សាធារណជនហួសចិត្តជាខ្លាំង ធ្លាយរឿងប្តឹងប្រពន្ធនិងបងថ្លៃដាក់គុក
- ភ្នំពេញ
រាជធានីភ្នំពេញ ៖ យោងតាមប្រភពព័ត៌មានពីសាច់ញាតិនាង ទូច រស្មី ហៅម៉ី ដែលអះអាងថា ជាភរិយារបស់លោក ជា សំអាន…
រាជធានីភ្នំពេញ ៖ យោងតាមប្រភពព័ត៌មានពីសាច់ញាតិនាង ទូច រស្មី ហៅម៉ី ដែលអះអាងថា ជាភរិយារបស់លោក ជា សំអាន ប្រធានមន្ទីរពហុព្យាបាលវិសាលសុខ បានឱ្យដឹងបន្ថែមថា នាង ទូច រស្មី មានអាយុ៣៣ឆ្នាំ និងមានបងប្អូន៣នាក់ គឺបងស្រីម្នាក់ និងបងប្រុសម្នាក់ឈ្មោះ ទូច សុធា ។
នាង ទូច រស្មី ជាស្ត្រីមេម៉ាយមានកូន២នាក់ កាលពីមិនទាន់បានលោក ជា សំអាន ជាប្តី លុះពេលបានលោកជា សំអាន ក៏បានកូនម្នាក់ទៀត ពោលគឺសព្វថ្ងៃនាង ទូច រស្មី មានកូន៣នាក់ ហើយនាងនិងបងប្អូនជាកូនកំព្រាគ្មានឪពុកម្តាយទីពឹងទេ ។
ប្រភពព័ត៌មានបានឱ្យដឹងទៀតថា កាលនាងនៅជាស្រី្តមេម៉ាយ នាងចូលចិត្តលេងតាំងហ្គោ ដែលជាប្រព័ន្ធប្រើក្នុងទូរស័ព្ទដូចហ្វេសប៊ុក បច្ចុប្បន្ននេះដែរ តាមរយៈសារអេឡិចត្រូនិក ។ ដោយសារតែការលេងតាំងហ្គោនោះហើយ ទើបក្នុងអំឡុងឆ្នាំ២០១៤ ក៏បានជួបបុរសម្នាក់គឺលោក ជា សំអាន ប្រធានមន្ទីរព្យាបាលវិសាលសុខ និងតែងតែទាក់ទងសាសងគ្នារាល់រាត្រី។ រហូតដល់ឆ្នាំ២០១៦ ក៏ផ្តើមចេញរូបរាងជាទំនាក់ទំនងស្នេហាគ្នាជិតស្និទ្ធ ហើយនាងចេះតែរៀបរាប់ប្រាប់លោក ជា សំអាន ថា នាងចង់បើកកន្លែងរកស៊ីលក់ដូរមួយសមរម្យ ដើម្បីបានប្រាក់ចិញ្ចឹមកូន ។
ពេលនោះ លោក ជា សំអាន ក៏មានការអាណិតអាសូរ និងបានដាក់ចិត្តព្រមព្រៀងស្រឡាញ់ជាប្តីប្រពន្ធ តែមិនបានរៀបការពេញច្បាប់ទេ ។ លោក ជា សំអាន បានផ្តល់លុយកាក់ឲ្យនាង ទូច រស្មី ជួលផ្ទះបើកហាងលក់ទឹកដោះគោស្រស់ ដែលមានទីតាំងនៅក្នុងបុរីសេវិនវីឡា ស្ថិតក្នុងសង្កាត់ទឹកថ្លា ខណ្ឌសែនសុខ(កន្លែងកើតហេតុនោះ) ។ ការបើកហាងលក់ទឹកដោះគោស្រស់នោះ លោក ជា សំអាន បានឲ្យបងប្រុសនាង ទូច រស្មី គឺឈ្មោះ ទូច សុធា ស្នាក់នៅបន្ទប់មួយ និងជួយមើលការខុសត្រូវដែរ ហើយលោក ជា សំអាន ក៏ចេញចូលរស់នៅជាមួយនាងដូចប្តីប្រពន្ធស្របច្បាប់ទៅហើយ ។ ការរស់នៅជាមួយគ្នាតាំងពីអំឡុង
ឆ្នាំ២០១៦ រហូតមកនាង ទូច រស្មី ក៏បង្កើតបានកូនម្នាក់ជាមួយលោក ជា សំអាន។ ប៉ុន្តែក្នុងរយៈពេល១ឆ្នាំចុងក្រោយនេះ ចំណងស្នេហ៍ឥតខាន់ស្លានេះចេះតែមានភាពរកាំរកូស និងឈ្លោះគ្នាជាញឹកញាប់ គ្រាន់តែមិនក្លាយជារឿងធំដុំ ។
លុះនៅរសៀលថ្ងៃទី៩ ខែកុម្ភៈ នាង ទូច រស្មី មកពីក្រៅដល់ផ្ទះ (ហាង) ស្រាប់តែឃើញប្តីរបស់នាងនៅក្នុងបន្ទប់ជាមួយស្រីក្មេងម្នាក់ ដែលនាងមិនបានស្គាល់ឈ្មោះទេ ប៉ុន្តែមានគេស្គាល់ថា ស្រី្តម្នាក់នោះឈ្មោះ ស្រីរ័ត្ន ជាពិធីការិនី ។ ខណៈប្រពន្ធឃើញប្តីយកស្រីមកដេកដល់ក្នុងបន្ទប់ដូច្នោះ ក៏កើតជាជម្លោះរវាងប្តី-ប្រពន្ធ ហើយពេលនោះស្រីរ័ត្ន បានរំដោះខ្លួនចេញបាត់ទៅអត់ហ៊ាននៅតតាំងទេ ។
