រាជធានីភ្នំពេញ ៖ រឿង សារ័ត្ន មកពីក្លិបទ័ពពិសេសឆត្រយោង៩១១ និងមឿន សុខហ៊ុច មកពីក្លិបពុទ្ធសិរីវង្សពោធិសែនជ័យ ព្រមទាំងកីឡាករថៃ២រូបទៀតដែលមានឈ្មោះលៀមភីត ប៉េឡេបូរីរ៉ាំ…
រាជធានីភ្នំពេញ ៖ រឿង សារ័ត្ន មកពីក្លិបទ័ពពិសេសឆត្រយោង៩១១ និងមឿន សុខហ៊ុច មកពីក្លិបពុទ្ធសិរីវង្សពោធិសែនជ័យ ព្រមទាំងកីឡាករថៃ២រូបទៀតដែលមានឈ្មោះលៀមភីត ប៉េឡេបូរីរ៉ាំ និងណាំខៈបួន តូងប្រាសាទហ៊ីម ត្រូវបានគេរៀបចំឱ្យជួបប្រកួតគ្នាជាលក្ខណៈម៉ារ៉ាតុងដណ្ដើមជើងឯកក្នុងប្រភេទទម្ងន់៦៥គីឡូក្រាមនៅលើសង្វៀនទូរទស្សន៍ស៊ីអិនស៊ី នាថ្ងៃសៅរ៍ទី១៧ កុម្ភៈ ស្អែកនេះហើយ ។
អ្នកនិយមទស្សនាកីឡាប្រដាល់ភាគច្រើនកំពុងតែទន្ទឹងរង់ចាំមើលថាតើតំណែងជើងឯកនេះនឹងធ្លាក់ក្នុងកណ្ដាប់ដៃកីឡាកររូបណា ខណៈកីឡាករទាំង៤រូបនេះសុទ្ធតែមានសមត្ថភាពខ្លាំងដូចគ្នាបែបហ្នឹងនោះ។
សម្រាប់ការប្រកួតដណ្ដើមប្រាក់លានជាលក្ខណៈម៉ារ៉ាតុងនេះធ្វើឡើងចំនួន២ជុំគឺជុំទី១
ជាវគ្គជម្រុះស្វែងរកអ្នកខ្លាំង២រូបឡើងទៅប្រកួតនៅវគ្គផ្ដាច់ព្រ័ត្រ ។ ការប្រកួតនៅជុំទី១នេះមានតែ៣ទឹកប៉ុណ្ណោះក្នុង១ទឹកប្រកួត៣នាទីសម្រាក២នាទី ។ ដោយឡែកវគ្គផ្ដាច់ព្រ័ត្រមាន៥ទឹកក្នុង១ទឹកប្រកួត២នាទី សម្រាក១នាទី។
ការប្រកួតនៅវគ្គជម្រុះជុំទី១ កីឡាករកម្ពុជា រឿង សារ័ត្ន ដែលធ្លាប់ប្រកួត៨៩ដង ឈ្នះ
៦៣ដង(ផ្ដួលគូប្រកួតឱ្យសន្លប់១១ដង) ស្មើ៥ដងនិងចាញ់២៣ដង ត្រូវជួបប្រកួតជាមួយកីឡាករថៃឈ្មោះលៀមភីត ប៉េឡេបូរីរ៉ាំ ដែលធ្លាប់ប្រកួត៨០ដង ឈ្នះ៦០ដង(ផ្ដួលគូប្រកួតឱ្យសន្លប់២០) ដង ស្មើ៣ដង និងចាញ់២០ដង ។ កីឡាករថៃម្នាក់នេះ ពិតជាខ្លាំងមិនធម្មតានោះទេ បើទោះជាគេមានប្រវត្តិប្រកួតប្រដំប្រសងរឿង សារ័ត្ន មែន ប៉ុន្តែតួលេខផ្ដួលគូប្រកួតឱ្យសន្លប់នៅលើសង្វៀនមានច្រើនជាង ។ ចាំមើលរឿង សារ័ត្ន អាចឆ្លងផុតវគ្គជម្រុះនេះបានឬអត់?
ចំណែកមឿន សុខហ៊ុច ដែលធ្លាប់ប្រកួត១០៦ដង ឈ្នះ៧៧ដង(ផ្ដួលគូប្រកួតឱ្យសន្លប់
១៧ដង) ស្មើ៥ដង និងចាញ់២៤ដង ត្រូវជួបប្រកួតជាមួយកីឡាករថៃឈ្មោះណាំខៈបួន តូងប្រាសាទហ៊ីម ដែលធ្លាប់ប្រកួត១០១ដង ឈ្នះ៧៤ដង(ផ្ដួលគូប្រកួតឱ្យសន្លប់១៤ដង) ស្មើ៣ដង និងចាញ់២៤ដង ។ យោងតាមប្រវត្តិប្រកួតរបស់កីឡាករទាំង២រូបគេពិបាកប៉ាន់ស្មានពីលទ្ធផលទុកមុនណាស់ដូច្នេះមានតែរង់ចាំមើលការប្រកួតជាក់ស្ដែងប៉ុណ្ណោះអ្នកណាខ្លាំងជាងអ្នកណាគង់តែដឹងទេ ។
មួយគូទៀតប្រកួតគ្នាជាលក្ខណៈមិត្តភាពដែលតម្រូវទៅលើកីឡាករ ជ័យ ស៊ីនេត មកពីក្លិបឃ្លាំងមឿងកីឡា ប្រកួតជាមួយកីឡាករផៃ គឹមហឿត មកពីក្លិបខ្លារខិនមានរិទ្ធ ៕
ចែករំលែកព័តមាននេះ