ខេត្តឧត្តរមានជ័យ ៖ បុរសវ័យចំណាស់ម្នាក់ជិះទូកទៅលើកលបកើតខ្យល់គ ធ្លាក់ចូលទៅក្នុងទឹកប្រឡាយប្រឡាយស្លាប់បាត់បង់ជីវិតចោលប្រពន្ធ និងកូនគួរឱ្យអាសូរ ហេតុការណ៍នេះកើតឡើងកាលពីវេលាប្រមាណម៉ោង៨ព្រឹក ថ្ងៃទី១៧ កុម្ភៈ ស្ថិតក្នុងភូមិទំនប់ ឃុំត្រពាំងតាវ…
ខេត្តឧត្តរមានជ័យ ៖ បុរសវ័យចំណាស់ម្នាក់ជិះទូកទៅលើកលបកើតខ្យល់គ ធ្លាក់ចូលទៅក្នុងទឹកប្រឡាយប្រឡាយស្លាប់បាត់បង់ជីវិតចោលប្រពន្ធ និងកូនគួរឱ្យអាសូរ ហេតុការណ៍នេះកើតឡើងកាលពីវេលាប្រមាណម៉ោង៨ព្រឹក ថ្ងៃទី១៧ កុម្ភៈ ស្ថិតក្នុងភូមិទំនប់ ឃុំត្រពាំងតាវ ស្រុកអន្លង់វែង ។
ជនរងគ្រោះខាងលើឈ្មោះ ពុធ ខេង ភេទប្រុស អាយុ៤៩ឆ្នាំ រស់នៅក្នុងភូមិ-ឃុំកើតហេតុខាងលើ។
យោងតាមសាច់ញាតិបានឱ្យដឹងថា មុនកើតហេតុ ជនរងគ្រោះតែងតែជិះទូកទៅលើកលបជារៀងរាល់ព្រឹកដោយមានកូនប្រុសទៅជាមួយ លុះនៅព្រឹកថ្ងៃទី១៧ កុម្ភៈ ជនរងគ្រោះបានឱ្យម៉ូតូឌុបទៅទំលាក់នៅមាត់ប្រឡាយ រួចជិះទូកទៅតែម្នាក់ឯង ហើយកូនជិះម៉ូតូត្រឡប់មកផ្ទះវិញ។ ក្រោយមកកូន និងប្រពន្ធទន្ទឹងមើលផ្លូវ ដើម្បីប្តីយកត្រីធ្វើម្ហូប ចេះតែមិនឃើញក៏ឆ្ងល់នាំគ្នាដើរទៅតាមរកមើល ស្រាប់តែឃើញតែទូកបាត់មនុស្ស ដោយសង្ស័យក៏ចុះមុជរាវក្នុងទឹក ស្រាប់តែប្រទះឃើញស្លាប់បាត់ទៅហើយ។
បើតាមប៉ូលិសស្រុកអន្លង់វែងបានដឹងថា ក្រោយពីទទួលនូវព័ត៌មានពីគ្រួសារជនរងគ្រោះរួចមក សមត្ថកិច្ចបានចុះទៅដល់កន្លែងកើតហេតុធ្វើការស្រាវជ្រាវ និងពិនិត្យសព ហើយសន្និដ្ឋានថា ជនរងគ្រោះអាចកើតខ្យល់គ ហើយធ្លាក់ចូលក្នុងទឹកដោយពុំមានអ្នកជួយសង្គ្រោះ ទើបស្លាប់បាត់បង់ជីវិតតែម្តង ក៏អាចថាបានដែរ ព្រោះគ្មានស្លាកស្នាមអ្វីដែលពាក់ព័ន្ធនឹងរឿងឃាតកម្មនោះទេ៕
ចែករំលែកព័តមាននេះ