រាជធានីភ្នំពេញ ៖ យុវជនម្នាក់បានស្រឡាញ់កូនស្រីរបស់អ្នកស្រុកជាមួយគ្នាយ៉ាងខ្លាំង រហូតបំភ្លេចនាងមិនបាន ហើយបានឲ្យម្ដាយរបស់ខ្លួនស៊ើបសួរទៅក្រុមគ្រួសារខាងស្រី តើព្រមលើកឲ្យ ឬមិនព្រម ។ ប៉ុន្តែពេលនោះ ត្រូវបានម្ដាយខាងស្រីបដិសេធមិនព្រមឡើយ ដោយប្រាប់ថា កូនស្រីរបស់គាត់កំពុងជាប់រៀននៅឡើយ ។
បន្ទាប់ពីទទួលដំណឹងខាងលើនេះពីម្ដាយរបស់ខ្លួនតាមទូរស័ព្ទ បានធ្វើឲ្យយុវជននេះខកបំណងយ៉ាងខ្លាំង ព្រមទាំងគិតខ្លីក៏បានសម្រេចចិត្តធ្វើអត្តឃាតដោយចង.កសម្លាប់ខ្លួននៅក្នុងបន្ទប់បង្គន់ បង្កឲ្យមានការភ្ញាក់ផ្អើលទាំងថ្ងៃតែម្ដង ។
ហេតុការណ៍ខាងលើនេះ បានបង្កឲ្យមានការភ្ញាក់ផ្អើលឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី១៧ ខែកុម្ភៈ ឆ្នាំ២០១៨ នៅក្នុងបង្គន់ក្នុងក្រុមហ៊ុនបុកគ្រឹះ លក់ និងជួលគ្រឿងចក្រគ្រប់ប្រភេទមួយ ។ ដែលមានតាំងស្ថិតនៅក្នុងជិតខ្លោងទ្វារវត្តអង្គត្រគៀត តាមបណ្ដោយផ្លូវជាតិលេខ៣ ភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ រាជធានីភ្នំញេញ ។
តាមប្រភពព័ត៌មានបានឲ្យដឹងថា យុវជនម្នាក់នោះឈ្មោះ ឡន ស៊ីម អាយុ១៨ឆ្នាំ ស្នាក់នៅក្នុងក្រុមហ៊ុនខាងលើ និងមានស្រុកកំណើតនៅក្នុងស្រុកសន្ទុក ខេត្កំពង់ធំ ។ ត្រូវបានគេដឹងថា បានយកខ្សែលួសទៅចង.កជាជាមួយដំបូលបង្គន់ស្លាប់តាមបំណង ហើយភ្លាមៗនោះ កម្លាំងនគរបាលប៉ុស្ដិ៍កន្ទោក បានចុះទៅកាន់កន្លែងកើតហេតុ ។
បន្ទាប់មកបានរាយការណ៍ទៅនគរបាលបច្ចេកទេសខណ្ឌពោធិ៍សែនជ័យ ដើម្បីរាយការណ៍បន្តទៅនគរបាលបច្ចេកទេស នៃស្នងការដ្ឋាននញរបាលរាជធានីភ្នំពេញ ចុះទៅធ្វើកោសល្យវិច្ច័យ ។ ស្ត្រីម្នាក់ដែលត្រូវជាម្ដាយមីងរបស់យុវជនខាងលើបាននិយាយថា ក្មួយប្រុសរបស់គាត់ម្នាក់នេះ មានវិបត្តិស្នេហា ទើបបានជាគិតខ្លីសម្រេចចិត្តចង.កសម្លាប់ខ្លួនបែបនេះ ។
