ នៅមិនអស់ល្បឿនទៀតរថយន្តបន្តទៅបុកជញ្ជាំងផ្ទះរបស់ឈ្មោះ ឯក សុខ ភេទស្រី អាយុ៤៤ឆ្នាំ បាក់អស់១ផ្ទាំងធំ និងជ្រុលទៅបុកផ្ទះរបស់ឈ្មោះ កៅ វិចិត្រ ភេទប្រុស អាយុ៤២ឆ្នាំ បាក់អស់១ផ្ទាំងធំទៀត ទើបទៅមុខលែងរួច។
សមត្ថកិច្ចឲ្យដឹងថា តាមការពិនិត្យលើខ្លួនជនបង្កគឺមានក្លិនស្រាជាខ្លាំងនោះ ទើបសន្និដ្ឋានថា គ្រោះថ្នាក់នេះ គឺបង្កឡើងដោយសារម្ចាស់រថយន្តស្រវឹងស្រា ហើយបើកទាំងស្រវឹងយ៉ាងលឿន ទើបគ្រប់គ្រងរថយន្តមិនបានធ្វើឱ្យមានគ្រោះថ្នាក់បែបនេះ។ ដោយឡែកជនបង្កអះអាងថា មូលហេតុដែលបង្កឱ្យមានគ្រោះថ្នាក់នេះ គឺដោយសារតែមានសត្វអ្វីមួយរត់កាត់មុខរថយន្ត ទើបរូបគាត់ខំបួងចង្កូតគេច ក៏ជ្រុលធ្លាក់ផ្លូវទៅបុករះតូបលក់ដូរ និងផ្ទះអ្នកស្រុកបែបនេះទៅ។
គួរបញ្ជាក់ផងដែរថា ក្រោយពេលកើតហេតុសមត្ថកិច្ចចុះអន្តរាគមន៍ភ្លាមៗ ដោយយករថយន្តបង្កទៅរក្សាទុកនៅអធិការដ្ឋាន ចំណែកកុមាររីរងគ្រោះ ព្រមទាំងជនបង្ក និងប្រពន្ធ ត្រូវនាំយកទៅសង្គ្រោះនៅឯមន្ទីរពេទ្យ រីឯសពស្ត្រីរងគ្រោះត្រូវបានប្រគល់ទៅឱ្យគ្រួសារយកទៅធ្វើបុណ្យតាមប្រពៃណី ។ ហើយរហូតមកដល់ពេលនេះ នៅមិនទាន់មានការដោះស្រាយនៅឡើយទេ ព្រោះភាគីបង្កកំពុងដេកពេទ្យនៅឡើយ តែទោះយ៉ាងណាជនបង្កក៏ស្ថិតនៅក្រោយការត្រួតពិនិត្យរបស់សមត្ថកិច្ចផងដែរ៕
ចែករំលែកព័តមាននេះ