រាជធានីភ្នំពេញ ៖ រៀបការបានគ្នាជាប្តីប្រពន្ធមិនទាន់បាន១ឆ្នាំផងចេះតែប្រេះឆាក្នុងគ្រួសារទ្រាំមើលនឹងភ្នែកពិបាកពេកសាច់ញាតិបងប្អូនខាងស្រីនាំនាងជាប្រពន្ធគេចឲ្យផុតពីមុខប្តីមួយរយៈបែរជាប្រទះពាក្យក្លាយជាសង្គ្រាមសម្តីទីបំផុតផ្ទុះសង្គ្រាមលើផ្ទះជួលរវាងបងប្អូនសាច់ថ្លៃវាយផ្អើលថ្ងៃចូលឆ្នាំចិនបង្កឱ្យភ្ញាក់ផ្អើលទាំងប៉ូលិសចុះទៅអន្តរាគមន៍នាំខ្លួនជនរងរបួសទាំង៥នាក់ទៅសាកសួរនៅប៉ុស្តិ៍ ហេតុការណ៍នេះបង្ករភ្ញាក់ផ្អើលកាលពីវេលាម៉ោង៧យប់ថ្ងៃទី១៧ ខែកុម្ភៈ ឆ្នាំ២០១៨ នៅភូមិព្រៃសាលា សង្កាត់កាកាប២ ខណ្ឌពោធិសែនជ័យ ។
ភាគីទី១មានឈ្មោះ ស៊ឹម សឿន ភេទប្រុស អាយុ៣៧ឆ្នាំ មុខរបរកម្មករសំណង់, ទី២-ឈ្មោះ ជុំ សារ៉ាត់ ភេទប្រុស អាយុ៤៧ឆ្នាំ មុខរបរកម្មករសំណង់, ទី៣-ឈ្មោះ ស៊ឹម សន ភេទប្រុស អាយុ២៧ឆ្នាំ និងទី៤-ឈ្មោះ ស៊ឹម សិន ភេទស្រី អាយុ៣៨ឆ្នាំ ទាំង៤នាក់ស្នាក់នៅបន្ទប់ជួលជាន់ទី៣ ក្នុងភូមិព្រៃសាលា សង្កាត់កាកាប២ ខណ្ឌពោធិសែនជ័យ ។ ដោយឡែកភាគីទី២មានតែម្នាក់ឈ្មោះ ជ័យ ចាន់ ភេទប្រុស អាយុ៣៨ឆ្នាំ មុខរបរកម្មករសំណង់ ស្នាក់នៅបន្ទប់ជួលជាន់ទី២ នៅភូមិព្រៃសាលា សង្កាត់កាកាប២ ខណ្ឌពោធិសែនជ័យ ។
តាមប្រភពព័ត៌មានបានឲ្យដឹងថា ក្រុមអ្នកទាំង៥សុទ្ធសឹងជាបងប្អូនបងថ្លៃនឹងគ្នាតែដោយសារមានបញ្ហាក្នុងគ្រួសារបុរសឈ្មោះ ជ័យ ចាន់ ជាសាច់ញាតិចោទថា ចេះតែរករឿងប្រពន្ធទើបទ្រាំលែងបានបងប្អូននាំគ្នាយកប្រពន្ធទៅលាក់ទុកនៅកន្លែងផ្សេង ដើម្បីកុំឲ្យប្តីចេះតែរករឿងពេកស្រាប់តែមកដល់យប់ថ្ងៃទី១៧ ខែកុម្ភៈ រឿងរ៉ាវសម្តីមិនចេះចប់មិនចេះហើយទើបឈានដល់ផ្ទុះហិង្សាដាក់គ្នាវាយទៅមកគ្មានអ្នកចាញ់ ហើយក៏គ្មានអ្នកឈ្នះមានតែអ្នករងរបួសគឺទាំង៥នាក់តែម្តង ស្រីម្នាក់ផងដែរ សុទ្ធសឹងតែប្រលាក់ឈាមជោកក្បាលដូចគ្នា ។
ករណីខាងលើខណៈដែលបន្តបណ្តែតបណ្តោយថ្វីត្បិតតែសាច់ញាតិបងប្អូននឹងគ្នាមែនតែហិង្សា ដែកទីបជ្រុងវាយសំពងទៅមក ទើបកម្លាំងនគរបាលប៉ុស្តិ៍កាកាប២ចុះទៅឃាត់មនុស្សទាំង៥នាក់មកសាកសួរនៅប៉ុស្តិ៍ចៀសវាងបង្កបញ្ហាលើផ្ទះជួលរំខានដល់ពលរដ្ឋក្បែរខាង ៕
ចែករំលែកព័តមាននេះ