ទីក្រុងញូវយ៉ក ៖ អ្នកស្រាវជ្រាវបាននិយាយកាលពីថ្ងៃចន្ទកន្លងមកថា ចំនួនយុវជនប្រើប្រាស់ហ្វេសប៊ុកនៅសហរដ្ឋអាមេរិកកំពុងតែធ្លាក់ចុះ ហើយចំនួនឪពុកម្តាយ និងពលរដ្ឋវ័យចំណាស់ប្រើប្រាស់បណ្តាញសង្គមនេះកើនឡើង ។
តាមរបាយការណ៍របស់ក្រុមហ៊ុនស្រាវជ្រាវទីផ្សារeMarketer ដែលមានមូលដ្ឋាននៅញូវយ៉ក បាននិយាយថា Snapchat កំពុងតែទាក់ទាញអ្នកប្រើប្រាស់ហ្វេសប៊ុកក្នុងល្បឿនលឿនជាង Instagram ទៅទៀត ។
យោងតាមក្រុមហ៊ុនស្រាវជ្រាវនេះថា ហ្វេសប៊ុកនៅតែលូតលាស់ក្នុងទីផ្សារអាមេរិក ដែលភាគច្រើនមកពីចំនួនអ្នកប្រើប្រាស់មានវ័យចំណាស់កើនឡើង ។
ពួកគេគិតថា ចំនួនអ្នកប្រើប្រាស់ហ្វេសប៊ុកដែលមានអាយុពី១៨ដល់២៤ឆ្នាំ នឹងធ្លាក់ចុះ៥,៨%ក្នុងឆ្នាំនេះ ។ ជាមួយគ្នានេះ ចំនួនអ្នកប្រើប្រាស់មានអាយុពី១២ដល់១៧ឆ្នាំ នឹងធ្លាក់ចុះ៥,៦%នៅសហរដ្ឋអាមេរិក ហើយចំនួនអ្នកប្រើប្រាស់មានអាយុទាបជាង១២ឆ្នាំ នឹងធ្លាក់ចុះ៩,៣%ក្នុងឆ្នាំនេះ ។
របាយការណ៍ខាងលើបន្ថែមថា និន្នាការនេះនឹងបន្តរហូតដល់ឆ្នាំ២០១៩ និង២០២០ ដោយចំនួនអ្នកប្រើប្រាស់ដែលមានអាយុទាបជាង២៥ឆ្នាំ នឹងធ្លាក់ចុះទាំងអស់ ។
ហ្វេសប៊ុកនឹងបាត់បង់អ្នកប្រើប្រាស់អាយុក្រោម២៥ឆ្នាំ ប្រមាណ២លាននាក់នៅឆ្នាំនេះ ខណៈ Snapchat និង Instagram ទាក់ទាញអ្នកប្រើប្រាស់បានច្រើន ។
របាយការណ៍បង្ហាញទៀតថា ចំនួនអ្នកប្រើប្រាស់ Snapchat អាយុក្រោម២៥ឆ្នាំ នឹងកើនឡើង១,៩លាននាក់ ខណៈចំនួននេះនឹងកើនឡើង១,៦លាននាក់សម្រាប់ Instagram ក្នុងឆ្នាំ២០១៨ ។
ទោះជាយ៉ាងណា eMarketer ថា ហ្វេសប៊ុកបន្តជាបណ្តាញសង្គមមានប្រជាប្រិយភាពជាងគេនៅសហរដ្ឋអាមេរិក ដែលមានអ្នកប្រើប្រាស់ប្រមាណ១៦៩,៥លាននាក់ក្នុងឆ្នាំនេះ ។
ប៉ុន្តែពួកគេព្យាករថា ពលរដ្ឋអាមេរិកដែលប្រើប្រាស់ Instagram នឹងកើនដល់១០៤,៧លាននាក់ ចំណែកអ្នកប្រើប្រាស់ Snapchat នឹងកើនដល់៨៦,៥លាននាក់ផងដែរ ៕
ចែករំលែកព័តមាននេះ