ក្រុងប៉ោយប៉ែត ៖ ជនសង្ស័យ២នាក់ ត្រូវកម្លាំងកងរាជអាវុធហត្ថក្រុងប៉ោយប៉ែត ឃាត់ខ្លួនពីបទចែកចាយថ្នាំញៀន។ ហេតុការណ៍នេះកើតឡើងកាលពីវេលារសៀលថ្ងៃទី៤ មីនា នៅភូមិបាលិលេយ្យ ក្រុងប៉ោយប៉ែត ។
តាមប្រភពពីសមត្ថកិច្ចកងរាជអាវុធហត្ថក្រុងប៉ោយប៉ែត បានឱ្យដឹងថា ជនសង្ស័យទាំង២នាក់ដែលឃាត់ខ្លួននេះ ម្នាក់ឈ្មោះហុង ហេង ភេទប្រុស អាយុ២៩ឆ្នាំ រស់នៅក្នុងភូមិបាលិលេយ្យ សង្កាត់ប៉ោយប៉ែត និងជាមុខសញ្ញាចែកចាយថ្នាំញៀន និងម្នាក់ទៀតឈ្មោះមុំ ចាន់វាសនា ភេទប្រុស អាយុ២៨ឆ្នាំ ជាបក្សពួករស់នៅភូមិនិមិត្ត៤ សង្កាត់និមិត្ត ក្រុងប៉ោយប៉ែត ។ ពួកគេទាំង២នាក់ ត្រូវសមត្ថកិច្ចចុះឃាត់ខ្លួនកាលពីរសៀលថ្ងៃទី៤ មីនា នៅក្នុងភូមិបាលិលេយ្យ ដកហូតវត្ថុតាងថ្នាំញៀនចំនួន៥គ្រាប់និងមា៉ទឹកកកពណ៌ស មួយកូនថង់តូច ។
លោកវរសេនីយ៍ត្រី ហម ម៉ុត មេបញ្ជាការកងរាជអាវុធហត្ថក្រុងប៉ោយប៉ែត បានឱ្យដឹងថា ជនសង្ស័យទាំង២នាក់រួមទាំងវត្ថុតាងដែលកម្លាំងកងរាជអាវុធហត្ថរបស់លោកបានឃាត់ខ្លួននោះ គឺធ្វើទៅតាមបទបញ្ជាថ្នាក់លើតែប៉ុណ្ណោះ ។ លោកវរសេនីយ៍ទោ ម៉ែន ភិរម្យ មេបញ្ជាការរង និងជាប្រធានមន្ទីរស្រាវជ្រាវយុត្តិធម៌កងរាជអាវុធហត្ថខេត្តបន្ទាយមានជ័យ បានឱ្យដឹងថា ចំពោះជនសង្ស័យទាំង២នាក់នោះ រួមទាំងវត្ថុតាងត្រូវកម្លាំងកងរាជអាវុធហត្ថក្រុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី ៕
ចែករំលែកព័តមាននេះ