នៅក្នុងកម្មវិធីបង្ហាញពីបច្ចេកវិទ្យាអេឡិចត្រូនិកឆ្នាំ២០១៨ នៅឯរដ្ឋ Las Vegas កន្លងមកនេះ គេឃើញមានការបង្កើតនូវពោងសុវត្ថិភាពទម្រង់ថ្មីសម្រាប់ពាក់នៅជាប់ចង្កេះ ពេលជិះម៉ូតូ ជិះស្គី ឬជិះសេះ ។…
នៅក្នុងកម្មវិធីបង្ហាញពីបច្ចេកវិទ្យាអេឡិចត្រូនិកឆ្នាំ២០១៨ នៅឯរដ្ឋ Las Vegas កន្លងមកនេះ គេឃើញមានការបង្កើតនូវពោងសុវត្ថិភាពទម្រង់ថ្មីសម្រាប់ពាក់នៅជាប់ចង្កេះ ពេលជិះម៉ូតូ ជិះស្គី ឬជិះសេះ ។ វាមានលក្ខណៈដូចនឹងពោងសុវត្ថិភាពរបស់រថយន្តដែរ គ្រាន់តែតូច ហើយអាចពាក់ជាប់នឹងចង្កេះបាន ។
ពោងសុវត្ថិភាពថ្មីនេះ ត្រូវបានផលិតឡើងដោយក្រុមហ៊ុនបារាំង Helite ក្នុងគោលបំណងការពារអាយុជីវិតរបស់មនុស្សចាស់ ព្រោះថា មនុស្សចាស់អាចប្រឈមមុខនឹងការបាក់ឆ្អឹងត្រគាក ពេលមានការប៉ះទង្គិចតិចតួចជាងមនុស្សធម្មតា ។
នៅពេលក្រឡេកមើលភ្លាម វាមានសភាពដូចនឹងកាបូបដាក់នៅចង្កេះ ។ ក្រុមហ៊ុនប្រាប់ថា ការរចនាម៉ូដបែបនេះ គឺដើម្បីផាសុកភាព សាមញ្ញ ការពារខ្ពស់ និងមានចលនា ។
ទោះបីជាវាសាមញ្ញក៏ដោយ តែវាពិតជាមានលក្ខណៈពិសេស ។ វាមានសេនស័រតាមដានចលនារបស់មនុស្សដល់ទៅ១.០០០ដងក្នុង១វិនាទី ។ វាអាចដឹងថា មនុស្សនឹងរអិលដួលអុកគូទ ហើយក៏ផ្ទុះចេញពោងខ្យល់មកជួយសង្គ្រោះ។ ពោងផ្ទុះចេញមកនោះប្រើពេលត្រឹមតែ០,៣វិនាទីប៉ុណ្ណោះ ។
វាមិនចាំបាច់ឲ្យអ្នកប្រើប្រាស់ចុចប៊ូតុង ដើម្បីផ្ទុះពោងមកទេ គឺគ្រាន់តែមានប៊ូតុងបើក-បិទ និងប្រព័ន្ធសុវត្ថិភាពប៉ុណ្ណោះ ។ អ្នកប្រើប្រាស់អាចចុចបើកវា នៅពេលគិតថា ទង្វើដែលពួកគេធ្វើមានគ្រោះថ្នាក់អាចប្រឈមនឹងការរអិលដួល ឬប៉ះទង្គិច ។
វាមិនដូចពោងសុវត្ថិភាពរបស់រថយន្តទេ គឺថង់របស់វាអាចប្រើម្តងទៀតបាន ក្រោយពេលផ្ទុះពោងចេញមក ។ ដូច្នេះ អតិថិជនមិនចាំបាច់ទិញខ្សែក្រវាត់ជំនួសទេ បន្ទាប់ពីដួលម្តងហើយ។ លើសពីនេះ ខ្សែក្រវាត់ក៏អាចសម្ងួតបានដែរ ហើយថ្មអាចសាកម្តងប្រើបាន៧ថ្ងៃ ៕
ចែករំលែកព័តមាននេះ