ខេត្តកំពង់ធំ ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងនៅលើកំណាត់ផ្លូវជាតិលេខ៦ចំណុចភូមិស្រឡៅ ឃុំបល័ង្ក ស្រុកបារាយណ៍ ខេត្តកំពង់ធំ រវាងរ៉ឺម៉កម៉ូតូ និងរថយន្តម៉ាកហ៊ីយ៉ាន់ដាយចំណុះ២តោនកន្លះកាលពីវេលាម៉ោង១១ និង៣៨នាទីយប់ថ្ងៃទី២៦ មីនា ជាហេតុបណ្តាលឱ្យអ្នកជិះលើម៉ូតូកង់៣បានផ្លោងខ្ទាតចេញមកលើផ្លូវដួលដេករដូករណែលស្លាប់ចំនួន៧នាក់មានក្មេងចាស់ប្រុស ស្រី និងរងរបួសចំនួន១១នាក់ ត្រូវបានគេនាំមកសង្រ្គោះនៅមន្ទីរពេទ្យបង្អែក ស្រុកចំការលើ និងនាំបន្តមកសង្រ្គោះនៅមន្ទីរពេទ្យខេត្តកំពង់ចាម ។
តាមសេចក្តីរាយការណ៍ពីលោកសន តាល់ ប្រធាននគរបាលសណ្តាប់ធ្នាប់នៃអធិការដ្ឋាននគរបាលស្រុកបារាយណ៍បានមានប្រសាសន៍ថា នៅវត្តបារាយណ៍ជាន់ដែក ឃុំបល័ង្ក ស្រុកបារាយណ៍ ធ្វើបុណ្យបញ្ចុះសីមា ហើយមានល្ខោនបាសាក់សំដែងជូនទស្សនានៅយប់ថ្ងៃទី២៦ មីនា ធ្វើឱ្យប្រជាពលរដ្ឋគ្រប់ទិសទីនាំគ្នាទៅទស្សនាកកកុញពេញវត្ត ។ លោកប្រធាននគរបាលសណ្តាប់ធ្នាប់ស្រុកបានបន្តថា ក្នុងពេលដែលល្ខោនសំដែងមិនទាន់ចប់នៅឡើយនោះ ប្រជាពលរដ្ឋដែលមានគ្នា១៩នាក់ នាំគ្នាជិះរ៉ឺម៉កម៉ូតូកង់៣ចេញពីវត្តត្រឡប់មកផ្ទះវិញតាមផ្លូវជាតិក្នុងទិសដៅពីជើងមកត្បូង។ ស្របពេលដែលបើកឡើងផ្លូវចំណោតត្រង់ភូមិស្រឡៅទោង ឃុំបល័ង្ក ក៏បើកគេចមែកឈើដែលគេកាប់ដួលមកខាងផ្លូវ ក៏វាក់ជាមួយនឹងរថយន្តដែលបើកបញ្ច្រាសទិសគ្នាបុកពីចំហៀងរ៉ឺមកកង់៣យ៉ាងពេញទំហឹងតែម្តង ជាហេតុបណ្តាលឱ្យអ្នកជិះផ្លោងខ្ទាតចេញ ដេកដួលរដូករណែលនៅលើផ្លូវស្លាប់រហូតដល់ទៅ៧នាក់យ៉ាងអាណោចអាធម៌។ ក្រៅពីនេះ បានរងរបួសដល់ទៅ១១នាក់មានក្មេងចាស់ប្រុសស្រីត្រូវបានដឹកតាមរថយន្តមកសង្រ្គោះនៅមន្ទីរពេទ្យបង្អែកស្រុកចំការលើ ។
