រាជធានីភ្នំពេញ ៖ បុរសជាអ្នកបើកបររថយន្តរត់តាក់ស៊ីក្រហមម្នាក់ត្រូវបានជនសង្ស័យហៅដឹកទៅរង់ចាំទទួលប្រពន្ធរបស់គេបាននាំយកទៅរឹត.កកាប់ប្លន់យករថយន្តបណ្តាលឲ្យរងរបួសធ្ងន់ រួចច្រានទន្លាក់ពីលើរថយន្តរួចព្យាយាមបើករត់គេចខ្លួនដល់ពេលដឹងថា រថយន្តនោះភ្ជាប់ប្រព័ន្ធជីភីអេសហើយមានអ្នកតាមទៀតនោះស្រាប់តែយករថយន្តទៅប្លុងចោលហើយរត់គេចខ្លួនបាត់ស្រមោល ។ ហេតុការណ៍នោះបង្កឲ្យមានការភ្ញាក់ផ្អើលនេះកើតឡើងការពីវេលាម៉ោង១១និង៣០នាទីយប់ ថ្ងៃទី១៧ ខែកុម្ភៈ ឆ្នាំ ២០១៨ ស្ថិតនៅតាមបណ្តោយផ្លូវបេតុងកែងផ្លូវរថភ្លើងភូមិក្រោលគោសង្កាត់ គីឡូម៉ែត្រលេខ៦ ខណ្ឌឬស្សីកែវ ។
ជនរងគ្រោះមានឈ្មោះ ញាញ់ សុខគា ភេទប្រុស អាយុ២១ឆ្នាំ មុខរបរបើកតាក់ស៊ីម៉ែត្រក្រហម ស្នាក់នៅផ្ទះជួលភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជយ័ មានស្រុកកំណើតនៅភូមិទួលទទឹង ឃុំទួលទទឹង ក្រុងព្រះសីហនុ ខេត្តព្រះសីហនុ ។ ជនរងគ្រោះបើករថយន្តមួយគ្រឿងម៉ាកកាមរីបាឡែនជារថយន្តតាក់ស៊ីម៉ែត្រពណ៌ក្រហម ពាក់ស្លាកលេខ ភ្នំពេញ ២AF-៦២៣៧ ។
តាមប្រភពព័ត៌មានពីបងប្រុសរបស់ជនរងគ្រោះបានប្រាប់ឲ្យដឹងថា មុនកើតហេតុនៅវេលាម៉ោង១០យប់រូបគាត់បានទូរស័ព្ទទំនាក់ទំនងជាមួយប្អូនជនរងគ្រោះរហូតហើយបានទូរស័ព្ទហៅប្អូនឲ្យមកដឹកម៉ូយម្នាក់នៅម្តុំផ្សាររាត្រី តែប្អូនបានប្រាប់មកវិញថា ជាប់រវល់ដឹកម៉ូយយកទៅឬស្សីកែវ ស្រាប់តែមួយសន្ទុះក្រោយមកប្អូនប្រុសបានទូរស័ព្ទមកប្រាប់វិញថា ជនសង្ស័យបានឲ្យនៅរង់ចាំយកប្រពន្ធរបស់គេទៀត ។ លុះដល់ម៉ោងជាង១១យប់គាត់បានទូរស័ព្ទទៅទៀតតែអត់មានអ្នកលើកទើបមានការភ្ញាក់ផ្អើល ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់ឲ្យដឹងថា ឃើញរថយន្តមួយគ្រឿងឈប់នៅនឹងកន្លែងកើតហេតុជាងមួយម៉ោងមកហើយ គឺជនរងគ្រោះរង់ចាំប្រពន្ធជនសង្ស័យជាលេសចាញ់បោកល្បិចជនសង្ស័យដែលបានរៀបគំរោងទុកជាមុន ឃើញឱកាសល្អជនសង្ស័យបានយកខ្សែហ្វ្រាំងម៉ូតូរឹត.កជនរងគ្រោះផ្ទប់ជាប់ជាមួយកៅអីរថយន្តធ្វើឲ្យជនរងគ្រោះមានការរើបំរាស់រហូតចេញក្រៅរថយន្តមានការប្រតាយប្រតប់គ្នាតែត្រូវបានជនសង្ស័យដកកាំបិតបុ័ងតោដែលបានលាក់ទុកជាប់នឹងខ្លួនកាប់ជាច្រើនកាំបិតត្រូវចំក្បាល និងដៃជនរងគ្រោះបណ្តាលឲ្យប្រកាច់នៅក្នុងថ្លុកឈាមធ្វើជនសង្ស័យមានឱកាសបានឡើងបើករថយន្តគេចខ្លួនបាត់ស្រមោល ។
ភ្លាមៗនោះប្រជាពលរដ្ឋបានឃើញហេតុការណ៍នេះបានទំនាក់ទំនងទៅសមត្ថកិច្ចឲ្យចុះមកកន្លែងកើតហេតុហើតសមត្ថកិច្ចបានចុះទៅដល់ហៅរថយន្តសង្គ្រោះបន្ទាន់របស់គ្លីនិកឯកជនដឹកយកទៅសង្គ្រោះភ្លាមៗ និងបោះដៃតាមវិទ្យុទាក់ទងឲ្យសមត្ថកិច្ចគ្រប់ខណ្ឌចុះជួយអន្តរាគមន៍ផង ភ្លាមៗនោះកម្លាំងសមត្ថកិច្ចខណ្ឌដូនពេញបានចេញអន្តរាគមន៍ និងល្បាតក៏បានប្រទះឃើញរថយន្តជនរងគ្រោះត្រូវបានជនសង្ស័យបើកយកទៅប្លុងចោលនៅនឹងម្តុំផ្លូវលេខ៦១ សង្កាត់ផ្សារទី១ ខណ្ឌដូនពេញ ចំណែកជនសង្ស័យរត់គេចខ្លួនបាត់ដោយសារតែរថយន្តនោះមានភ្ជាប់ប្រព័ន្ធជីភីអេស និងមានប្រព័ន្ធវិទ្យុទាក់ទងរបស់ក្រុមតាក់ស៊ីបំពាក់នៅក្នុងរថយន្តផងដែរ ។ ក្រោយពេលកើតហេតុសមត្ថកិច្ចខណ្ឌដូនពេញបានទាក់ទងទៅខណ្ឌឬស្សីកែវឲ្យមកយករថយន្តទៅរក្សាទុកនឹងធ្វើកំណត់ហេតុដាក់ពាក្យបណ្តឹងដើម្បីឲ្យសម្ថកិច្ចកំណត់មុខសញ្ញាឈានដល់ការចាប់ខ្លួនមកដាក់ទោសទៅតាមនីតិវិធី ៕
ចែករំលែកព័តមាននេះ