ខេត្តតាកែវ ៖ ថ្ងៃទី១៦ ខែកុម្ភៈ ឆ្នាំ២០១៨ កម្លាំងជំនាញនគរបាលស្រុកត្រាំកក់ បានធ្វើការឃាត់ខ្លួនជនសង្ស័យចំនួន០៧នាក់ ក្នុងចំណោមបក្ខពួកចំនួន១០នាក់ ពាក់ព័ន្ធករណីហិង្សាដោយចេតនា មានស្ថានទម្ងន់ទោស…
ខេត្តតាកែវ ៖ ថ្ងៃទី១៦ ខែកុម្ភៈ ឆ្នាំ២០១៨ កម្លាំងជំនាញនគរបាលស្រុកត្រាំកក់ បានធ្វើការឃាត់ខ្លួនជនសង្ស័យចំនួន០៧នាក់ ក្នុងចំណោមបក្ខពួកចំនួន១០នាក់ ពាក់ព័ន្ធករណីហិង្សាដោយចេតនា មានស្ថានទម្ងន់ទោស ។
មន្ត្រីនគរបាលស្រុកត្រាំកក់ បានឱ្យដឹងថា នៅវេលាម៉ោង១០និង៣០នាទី ថ្ងៃទី១៥ ខែកុម្ភៈ ឆ្នាំ២០១៨ នៅចំណុចភូមិបុសតាផង់ ឃុំត្រពាំងក្រញ៉ូង មានករណីហិង្សាមានស្ថានទម្ងន់មួយកើតឡើង បង្កឡើងដោយជនសង្ស័យចំនួន១០នាក់ ។
ក្រុមជនសង្ស័យបានធ្វើសកម្មភាពជិះម៉ូតូប្រដាប់ដោយដាវ ដំបង ឫស្សី ដុំថ្ម បាននាំគ្នាស្ទាក់គប់ និងចាក់មកលើជនរងគ្រោះឈ្មោះ ហ.ម.ល ភេទស្រី អាយុ១៧ឆ្នាំ ជាសិស្សថ្នាក់ រស់នៅឃុំអង្គតាសោម ត្រូវមួយដាវចំឆ្អឹងជំនីខាងស្តាំធ្លាយទៅឆ្វេង ជាប់នៅទីនោះ បណ្តាលឲ្យរងរបួសធ្ងន់ បញ្ជូនទៅសង្រោះបន្ទាន់នៅមន្ទីពេទ្យកាល់ម៉ែត ភ្នំពេញ ។
ចំពោះជនសង្ស័យដែលសមត្ថកិច្ចឃាត់ខ្លួនបានចំនួន៧នាក់ មានទី១.ឈ្មោះ ណុំ សុវណ្ណដា ២.ឈ្មោះ អ៊ីម ចាន់តារា ៣.ឈ្មោះ ផុន ភារ៉ា ៤.ឈ្មោះ ឃុន ដេវីត ៥.ឈ្មោះ សុត ជា ៦.ឈ្មោះ ភាង ភា និងទី៧.ឈ្មោះ ខា មៀន ចំណែកជនសង្ស័យ៣នាក់ទៀត មានទី១.ឈ្មោះ ស៊ឹម វិសាល ២.ឈ្មោះ ម៉ីន សំណាង និងទី៣.ឈ្មោះ ទ្រី គា ហៅ កូ បានរត់គេចខ្លួនបាត់ ។ នៅចំពោះមុខនគរបាល ក្រុមជនសង្ស័យបាននិយាយសារភាពថា ពួកគេពិតជាបានវាយប្រហារគ្នានៅតាមដងផ្លូវ រួចក៏បានចាក់ច្រឡំទៅលើនារីរងគ្រោះមួយដាវពិតប្រាកដមែន ។
លោកវរសេនីយ៍ឯក សែម សុជាតិ នាយការិយាល័យព្រហ្មទណ្ឌកំរិតធ្ងន់ខេត្ត បានឲ្យដឹងថា ក្រោយពេលកើតហេតុ កម្លាំងយើងបានធ្វើការស្រាវជ្រាវដោយឃាត់ខ្លួនជនសង្ស័យចំនួន៧នាក់ ហើយរត់រួច៣នាក់ ហើយយើងក៏នៅតែមិនទាន់ដឹងច្បាស់ថា ជនដៃដល់ម្នាក់ណាដែរ តែយើងនឹងដឹងព្រោះពេលនេះជនសង្ស័យ៧នាក់នេះបានឆ្លើយទំលាក់ទៅលើជនសង្ស័យដែលរត់រួចថា ជាជនដៃដល់ តែមិនអីទេ យើងនឹងស្រាវជ្រាវរកការពិតឲ្យឃើញនរណាជាជនដៃដល់ពិតប្រាកដ ហើយនៅពេលនេះ យើងកំពុងតែសាកសួរជនសង្ស័យ រួចយើងនឹងកសាងសំណុំរឿងបញ្ជូនជនសង្ស័យ និងវត្ថុតាងទៅសាលាដំបូងខេត្តនៅរសៀលថ្ងែទី១៨ ខែកុម្ភៈ ឆ្នាំ២០១៨ កាត់ទោសទៅតាមច្បាប់ ចំណែកជនសង្ស័យដែលកំពុងគេចខ្លួន យើងនឹងតាមចាប់ខ្លួនឲ្យបាន ព្រោះដឹងមុខសញ្ញាអស់ហើយ ៕
ចែករំលែកព័តមាននេះ