ខេត្តកណ្ដាល ៖ មេគោ១ក្បាលទម្ងន់ប្រហែលជាង១០០គីឡូក្រាមបានងាប់ភ្លាមៗនៅនឹងកន្លែង ដោយសារតែរថយន្តកុងតឺន័របុក ខណៈពេលដែលវាកំពុងដើរឆ្លងផ្លូវទៅរកកូនរបស់វាដែលមានទម្ងន់ប្រហែលជាង៥០គីឡូក្រាម ត្រូវបានរថយន្តមិនចាំម៉ាក១គ្រឿងបើកបុកបណ្ដាលឲ្យបាក់ជើងមុខទាំង២តែម្តង ។ ហេតុការណ៍នេះបានកើតឡើងកាលពីវេលាម៉ោង៦ព្រឹកថ្ងៃទី១៦ ខែកុម្ភៈ ឆ្នាំ២០១៨…
ខេត្តកណ្ដាល ៖ មេគោ១ក្បាលទម្ងន់ប្រហែលជាង១០០គីឡូក្រាមបានងាប់ភ្លាមៗនៅនឹងកន្លែង ដោយសារតែរថយន្តកុងតឺន័របុក ខណៈពេលដែលវាកំពុងដើរឆ្លងផ្លូវទៅរកកូនរបស់វាដែលមានទម្ងន់ប្រហែលជាង៥០គីឡូក្រាម ត្រូវបានរថយន្តមិនចាំម៉ាក១គ្រឿងបើកបុកបណ្ដាលឲ្យបាក់ជើងមុខទាំង២តែម្តង ។ ហេតុការណ៍នេះបានកើតឡើងកាលពីវេលាម៉ោង៦ព្រឹកថ្ងៃទី១៦ ខែកុម្ភៈ ឆ្នាំ២០១៨ នៅលើកំណាត់ផ្លូវជាតិលេខ៤ ត្រង់ចំណុចភូមិព្រៃទន្លាប់ ឃុំបែកចាន ស្រុកអង្គស្នួល ខេត្តកណ្ដាល។
ប្រជាពលរដ្ឋបាននិយាយថា នៅមុនពេលកើតហេតុពួកគាត់បានឃើញគោ១ហ្វូងចំនួន៦ក្បាល បានដើរស៊ីសំរាមនៅតាមផ្លូវជាតិលេខ៤ ខណៈនោះក៏ត្រូវបានរថយន្តមិនចាំម៉ាក១គ្រឿងទៅដល់បុកកូនគោឈ្មោល១ក្បាល បណ្ដាលឲ្យបាក់ជើងមុខទាំង២ ។ បន្ទាប់មករថយន្តនោះបានបើកបន្ដដំណើរទៅមុខបាត់ស្រមោល ពេលនោះពួកគាត់បានសែងកូនគោនោះទៅដាក់នៅចិញ្ចើមផ្លូវម្ខាង ។ លុះក្រោយមកមេរបស់វាឃើញកូនបែបនេះ បានរត់ឆ្លងផ្លូវពីត្បូងទៅជើងទៅរកកូនក៏ត្រូវបានរថយន្តដឹកកុងតឺន័រ១គ្រឿង បើកបរក្នុងទិសដៅពីកើតទៅលិច បណ្ដាលឲ្យបុកងាប់ភ្លាមៗនៅនឹងកន្លែង រួចហើយរថយន្តមិនបានឈប់ទេ ដោយបានបើកបន្តដំណើរទៅបាត់ ។
ដោយម្ចាស់គោទាំង២ក្បាលខាងលើនោះឈ្មោះ តឹប លឹមអ៊ី ភេទប្រុស អាយុ៥៤ឆ្នាំ មុខរបរកសិករ មានទីលំនៅក្នុងភូមិជំទាវម៉ៅ សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ ។ គាត់បាននិយាយថា គាត់មានគោចំនួន៥ក្បាល ហើយបានលែងឲ្យវាដើរស៊ីស្មៅជារៀងរាល់ថ្ងៃ រួមជាមួយគោរបស់អ្នកជិតខាង១ក្បាលទៀតផងដែរ ។ ពួកវាតែងតែវិលត្រឡប់ទៅផ្ទះវិញដោយខ្លួនឯង នៅវេលាម៉ោង៨យប់ មិនដែលខកខានឡើយ និងមិនចាំបាច់ដើរគៀង ឬដេញវាឡើយ ។ បុរសនោះបានបន្តទៀតថា ដោយឡែកនៅវេលាម៉ោង៨យប់ថ្ងៃទី១៥ ខែកុម្ភៈនេះ មិនបានឃើញពួកវាត្រឡប់ទៅផ្ទះវិញឡើយ ហើយគាត់បានតាមរករហូតដល់ជិតវិទ្យាល័យបែកចាន និងជិតកន្លែងកើតហេតុនោះដែរ ។
ប៉ុន្តែមិនបានឃើញនោះឡើយ ទើបឈប់តាមរកទៀត រួចហើយបានត្រឡប់ទៅផ្ទះវិញ ព្រោះយប់ជ្រៅទៅហើយ ។ លុះដល់ព្រឹកឡើងទើបទទួលដំណឹងថា គោរបស់គាត់ត្រូវរថយន្តបុកងាប់ និងបាក់ជើងក៏បានទៅដឹកយកត្រឡប់ទៅផ្ទះតែម្ដង និងលក់ឡាយឡុងឲ្យឈ្មួញកាប់សាច់លក់ ។ ទាក់ទិនទៅនឹងហេតុការណ៍នេះ អាជ្ញាធរតែងតែបានធ្វើការផ្សព្វផ្សាយដល់បងប្អូនប្រជាពលរដ្ឋចងគោ ឬដាក់ក្រោលឲ្យបានត្រឹមត្រូវកុំលែងចោលអនាធិបតេយ្យឲ្យសោះ នាំឲ្យមានការបាត់បង់ដោយប្រការណាមួយ ។
ជាពិសេសប៉ះពាល់សណ្ដាប់ធ្នាប់ផ្លូវសាធារណ និងរបស់ទ្រព្យអ្នកដ៏ទៃហើយថែមទាំងបង្កគ្រោះថ្នាក់ចរាចរណ៍ផងដែរ ។ ប៉ុន្តែពួកគាត់មិនព្រមស្ដាប់ឡើយទើបកន្លងកើតមានហេតុការណ៍បែបនេះ ជាបន្តបន្ទាប់មកហើយមិនមែនជាលើកទី១នោះទេ ៕
ចែករំលែកព័តមាននេះ