ការដែលគាត់ហ៊ានអះអាងបែបនេះ គឺព្រោះតែកាលពីថ្ងៃទី១៧ ខែកុម្ភៈ ឆ្នាំ២០១៨ ក្មួយប្រុសគាត់ម្នាក់នេះបាននិយាយទូរស័ព្ទជាមួយម្ដាយរបស់គេ ហើយគាត់ស្ដាប់ឮថា «រូបគេបានស្រឡាញ់កូនស្រីអ្នកភូមិជាមួយគ្នាខ្លាំងណាស់» ។ និងបានបង្ខំឲ្យម្ដាយចូលស្ដីដណ្ដឹងនាងធ្វើជាប្រពន្ធ ប៉ុន្តែត្រូវបានម្ដាយប្រាប់ថា «ស៊ើបសួររួចហើយ ម្ដាយខាងស្រីអត់ឲ្យទេ ព្រោះកូនគេជាប់រៀន» ។
ប្រភពដដែលបានបន្តទៀតថា ក្រោយមកគាត់មិនបានដឹងថា មានរឿងអ្វីផ្សេងទៀតនោះឡើយ ប៉ុន្តែក្រោយពេលនិយាយទូរស័ព្ទជាមួយម្ដាយចប់ ក្មួយប្រុសគាត់ម្នាក់នេះមានទឹកមុខក្រៀមក្រំខ្លាំងណាស់។ លុះដល់ពេលកើតហេតុ ស្រាប់តែដើរចូលទៅក្នុងបង្គន់រួចបានចង.កសម្លាប់ខ្លួនបែបនេះតែម្ដង ហើយគាត់មិននឹកស្មានថា រឿងស្នេហាធ្វើឲ្យក្មួយគាត់ស្លាប់បែបនេះសោះ ។
កន្លងមកក្មួយប្រុសគាត់បានស្នាក់នៅក្នុងក្រុមហ៊ុនឯកោះពេជ្យ ព្រោះនៅបុកគ្រឹះទីនោះ លុះមុនថ្ងៃចូលឆ្នាំចិនបានមកយាមនៅទីតាំងខាងលើដោយសារតែអ្នកយាមនៅទីនេះបានទៅលេងស្រុក បន្ទាប់មកក៏បានចង.កបែបនេះតែម្ដង ។
ដោយឡែកក្មេងប្រុសម្នាក់បាននិយាយថា រូបគេបានប្រទះឃើញសាកសពរបស់យុវជននេះមុនគេ ហើយនៅមុនពេលកើតហេតុខាងលើ ខណៈរូបគេកំពុងហូបបាយ បានឃើញយុវជនឈ្មោះ ឡន ស៊ីម ដើរខ្លួនក៏បានហៅឲ្យហូបបាយជាមួយ ពេលនោះបងស៊ីម ក៏បានចូលហូបបាយ និងហូបចានតែមួយជាមួយគ្នាថែមទៀតផង ។ មិនតែប៉ុណ្ណោះបងស៊ីម ហូបបាយបណ្ដើរយំបណ្ដើរ គួរឲ្យអាណិត និងមិនបានប្រាប់ពីមូលហេតុដែលគាត់យំនោះឡើយ ។ លុះក្រោយពេលហូបបាយរួច គាត់ក៏បានក្រោកដើរចេញ និងបានសុំក្រដាស់សៀវភៅពីរូបគេ១សន្លឹកទៀតផង ។ បន្ទាប់មកបានដើរទៅកាន់បង្គន់ខាងលើ រួចក៏បាត់រហូតមិនឃើញចេញមកវិញឡើយ ។
ក្មេងប្រុសដដែលបានបន្តទៀតថា ពេលនោះរូបគេបានសង្ស័យយ៉ាងខ្លាំង និងបាននឹកក្នុងចិត្តថា តិចបងស៊ីមចង.កសម្លាប់ខ្លួនទៅ រួចហើយក៏បានដើរតាមរកមើល ។ លុះពេលទៅដល់ត្រង់ចំណុចបង្គន់ខាងលើក៏បានប្រទះឃើញបងស៊ីម ចង.កស្លាប់បាត់ទៅហើយ ទើបស្រែកប្រាប់គេឯងបង្កឲ្យមានការភ្ញាក់ផ្អើលនាំគ្នារត់ទៅមើលគ្រប់ៗគ្នា ព្រមទាំងរាយការណ៍ជូននគរបាលឲ្យចុះទៅពិនិត្យមើលតែម្ដង ៕
ចែករំលែកព័តមាននេះ