នារីរងគ្រោះឈ្មោះអុល ស្រីណា អាយុ២៤ឆ្នាំ រស់នៅភូមិស្រែប្រាំង ឃុំតាប្រុក ស្រុកចំការលើបានប្រាប់ថា នៅវេលាម៉ោងជាង៧យប់ថ្ងៃទី២៦ មីនា នាងនិងក្រុមសាច់ញាតិបានជិះរ៉ឺម៉កម៉ូតូកង់៣ដែលមានគ្នាជិត២០នាក់ចេញពីភូមិទៅមើលល្ខោនបាសាក់ដែលសំដែងនៅវត្តបារាយណ៍ជាន់ដែក ស្រុកបារាយណ៍ ខេត្តកំពង់ធំ ។ រហូតដល់ម៉ោងប្រហែលជា១១យប់ បាននាំគ្នាត្រឡប់មកផ្ទះវិញ ។ ស្របពេលដែលជិះមកដល់ត្រង់ចំណុចវត្តស្រឡៅទោងត្រូវរថយន្តបុកយ៉ាងពេញទំហឹងតែម្តង ជាហេតុបណ្តាលឱ្យរូបនាងផ្លោងចេញមកលើផ្លូវរងរបួសធ្ងន់ ហើយកូនដែលជិះទៅជាមួយ៣នាក់រួមមាន ១-ឈ្មោះសេក ចាន់ទី ភេទស្រី អាយុ៦ឆ្នាំ រងរបួសធ្ងន់ ២-ឈ្មោះសេក ស្រីណេ អាយុ៧ឆ្នាំស្លាប់ និងកូនប្រុសតូចអាយុ២ខួប ត្រូវបាននាងអោបជាប់នឹងដៃ សំណាងល្អរងរបួសបន្តិចបន្តួច ។
លោកអនុសេនីយ៍ឯកអ៊ិត ដារ៉ា អធិការនគរបាលស្រុកចំការលើបានប្រាប់ឱ្យដឹងដែរថា អ្នករងគ្រោះដែលស្លាប់នៅក្នុងឧប្បត្តិហេតុគ្រោះថ្នាក់ចរាចរណ៍ខាងលើរួមមាន១-ឈ្មោះអ៊ុយ រ៉េន ភេទស្រី អាយុ៤៨ឆ្នាំ ២-ឈ្មោះអ៊ុយ ណាំង ភេទស្រី អាយុ៣២ឆ្នាំ ៣-ឈ្មោះអ៊ុយ សុខណា ភេទស្រី អាយុ៣០ឆ្នាំ ៤-ឈ្មោះណៃ ណាង ភេទស្រី អាយុ៧ឆ្នាំ ៥-ឈ្មោះអុល ស្រីណាង ភេទស្រី អាយុ៧ឆ្នាំ ៦-ឈ្មោះអ៊ែល រដ្ឋា ភេទស្រី អាយុ១ខួប ៧-ឈ្មោះអ៊ែល ម៉ៃ ភេទស្រី អាយុ១២ឆ្នាំ ទាំងអស់គ្នារស់នៅភូមិស្រែប្រាំង ឃុំតាប្រុក ស្រុកចំការលើ ត្រូវបានរៀបចំយកទៅធ្វើបុណ្យតាមប្រពៃណីហើយ ។
ចំណែកគ្រូពេទ្យខេត្តបានប្រាប់ថា អ្នកដែលត្រូវបានបញ្ជូនមកសង្គ្រោះនៅមន្ទីរពេទ្យខេត្តមានចំនួន៦នាក់ តែដោយស្ថានភាពមានលក្ខណៈធ្ងន់ធ្ងរពេក៤នាក់ រួមមាន ១-ឈ្មោះប្រុស នេត ភេទស្រី អាយុ៣ឆ្នាំ ២-ឈ្មោះគីម ចាន់ណា ភេទស្រី អាយុ២៤ឆ្នាំ ៣-ឈ្មោះគីម ចាន់ណាន ភេទស្រី អាយុ១២ឆ្នាំ ៤-ឈ្មោះអុល សំអឿន ភេទប្រុស អាយុ១២ឆ្នាំ រស់នៅភូមិស្រែប្រាំង ឃុំតាប្រុក ស្រុកចំការលើទាំងអស់គ្នា ត្រូវបានបញ្ជូនបន្តទៅសង្គ្រោះនៅរាជធានីភ្នំពេញទាំងយប់ ។លោកប្រធាននគរបាលសណ្តាប់ធ្នាប់ស្រុកបារាយណ៍បានបញ្ជាក់ថា អ្នកបើកបររថយន្តបានរត់គេចខ្លួនបាត់ តែនៅក្នុងរថយន្តមានបន្សល់ប័ណ្ណបើកបរ១ ដែលសង្ស័យជារបស់អ្នកបើកបរឈ្មោះចេង សុខធន់ ភេទប្រុស អាយុ២៤ឆ្នាំ រស់នៅភូមិក្រសាំង ឃុំបារាយណ៍ ស្រុកបារាយណ៍ ខេត្តកំពង់ធំ ៕
ចែករំលែកព័តមាននេះ