រាជធានីភ្នំពេញ ៖ នៅល្ងាចថ្ងៃសៅរ៍ ទី១៧ កុម្ភៈ ស្អែកនេះ ស្ថានីយទូរទស្សន៍ប៉ុស្ដិ៍លេខ៥នៅបន្តបើកការប្រដាល់ជាលក្ខណៈអន្តរជាតិ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញកាន់តែមានការចាប់អារម្មណ៍ បន្ទាប់ពីសង្វៀននេះទើបជម្រើសបានជើងឯកក្នុងចំណោម៣២រូប ហើយបន្តបើករេញប្រកួតជ្រើសរើសជើងឯករដូវកាលថ្មី…
រាជធានីភ្នំពេញ ៖ នៅល្ងាចថ្ងៃសៅរ៍ ទី១៧ កុម្ភៈ ស្អែកនេះ ស្ថានីយទូរទស្សន៍ប៉ុស្ដិ៍លេខ៥នៅបន្តបើកការប្រដាល់ជាលក្ខណៈអន្តរជាតិ នៅក្នុងទីតាំងរបស់ខ្លួនដែលស្ថិតនៅព្រែកកំពិសម្ដុំព្រែកហូរជាយរាជធានីភ្នំពេញកាន់តែមានការចាប់អារម្មណ៍ បន្ទាប់ពីសង្វៀននេះទើបជម្រើសបានជើងឯកក្នុងចំណោម៣២រូប ហើយបន្តបើករេញប្រកួតជ្រើសរើសជើងឯករដូវកាលថ្មី ។
កីឡាករ សូត្រ ប៊ុនធី បានក្លាយជាសមាសភាពរបស់កម្ពុជាតែមួយរូបគត់ដែលនឹងប្រកួត
ជាមួយកីឡាករថៃ ខណៈដែលការប្រកួតទាំងមូលក៏មានការប្រកួតជម្រុះជើងឯកវគ្គថ្មីរវាងកីឡាករខ្លាំងៗ៤រូបសម្រាប់ការជម្រុះរដូវកាលទី២ក្នុងសប្ដាហ៍ទី៥ផងដែរ ដើម្បីបន្តស្វែងរកជើងខ្លាំងឱ្យគ្រប់១៦រូបក្នុងចំណោម៣២រូប ដើម្បីបញ្ចប់ការប្រកួតជុំទី១។
ការប្រកួតដែលនឹងចាប់ផ្ដើមធ្វើពីម៉ោង៥ ល្ងាចនៅព្រែកកំពិសនេះ មានការរំពឹងខ្ពស់មិន
ខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញស្របគ្នានៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនក្រោយមានវត្តមានសំណង់បុរីព្រោងព្រាតប្រដេញគ្នា ។ កីឡាករកម្ពុជានិងថៃ២រូប គឺសូត្រ ប៊ុនធី និងជើងខ្លាំងមកពីប្រទេសថៃឈ្មោះ Pich Thang នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។
លោក សេង កដិកា អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈជម្រុះចាញ់ធ្លាក់ៗសម្រាប់សប្ដាហ៍ទី៥ផងដែរ ទើបមានអ្នកទស្សនាភាគច្រើនយល់ថា វត្តមានរបស់កីឡាករទាំងកម្ពុជា និងថៃ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯក ពិតជាធ្វើឱ្យអ្នកស្នេហាវិស័យប្រដាល់ចាប់អារម្មណ៍។
លោកអះអាងថា បើទោះជាការប្រកួតជ្រើសរើសជើងឯកមានការចាប់អារម្មណ៍រួចជាស្រេច ក៏ប៉ុស្តិ៍លេខ៥នៅតែបានបញ្ចូលការប្រកួតជាលក្ខណៈអន្តរជាតិមួយគូៗដើម្បីឱ្យរឹតតែទាក់ទាញផងដែរ ។ វត្តមានរបស់សមាសភាពគូអន្តរជាតិ ក៏ត្រូវបានសម្រាំងយ៉ាងពិសេសផងដែរ ដើម្បីឱ្យអ្នកទស្សនាកាន់តែកន្ត្រាក់អារម្មណ៍នៅពេលកីឡាករប្រកួតគ្នា។ លោកបញ្ជាក់ថា សមាសភាពខាងកម្ពុជាសម្រាប់ការប្រកួតជាមួយថៃលោកជឿជាក់ខ្លាំងលើកីឡាករ សូត្រ ប៊ុនធី ដោយសារតែកីឡាកររូបនេះធ្លាប់បានឡើងប្រកួតនៅលើសង្វៀនអន្តរជាតិរបស់ប៉ុស្តិ៍លេខ៥ច្រើនលើកមកហើយ តែងតែធ្វើឱ្យរញ្ជួយ និងទាក់ទាញដល់អ្នកទស្សនា ។
លោកប្រកាសថា វត្តមានចុះមករបស់កីឡាករថៃ Pich Thang មានតែសូត្រ ប៊ុនធីប៉ុណ្ណោះ ដែលលោកចាត់ទុកថាមានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយ ។ លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរមុនពេលផ្គូផ្គង ទើបលោកយល់ថាសមាសភាពរបស់កីឡាករកម្ពុជារូបនេះគ្រប់គ្រាន់សម្រាប់ឱ្យប៉ុស្តិ៍លេខ៥ដាក់ឱ្យប្រកួតជាលក្ខណៈអន្តរជាតិនៅថ្ងៃសៅរ៍នេះបាន ។ លោកថា កីឡាករកម្ពុជា និងថៃសុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើនថានឹងមានអ្នកស្នេហាវិស័យប្រដាល់ជក់ចិត្តដោយសារជាបទពិសោធន៍ កីឡាករ សូត្រ ប៊ុនធី មិនសូវមានទម្លាប់ឡើងវាយលាក់ដៃស្រាប់ទៅហើយ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងសូត្រ ប៊ុនធី និងកីឡាករថៃ Pich Thang គឺលោកជឿជាក់ដោយសារកីឡាករថៃលោកស្គាល់ថ្វីដៃច្បាស់ ហើយ កីឡាករកម្ពុជាក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ។ បើទោះជាកីឡាករកម្ពុជាត្រូវប្រឈមនឹងកីឡាករថៃជាគូប្រកួត ដែលជាកីឡាករល្អ ក៏លោកនៅតែប្រកាសថា សូត្រ ប៊ុនធី មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើនផងដែរ ។ ជំនួបរវាងពួកគេលោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រៀងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង ។
លោកថា មួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាងក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ ។ ផ្ទុយទៅវិញ បើចាញ់ការប្រកួតហើយជាកីឡាករកម្ពុជាទៀត គឺមិនត្រឹមតែអាម៉ាស់ប៉ុណ្ណោះទេក៏នឹងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡា ព្រោះតែថាប្រកួតលែងកើត ឬធ្លាក់ដៃ។ យ៉ាងណាមិញ លោកថា កីឡាករកម្ពុជា ដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹងតែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ ។ លោកថា ជំនួបរបស់ពួកគេត្រូវបានដាក់យ៉ាងពិសេសសម្រាប់ថ្ងៃសៅរ៍សប្ដាហ៍នេះ តែក៏ទាមទារឱ្យប្រឹងប្រែងណាស់ដែរ គឺមិនអាចសំអាងត្រឹមថាជាកីឡាករល្បីស្រាប់ មានការគាំទ្រស្រាប់ ហើយក៏ខ្វះការប្រឹងប្រឹងនោះទេ។
លោកនៅតែចាត់ទុកថា សូត្រ ប៊ុនធី នៅល្អ និងមានការគាំទ្រនៅលើសង្វៀនប្រដាល់អន្តរជាតិ ទើបលោកជឿលើសមត្ថភាពពូកែគេច និងពូកែវាយសន្ធាប់របស់គេហើយឈានដល់ការផ្គូផ្គងឱ្យប៉ះ Pich Thang ក្នុងសប្ដាហ៍នេះ។
សម្រាប់ការប្រកួត៤នាក់ជាលក្ខណៈមិត្តភាពដែលជាការជម្រុះជើងឯកវគ្គថ្មីនៅសប្ដាហ៍ទី៥នេះវិញ លោកថានឹងមានវត្តមានសុទ្ធសឹងតែជាកីឡាករល្អៗនៅក្នុងពិភពប្រដាល់តែម្ដងប៉ះគ្នា ដោយសារក្នុងចំណោមសមាសភាពថ្មីទាំង៣២ គឺលោកបានដាក់ចម្រុះកីឡាករជើងចាស់ និងកីឡាករល្អៗ ដែលធានាថានឹងទាក់ទាញមិនចាញ់ការប្រកួតអន្តរជាតិដែលបានសម្រិតសម្រាំងឡើយ ។ លោកបញ្ជាក់ថា ការប្រកួតលើកនេះ ក៏មិនខុសពីរូបមន្តដែលធ្លាប់បានធ្វើនោះទេ គឺអ្នកឈ្នះបានឡើងវគ្គបន្ត ហើយសម្រាប់អ្នកចាញ់គឺធ្លាក់ហាលអាវ ។ លោកអះអាងថា ការប្រកួតរបស់លោក គឺមិនមានអ្នកឈ្នះក្នុងវគ្គណាមួយដោយគ្មានការប្រឹងប្រែងនោះទេ ដោយលោកបញ្ជាក់ថា អ្នកបានឡើងអង្គុយកៅអី៤នាក់បើកឆាកក្នុងវគ្គ១៦នាក់សម្រាប់សប្ដាហ៍ទី១ ទី២ និងទី៤មុននេះ បានឡើងទាំងវេទនានោះផង ។
លោកថា ការប្រកួតចាញ់ធ្លាក់ៗសុទ្ធតែទាមទារឱ្យកីឡាករម្នាក់ៗត្រៀមខ្លួនខុសពីការប្រកួតតាមរបៀបសន្សំពិន្ទុ ដោយសារតែអ្នកមិនខំប្រឹងប្រែង គឺដឹងតែធ្លាក់ហើយបាត់ឱកាស ដែលតម្រូវឱ្យអ្នកមានមុខឡើងប្រកួតត្រូវតែប្រកួតប្ដូរមិនខ្វល់ពីគ្រោះថ្នាក់ និងលាក់ថ្វីដៃ ពោលគឺធ្វើយ៉ាងម៉េចឱ្យតែឈ្នះ។
ទន្ទឹមនឹងការប្រកួតនៅទូរទស្សន៍ប៉ុស្តិ៍លេខ៥ នៅទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ ទាំងថ្ងៃសៅរ៍ និងថ្ងៃអាទិត្យ មិនខុសពីសប្ដាហ៍កន្លងទៅឡើយ ៕
ចែករំលែកព័តមាននេះ