រាជធានីភ្នំពេញ ៖ កីឡាការិនីប្រណាំងកង់កម្ពុជាពីររូបគឺហេង ស៊ីវឡាង ដណ្ដើមបានមេដាយមាស១គ្រឿង និងហេង ស៊ីវហ្គេច ដណ្ដើមបានមេដាយប្រាក់១គ្រឿងពីព្រឹត្តិ
ការណ៍ប្រកួតប្រណាំងកង់ជ្រើសរើសជើងឯកអាស៊ី Individual Time Trail Women
Master នៅប្រទេសមីយ៉ាន់ម៉ា ក្នុងចំណោមកីឡាការិនីមកពី២៤ប្រទេសចូលរួម។
កីឡាការិនីជម្រើសជាតិកម្ពុជាទាំង២រូបបានវិលត្រឡប់មកដល់មាតុប្រទេសវិញកាលពីយប់ថ្ងៃទី១២ កុម្ភៈ ដោយទទួលបាននូវការស្វាគមន៍យ៉ាងកក់ក្ដៅពីមន្ត្រីក្រសួងអប់រំ យុវជន និងកីឡា និងលោក នុត សាអាន ប្រធានសហព័ន្ធកីឡាប្រណាំងកង់កម្ពុជា នៅអាកាសយានដ្ឋានអន្តរជាតិភ្នំពេញ។
លោកឧកញ៉ាវង្ស ខាន់ពៅ អគ្គលេខាធិការសហព័ន្ធកីឡាប្រណាំងកង់កម្ពុជា បានឱ្យដឹងថា កីឡាការិនីហេង ស៊ីវឡាង ធ្លាប់បានទៅចូលរួមប្រកួតនៅប្រទេសម៉ាឡេស៊ីម្ដងរួចមកហើយកាលពីឆ្នាំមុនដែលជាការប្រកួតលក្ខណៈបើកទូលាយប្រចាំប្រទេសដោយដណ្ដើមបានមេដាយមាស១គ្រឿង ។ ដោយឡែកសម្រាប់ការប្រកួតលើកនេះមានលក្ខណៈធំជាងមុនដោយមានកីឡាការិនីរាប់រយនាក់មកពីបណ្ដាប្រទេសចំនួន២៤នៅលើពិភពលោកចូលរួម។
លោកបន្តថា ការប្រកួតនេះមានការបែងចែកទៅតាមកម្រិតអាយុនិងជំនាញ គឺអាយុក្រោម១៨ឆ្នាំ អាយុក្រោម២៣ឆ្នាំ និងអាយុ៣៥ឆ្នាំឡើងសម្រាប់វិញ្ញាសាជំនាញចម្ងាយ២២គីឡូម៉ែត្រ ។ ចំណែកកីឡាការិនីជម្រើសជាតិកម្ពុជាទាំងពីររូបនេះប្រកួតក្នុងប្រភេទអាយុ៣៥ឆ្នាំឡើងដែលពុំមានកីឡាការិនីប្រទេសណាមានសមត្ថភាពលើកីឡាការិនីកម្ពុជាបានឡើយ។
កីឡាការិនីហេង ស៊ីវឡាង បានឱ្យដឹងថា នេះជាលើកទី១ហើយនៅក្នុងអាជីពកីឡាប្រណាំងកង់ដែលអ្នកស្រីឈ្នះមេដាយមាសពីការប្រកួតនៅក្នុងព្រឹត្តិការណ៍ដ៏ធំបែបនេះ ហើយក៏ជាលើកទី២ផងដែរដែលអ្នកស្រីឈ្នះមេដាយមាសពីការប្រកួតអន្តរជាតិនៅក្រៅប្រទេស ។ ម្ចាស់មេដាយមាសកីឡាប្រណាំងកង់រូបនេះបន្តថា មូលហេតុដែលនាំឱ្យអ្នកស្រីដណ្ដើមបានជ័យជម្នះបែបនេះ ដោយសារតែសមត្ថភាពមានការកើនឡើងជាងមុន ម្យ៉ាងអាចមកពីការប្រកួតប្រភេទអាយុក៏ថាបានដែរ ។ ប៉ុន្តែបើតាមការអះអាងពីមន្ត្រីសហព័ន្ធកីឡាប្រណាំងកង់កម្ពុជាថា ជារៀងរាល់ថ្ងៃបើទោះជាមិនបានចេញទៅប្រកួត ក៏អ្នកស្រីនៅតែខិតខំប្រឹងប្រែងហ្វឹកហាត់យ៉ាងយកចិត្តទុកដាក់បំផុតដែរ ។ ដូច្នេះលទ្ធផលល្អនាពេលនេះមិនមែនបានមកដោយចៃដន្យនោះទេ។
គួររំលឹកផងដែរថា ព្រឹត្តិការណ៍ប្រណាំងកង់ជាលក្ខណៈអន្តរជាតិនៅប្រទេសមីយ៉ាន់ម៉ានេះសហព័ន្ធកីឡាប្រណាំងកង់កម្ពុជា បានបញ្ជូនប្រតិភូកីឡាទៅចូលរួមប្រកួតចំនួន៦នាក់ក្នុងនោះកីឡាករ៣នាក់ កីឡាការិនី២នាក់ និងគ្រូបង្ហាត់១នាក់៕
ចែករំលែកព័តមាននេះ