សហរដ្ឋអាមេរិក ៖ យុវជនម្នាក់ប្រដាប់ដោយកាំភ្លើងពាក់កណ្តាលស្វ័យប្រវត្តិមួយដើមបានបាញ់សម្លាប់មនុស្សដល់ទៅ១៧នាក់ និងយ៉ាងតិច២០នាក់រងរបួសនាថ្ងៃបុណ្យនៃក្តីស្រឡាញ់១៤ កុម្ភៈ ក្នុងវិទ្យាល័យមួយនាភាគអាគ្នេយ៍រដ្ឋផ្លរីដា សហរដ្ឋអាមេរិកមុនពេលត្រូវចាប់ខ្លួន ។ ការបាញ់ប្រហារយ៉ាងសាហាវនេះបង្កការជ្រួលច្របល់ក្នុងចំណោមសិស្សសាលាដែលនាំគ្នារត់ចូលក្នុងថ្នាក់ឬរត់គេចចេញ ។
ការបាញ់ប្រហារនេះដែលជាការបាញ់ប្រហារអាក្រក់បំផុតមួយនៅសហរដ្ឋអាមេរិកកើតមាននាថ្ងៃទី១៤ កុម្ភៈ មុនពេលបញ្ចប់ការសិក្សាប្រចាំថ្ងៃក្នុងវិទ្យាល័យ MARJORY STONEMAN DOUGLAS នៃក្រុង PARKLAND ។
ជនបាញ់ប្រហារឈ្មោះ NIKOLAUS CRUZ ជាអតីតសិស្សអាយុ១៩ឆ្នាំ ដែលត្រូវបណ្តេញចេញពីសាលាដោយសារការបំពានវិន័យ ក្រោយមកត្រូវចាប់ខ្លួននៅមូលដ្ឋានមួយក្បែរទីក្រុង CORAL SPRINGS ។ នេះជាការបញ្ជាក់របស់ប្រមុខប៉ូលិសតំបន់ BROWARD លោក SCOTT ISRAEL ។ លោកគូសបញ្ជាក់ថា អាវុធដែលឃាតករប្រើជាកាំភ្លើងវាយលុកពាក់កណ្តាលស្វ័យប្រវត្តិធុន AR-15 ដែលងាយរកទិញបាននៅសហរដ្ឋអាមេរិក ។
កើតខែកញ្ញាឆ្នាំ១៩៩៨ NIKOLAUS CRUZ បានបង្ហោះតាមបណ្តាញសង្គមនូវសារយ៉ាងអាក្រក់អាក្រីនានា ។ នាយកវិទ្យាល័យលោក ROBERT RUNCIE និងប៉ូលិសមុននេះគូសបញ្ជាក់ថាមានមនុស្សស្លាប់និងរបួសច្រើននាក់ ។ ស្នូរកាំភ្លើងត្រូវស្តាប់ឮក្នុងវីដេអូមួយប្រហែលជាថតក្នុងបន្ទប់សិក្សាមួយហើយផ្សាយតាមទូរទស្សន៍ CBS ។ បណ្តាសិស្សសាលានាំគ្នាក្រាបក្រោមតុ ។
បណ្តារូបភាពផ្សាយតាមទូរទស្សន៍ក្នុងស្រុកទាំងឡាយបង្ហាញមនុស្សជាច្រើនសិបនាក់នាំគ្នារត់ចេញពីសាលាដោយខ្លះលើកដៃឡើងលើ ហើយខ្លះទៀតយកដៃក្តោបក្បាល ។ បណ្តារថយន្តសង្គ្រោះ រថយន្តពន្លត់ភ្លើងព្រមទាំងរថយន្តប៉ូលិស ព្រមទាំងរថពាសដែកច្រើនគ្រឿងរបស់ក្រុមអន្តរាគមន៍ដាក់ពង្រាយនៅជិតវិទ្យាល័យ ។ បណ្តាជនរងគ្រោះត្រូវបញ្ជូនចេញតាមឧទ្ធម្ភាគចក្រ ។ វិទ្យាល័យកើតមានការបាញ់ប្រហារនោះក្នុងឆ្នាំ២០១៤ មានសិស្សសរុបជិត៣០០០នាក់ ។
សេតវិមានគូសបញ្ជាក់ថា ប្រធានាធិបតីលោកដូណាល់ ត្រាំ ត្រូវបានផ្តល់ជូនព័ត៌មានពីការបាញ់ប្រហារក្នុងសាលារៀននោះដោយបញ្ជាក់ថាយើងកំពុងតាមដានសភាពការណ៍ ។
សហរដ្ឋអាមេរិកជាប្រទេសរីកចម្រើនតែមួយគត់លើពិភពលោក ដែលកើតមានការបាញ់ប្រហារញឹកញាប់បំផុតក្នុងសាលារៀន ដូចជាការបាញ់ប្រហារនាថ្ងៃបុណ្យនៃក្តីស្រឡាញ់នៅរដ្ឋផ្លរីដានេះដោយក្នុងដើមឆ្នាំ២០១៨មានការបាញ់ប្រហារដល់ទៅ១៨លើករួចមកហើយ ។ លោកស្រី SHANNON WATTS ស្ថាបនិករបស់អង្គការ MOMS DEMAND ACTION FOR GUN SENSE IN AMERICA ជាអង្គការមួយដែលតស៊ូប្រឆាំងការរីកសាយអាវុធនិយាយថា នេះជាការបាញ់ប្រហារលើកទី២៩១ ក្នុងសាលារៀនអាមេរិកតាំងពីដើមឆ្នាំ២០១៣មក ៕
ចែករំលែកព័តមាននេះ