ខេត្តស្ទឹងត្រែង ៖ ការបង្កបង្កើនផលស្រូវរបស់ប្រជាកសិករនៅខេត្តស្ទឹងត្រែង កាលពីឆ្នាំ២០១៧ មានការកើនឡើងគួរឲ្យកត់សម្គាល់ទាំងការពង្រីកផ្ទៃដី និងទិន្នផល ដែលធ្វើឲ្យពួកគាត់រីករាយសប្បាយចិត្ត ដោយសារតែអាកាសធាតុអំណោយផលល្អ ។ ទោះបីជាយ៉ាងនេះក្ដី…
ខេត្តស្ទឹងត្រែង ៖ ការបង្កបង្កើនផលស្រូវរបស់ប្រជាកសិករនៅខេត្តស្ទឹងត្រែង កាលពីឆ្នាំ២០១៧ មានការកើនឡើងគួរឲ្យកត់សម្គាល់ទាំងការពង្រីកផ្ទៃដី និងទិន្នផល ដែលធ្វើឲ្យពួកគាត់រីករាយសប្បាយចិត្ត ដោយសារតែអាកាសធាតុអំណោយផលល្អ ។ ទោះបីជាយ៉ាងនេះក្ដី ពួកគាត់បានសម្ដែងក្ដីបារម្ភចំពោះតម្លៃនៅលើទីផ្សារដែលមិនស្ថិតស្ថេរ ។
យោងតាមរបាយការណ៍បូកសរុបប្រចាំឆ្នាំ២០១៧ របស់រដ្ឋបាលសាលាខេត្តបង្ហាញថា ការពង្រីកផ្ទៃដីបង្កបង្កើនផលដំណាំស្រូវបានហក់ឡើងដល់ជាង២,៨ម៉ឺនហិកតា ស្មើ១០៤%នៃផែនការជាង២,៧ហិកតា ដែលទិន្នផលស្រូវសរុបប្រមូលបានជាង៧,១ម៉ឺនតោន គិតជាអង្ករស្មើជាង៣,៩ម៉ឺនតោន ។ ទិន្នផលនេះបានលើសតម្រូវការស្បៀងជាង១,៩ម៉ឺនតោន សម្រាប់ពលរដ្ឋសរុបជាង១៤,៣ម៉ឺននាក់ ។
របាយការណ៍បន្តថា ក្រៅពីដំណាំស្រូវ ផ្ទៃដីមួយចំនួនក៏បានពង្រីកដើម្បីកែច្នៃដាំដំណាំរួមផ្សំផងដែរដែលមានផ្ទៃដីសរុបជិត៤ពាន់ហិកតា ស្មើ១១១%នៃផែនការ៣,៥ពាន់ហិកតា និងបានហុចផលសរុបជាង៨ពាន់តោន ។
រីឯដំណាំសម្រាប់ឧស្សាហកម្ម ក៏បានអនុវត្តលើផ្ទៃដីសរុបចំនួនជិត១,៧ម៉ឺនហិកតា ស្មើ១០៣%នៃផែនការជាង១,៦ម៉ឺនហិកតា និងទិន្នផលសរុបជាង២៧,៧ម៉ឺនតោន ។
ចំណែកផ្ទៃដីដាំដំណាំកៅស៊ូសរុបស្មើជាង១,៨ម៉ឺនហិកតា ដែលមានផ្ទៃដីចៀរជ័រប្រមាណជាង២,៦ពាន់ហិកតា ក្នុងនោះដំណាំកៅស៊ូជាលក្ខណៈគ្រួសារស្មើជាង៤,៨ពាន់ហិកតា និងមានផ្ទៃដីចៀរជ័រសរុបជាង១,៥ពាន់ហិកតា ។
ទាន់ទងនឹងកំណើនផ្ទៃដីដាំដុះកសិកម្ម ហើយសម្រេចបានភោគផលដ៏ល្អនោះ ប្រជាពលរដ្ឋក៏បានសម្តែងនូវការបារម្ភផងដែរចំពោះទីផ្សារតម្លៃទិន្នផលមិនស្ថិតស្ថេរ ហើយតម្រូវការទិន្នផលពីឈ្មួញមិនទៀងទាត់ ដូចជា ផលដំណាំបង្កបង្កើនបានហើយ ប៉ុន្តែបែរជាទីផ្សារទម្លាក់តម្លៃ ឬមិនទទួលយកទៅវិញ ។
អាជ្ញាធរពាក់ព័ន្ធ ក៏បានស្វះស្វែងរកដៃគូពាណិជ្ជកម្មដែលមានទំនុកចិត្តកំណត់ទៅលើតម្លៃ ដើម្បីឆ្លើយតបនឹងតម្រូវការប្រជាពលរដ្ឋ ។
ជាមួយគ្នានេះ ខេត្តស្ទឹងត្រែងនឹងមានសកម្មភាពសេដ្ឋកិច្ចកាន់តែប្រសើរឡើង ក្នុងចំណោមខេត្តចំនួន៤ បន្ទាប់ពីរដ្ឋសភាជាតិបានសម្រេចអនុម័តលើកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍រវាងកម្ពុជា-ឡាវ និងវៀតណាម ។
ស្ទឹងត្រែង គឺជាខេត្តមួយស្ថិតនៅភូមិភាគឦសាននៃប្រទេសកម្ពុជា ដែលពលរដ្ឋ៦៩%ពឹងផ្អែកលើវិស័យកសិកម្ម និងក្រៅពីនេះ ពឹងផ្អែកលើវិស័យឧស្សាហកម្ម សេវាកម្ម និង ពាណិជ្ជកម្ម ជាដើម ដែលជាប្រភពចំណូលសេដ្ឋកិច្ចដ៏សំខាន់សម្រាប់ពលរដ្ឋក្នុងខេត្ត៕
ចែករំលែកព័តមាននេះ