រាជធានីភ្នំពេញ ៖ វត្តមាននៃភ្ញៀវទេសចរនិងវិនិយោគិនចិននៅកម្ពុជាកាលពីឆ្នាំ២០១៧ ត្រូវបានប៉ាន់ប្រមាណថា បានកើនឡើងដល់ជាង១លាននាក់ និងបានផ្ដល់ប្រយោជន៍ជាច្រើនដល់ប្រទេសជាតិ ក៏ដូចជាពលរដ្ឋក្នុងស្រុក។ ជាក់ស្ដែង គ្រាន់តែការផ្ដល់សេវាទិដ្ឋាការជូនជនជាតិចិនមកកម្ពុជា កាលពីឆ្នាំ២០១៧ ក៏អាចរកចំណូលបានជាង៣០លានដុល្លារអាមេរិកផងដែរ ។ នេះបើតាមប្រសាសន៍របស់ប្រមុខរាជរដ្ឋាភិបាលកម្ពុជា។
សម្ដេចតេជោ ហ៊ុន សែន នាយករដ្ឋមន្ត្រី ថ្លែងកន្លងមកថា ប្រទេសចិនកំពុងរីកចម្រើន និងមានការអភិវឌ្ឍខ្លាំង ហើយវត្តមានចិន មិនមែនមានតែនៅកម្ពុជានោះទេ សូម្បីតែប្រទេសវ៉េណេស៊ុយអេឡាដែលនៅកៀកនឹងអាមេរិក ក៏មានជនជាតិចិនទៅវិនិយោគទៅទីនោះដែរ ។
សម្ដេចថ្លែងបន្ដថា ៖« ជនជាតិចិនមកកម្ពុជា បានផ្ដល់ប្រយោជន៍ជាច្រើនដល់រាជរដ្ឋាភិបាល និងប្រជាជន ។ កាលពីឆ្នាំមុននេះ ជនជាតិចិនដែលមកដល់កម្ពុជាមានប្រមាណ១លាននាក់ ដូចនេះ គ្រាន់តែចំណូលដែលបានមកពីការផ្ដល់ទិដ្ឋាការ (វីសា) ជូនជាតិ ក៏បានប្រមាណ៣០លានដុល្លារអាមេរិកដែរ ហើយនៅពេលជនជាតិចិនមកដល់កម្ពុជា ក៏ត្រូវមានការចំណាយនានាទៅលើថ្លៃសេវាកម្មផ្សេងៗ ដូចជា ការស្នាក់នៅ និងហូបចុក ព្រមទាំងដំណើរកម្សាន្តទៅតំបន់រមណីយដ្ឋាននានាផងដែរ » ។
សម្ដេចបន្ថែមថា ដោយសារតែចិនមកកម្ពុជាច្រើន ហើយវិនិយោគក៏ច្រើន ទើបមានអ្នកច្រណែនចិន និងបានចោទថា ចិនមកស្រុកខ្មែរមិនល្អ ហើយក៏មានអ្នកខ្លះថា សម្ដេចទៅកៀកចិនពេកហើយ ក៏ប៉ុន្តែចិនគេបានផ្ដល់តម្លៃដល់កម្ពុជា និងមិនជ្រៀតជ្រែកកិច្ចការរបស់កម្ពុជាទេ ។ ចិនគេមកវិនិយោគ ដឹងវិនិយោគ, ទេសចរណ៍ ដឹងទេសចរណ៍ មិនដូចប្រទេសដទៃ បែរជាចង់មកប្រដៅកម្ពុជាទៅវិញ ។
ក្រសួងទេសចរណ៍កម្ពុជា ក៏បានកំណត់យកចិនជាគោលដៅទាក់ទាញទេសចរណ៍ដ៏សំខាន់មកទស្សនានៅតំបន់រមណីយដ្ឋាននានា ហើយក្រសួងក៏បានផ្សព្វផ្សាយពីវិស័យទេសចរណ៍ វប្បធម៌របស់កម្ពុជាដល់ប្រទេសចិន ដើម្បីឲ្យជនជាតិចិនមកទស្សនាកម្សាន្តកាន់តែច្រើន ។
លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងនាពេលកន្លងមកថា បច្ចុប្បន្ននេះ ចិនបានឈរនៅលំដាប់កំពូលសម្រាប់ភ្ញៀវទេសចរនៅកម្ពុជា ដូចនេះ ដើម្បីឲ្យចិនមកទស្សនានៅកម្ពុជាកាន់តែច្រើនទៀតនោះ ក្រសួងទេសចរណ៍ ដែលជាសេនាធិការរបស់រាជរដ្ឋាភិបាលកម្ពុជា ក៏បានរៀបចំត្រៀមនូវមគ្គុទេ្ទសក៍ទេសចរណ៍បន្ថែម ក្នុងនោះកម្ពុជាក៏មានអ្នកជំនាញទេសចរណ៍កាន់តែច្រើនផងដែរ ។
លោកក៏បានបន្តថា ទេសចរចិន មិនមែនមកទស្សនាតែនៅកម្ពុជាទេ ហើយក៏មិនមែនតែកម្ពុជានោះដែរ ដែលចង់បានភ្ញៀវទេសចរចិន ពោលគឺចិនបានទៅទស្សនានៅប្រទេសជាច្រើននៅក្នុងតំបន់អាស៊ាន និងក្រៅតំបន់ ។ ហើយប្រទេសទាំងនោះក៏ចង់បានភ្ញៀវទេសចរចិន ទៅទស្សនានៅក្នុងប្រទេសរបស់ពួកគេដែរ ។
គួរបញ្ជាក់ថា នៅក្នុងឆ្នាំ២០១៧ ចំនួនទេសចរចិនមកទស្សនានៅក្នុងប្រទេសកម្ពុជាបានកើនឡើងរហូតដល់ជាង១លាននាក់ ។ ដោយឡែក លំហូរវិនិយោគទុនបរទេសនៅកម្ពុជា ចិនក៏បានឈរលំដាប់កំពូល ហើយរាជរដ្ឋាភិបាលកម្ពុជាក៏កំពុងជំរុញឲ្យស្ថាប័នពាក់ព័ន្ធនានាទាក់ទាញវិនិយោគិនចិនបន្ថែមទៀតដែរ ដើម្បីមកបណ្ដាក់ទុនវិនិយោគទៅលើវិស័យនានា ។ បច្ចុប្បន្ន វិនិយោគិនចិននៅកម្ពុជា បានវិនិយោគទៅលើវិស័យសំណង់ អចលនទ្រព្យ និងកាត់ដេរ ដែលជាវិស័យស្នូលសម្រាប់ជំរុញកំណើនសេដ្ឋកិច្ចកម្ពុជា ។
ថ្លែងនៅក្នុងសន្និសីទសារព័ត៌មានមួយ កាលពីរសៀលថ្ងៃទី៧ កុម្ភៈ លោក ស្យុង បូ (Xiong Bo) ឯកអគ្គរដ្ឋទូតចិនប្រចាំកម្ពុជា បានលើកឡើងថា ប្រជាជនចិនដែលមកកម្ពុជាច្រើនជាងគេ គឺជាភ្ញៀវទេសចរ ។ កាលពីឆ្នាំ២០១៧ ភ្ញៀវទេសចរចិនប្រមាណជា១លាន២សែននាក់បានមកទស្សនានៅកម្ពុជា ហើយចំនួននេះរំពឹងថា នឹងកើនឡើងដល់២លាននាក់នៅឆ្នាំ២០២០ ។
លោក ស្យុង បូ កត់សម្គាល់ថា ៖« វត្តមានរបស់ប្រជាជនចិន និងវិនិយោគិនចិននៅកម្ពុជា គឺដើម្បីជួយជំរុញ និងចូលរួមអភិវឌ្ឍន៍វិស័យសង្គមកិច្ច និងសេដ្ឋកិច្ចរបស់កម្ពុជា» ។ ទោះបីជាយ៉ាងនេះក្ដី ក៏មានជនជាតិចិនមួយចំនួនតូចប្រព្រឹត្តល្មើសច្បាប់ព្រះរាជាណាចក្រកម្ពុជា ដែលធ្វើឲ្យប៉ះពាល់កេរ្ដិ៍ឈ្មោះជនជាតិចិនទាំងមូល ។ ស្ថានទូតចិនប្រចាំនៅកម្ពុជា ក៏បានស្នើឲ្យស្ថាប័នអនុវត្តច្បាប់នៅកម្ពុជា ចាត់វិធានការតឹងរ៉ឹងចំពោះប្រជាជនចិនដែលប្រព្រឹត្តបទល្មើសទាំងនោះ និងអំពាវនាវឲ្យប្រជាជនចិនទាំងឡាយដែលមកកម្ពុជា រក្សាភាពថ្លៃថ្នូរ និងគោរពតាមច្បាប់ព្រះរាជាណាចក្រកម្ពុជា៕
ចែករំលែកព័តមាននេះ