ខេត្តព្រៃវែង ៖ ក្រោយពីមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង បញ្ជូនបក្សីចេញពីភូមិព្រៃផ្តៅ យកទៅធ្វើតេស្តបឋមនៅអគ្គនាយកដ្ឋានសុខភាពសត្វ និងផលិតកម្មសត្វ កាលពីប៉ុន្មានសប្តាហ៍មុននោះ លទ្ធផលបានបង្ហាញថា បក្សីនៅតំបន់ភូមិព្រៃផ្តៅ…
ខេត្តព្រៃវែង ៖ ក្រោយពីមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង បញ្ជូនបក្សីចេញពីភូមិព្រៃផ្តៅ យកទៅធ្វើតេស្តបឋមនៅអគ្គនាយកដ្ឋានសុខភាពសត្វ និងផលិតកម្មសត្វ កាលពីប៉ុន្មានសប្តាហ៍មុននោះ លទ្ធផលបានបង្ហាញថា បក្សីនៅតំបន់ភូមិព្រៃផ្តៅ ឃុំស្តៅកោង ស្រុកបារភ្នំ បានផ្ទុកនូវជំងឺផ្តាសាយបក្សី AI (H5N1) ។ ហើយភ្លាមៗនោះ គឺនៅថ្ងៃទី១៤ ខែកុម្ភៈ ឆ្នាំ២០១៨ លោក វេង សាខុន រដ្ឋមន្ត្រីក្រសួងកសិកម្ម បានចេញសេចក្តីប្រកាសទប់ស្កាត់ការធ្វើចរាចរសត្វ ចេញពីតំបន់នោះជាបន្ទាន់ផងដែរ ដើម្បីបង្ការកររីករាលដាល ។
នៅក្នុងសេចក្តីសម្រេចនោះ លោករដ្ឋមន្ត្រី បានបង្គាប់ឲ្យអគ្គនាយកដ្ឋានសុខភាពសត្វ និងផលិតកម្មសត្វ ត្រូវចាត់វិធានការបសុព្យាបាលជាបន្ទាន់ នៅក្នុងតំបន់ដែលកំពុងកើតជំងឺនេះ ដែលក្នុងនោះរួមមាន ៖ ១.បំផ្លាញចោលចំពោះបក្សីគ្រប់ប្រភេទក្នុងតំបន់ផ្ទុះជំងឺ ទៅតាមវិធានបច្ចេកទេស ។ ២.ផ្អាកបណ្តោះអាសន្នការទិញ ការលក់ និងការដឹកជញ្ជូនបក្សីគ្រប់ប្រភេទ ចូល ឬចេញ ឆ្លងកាត់ក្នុងតំបន់ផ្ទុះជំងឺចម្ងាយ៣គីឡូម៉ែត្រ នៅជុំវិញនោះ ។ ៣.ឃ្លាំមើល៣០ថ្ងៃ នឹងចុះសិក្សាជុំវិញតំបន់ផ្ទុះជំងឺក្នុងចម្ងាយ១០គីឡូម៉ែត្រ ។
លោក អ៊ុក សំណាង ប្រធានមន្ទីរកសិកម្មខេត្តព្រៃវែង បានបញ្ជាក់ប្រាប់អំពីស្ថានភាពនៅភូមិព្រៃផ្តៅ ជាទីតាំងកើតមានជំងឺនោះថា ជំងឺផ្តាសាយបក្សី ដែលកំពុងកើតឡើង នៅភូមិព្រៃផ្តៅ ខាងលើនេះ ពុំមែនជាការផ្ទុះឡើងទេ តែជាការរកឃើញតាមរយៈការបញ្ជូនសំណាកបក្សី ទៅពិនិត្យនៅអគ្គនាយកដ្ឋានដែលមន្ទីរកសិកម្មខេត្ត តែងតែធ្វើជាប្រចាំនូវរៀងរាល់១ខែម្តង ។ ហើយក្រោយពីដឹងថា មានកើតជំងឺផ្តាសាយបក្សី AI (H5N1) នៅតំបន់នោះភ្លាម លោកបានបញ្ជូនមន្ត្រីចុះទៅពិនិត្យ និងស្រាវជ្រាវភ្លាមៗ និងដាក់មន្ត្រីឲ្យប្រចាំការនៅទីនោះតែម្តង ។ ចំណែកបក្សីដែលកំពុងមានជំងឺនេះ គឺបានរកឃើញមានជាង១០០ក្បាល ហើយមន្ត្រីជំនាញ បាននឹងកំពុងចាត់វិធានការតាមច្ចេកទេស ដោយប្រមូលយកសត្វដែលមានជំងឺទៅដុតកម្ទេចចោលទាំងអស់តែម្តង ។
លោកប្រធានមន្ទីរបានបញ្ជាក់ទៀតថា ចំពោះបញ្ហានេះអាជ្ញាធរខេត្ត ក៏មានការយកចិត្តទុកដាក់ខ្ពស់ផងដែរ ដោយបារម្ភខ្លាចមានការឆ្លងរាលដាលពីបក្សីទៅមនុស្សនៅក្នុងតំបន់នោះ ពីព្រោះតាមការស្រាវជ្រាវជាក់ស្តែងជំងឺផ្តាសាយបក្សីនេះ បានកើតមានឡើងរយៈពេលជាង១ខែមកហើយ ប៉ុន្តែសំណាងល្អដែលរហូតមកដល់ពេលនេះមិនទាន់មានការឆ្លងរាលដាលជំងឺនេះ ទៅមនុស្សណាម្នាក់ឡើយ ទាំងអ្នកក្នុងតំបន់ និងក្រៅតំបន់នោះទេ ៕
ចែករំលែកព័តមាននេះ