ពាក្យពេចន៍ដែលសាច់ញាតិនាង ទូច រស្មី រៀបរាប់នេះ គឺពួកគាត់បានមកពីសម្តីផ្ទាល់មាត់របស់នាង ទូច រស្មី ឆ្លើយបំភ្លឺនៅចំពោះមុខតុលាការ ដែលមានមេធាវីការពារក្តីអង្គុយស្តាប់ផងដែរ ។ ពេលនាងឈ្លោះគ្នាជាមួយប្តី ដំបូងប្តីនាងឆ្លើយបដិសេធថា នេះមិនមែនជាស្រីយកមកដេករួមភេទជាមួយគ្នាទេ គឺជាស្ត្រីម៉ាស្សា ដែលគាត់ហៅមកឲ្យធ្វើសរសៃឲ្យ ។ ទោះជាយ៉ាងណា ប្តីប្រពន្ធនេះបានទាស់សម្តីគ្នាកាន់តែខ្លាំងឡើង និងស្រែកឡូឡាប្រវាយប្រតប់គ្នាពេញផ្ទះ ។
ពេលនោះលោក ទូច សុធា ដែលជាបងបង្កើតនាង ទូច រស្មី ឮ ក៏ចេញពីបន្ទប់ ហើយឃើញដូច្នោះ ក៏ស្ទុះទៅឃាត់អ្នកទាំងពីរ និងបានទៅចាប់លោក ជា សំអាន ការពារខ្លាចប្រើហិង្សាធ្ងន់ធ្ងរណាមួយទៅលើប្អូនស្រីរបស់ខ្លួន ។ ស្របពេលលោក ទូច សុធា ចាប់ដៃលោក ជា សំអាន ជាប់ នាង ទូច រស្មី ក៏ស្ទុះទៅទាញបាន
កាតូទឹកជ័រ ឬហៅបោយសម្រាប់ស្រោចផ្កា យកទៅវាយក្បាលប្តីពីរ បីប៉ូក បណ្តាលឲ្យបែកហូរឈាមដេរបីបួនថ្នេរ ។
មហាជនដែលបានតាមដានរឿងក្តីបែកក្បាលនេះ បាននាំគ្នាចាត់ទុកថា រឿងប្រពន្ធយកកាតូទឹកជ័រ វាយក្បាលប្តីបែកឈាមក្បាលបន្តិចបន្តួច ខណៈទាន់ប្តីកំពុងយកស្រីមកដេកក្នុងផ្ទះនោះ មិនមែនជារឿងធ្ងន់ធ្ងរទេ ហើយក៏មិនគួរប្តឹងឱ្យប្រពន្ធនិងបងថ្លៃជាប់គុកដែរ ។ ប៉ុន្តែដោយសារលោក ជា សំអាន ខ្មាសគេ និងអាងមន្ត្រីធំម្នាក់ ជួយអន្តរាគមន៍ពីក្រោយ ដែលមិនខុសពីពាក្យថា «ឆ្នាំងមិនក្តៅ បែរជាក្តៅគម្រប» ទើបបានជារឿងនេះ ធ្វើឲ្យលោក ជា សំអាន ឆេះដុំ និងបានទៅដាក់ពាក្យបណ្តឹងនៅកងរាជធាវុធហត្ថរាជធានីភ្នំពេញ ឲ្យចាប់ប្រពន្ធ និងបងថ្លៃ នាំយកទៅចាត់ការតាមផ្លូវច្បាប់ ។
ថ្ងៃទី១៣ ខែកុម្ភៈ កងរាជអាវុធហត្ថបានបញ្ជូននាង ទូច រស្មី និង លោក ទូច សុធា ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការសាកសួរ និងធ្វើការចោទប្រកាន់ជាផ្លូវការ ។ នៅសាលាដំបូង គេឃើញសាច់ញាតិនាង ទូច រស្មី តាមទៅមើលចំណាត់ការរបស់តុលាការដែរ ចង់ដឹងពីទោសប្រពន្ធយកកាតូទឹកវាយប្តីឈាមតិចតួច ខណៈប្តីយកស្រីមកដេកក្នុងបន្ទប់ វាទៅជាយ៉ាងម៉េចដែរ ?
ទីបំផុត តំណាងអយ្យការបានធ្វើការចោទប្រកាន់នាង ទូច រស្មី និង លោក ទូច សុធា ពីបទហិង្សាដោយចេតនាមានស្ថានទម្ងន់ទោស តាមមាត្រ២១៨នៃក្រមព្រហ្មទណ្ឌ ។ បន្ទាប់មកសំណុំរឿងនេះ បានចាត់បញ្ជូនទៅចៅក្រមស៊ើបសួរ ហើយនៅរសៀលថ្ងៃដដែល ចៅក្រមស៊ើបសួរបានសម្រេចចេញដីកាឃុំខ្លួន២នាក់បងប្អូននេះ ដាក់ពន្ធនាគារជាបណ្តោះអាសន្ន ។
មានការកត់សម្គាល់ថា ពេលសមត្ថកិច្ចបញ្ជូននាង ទូច រស្មី និងបងប្រុសទៅកាន់សាលាដំបូងរាជធានីភ្នំពេញ ក្រុមគ្រួសារបាននាំយកកូនស្រីម្នាក់អាយុប្រមាណ៣ឆ្នាំ ដែលនាងមានជំងឺគ្រុនផ្តាសាយឲ្យទៅជួបម្តាយ មុនពេលម្តាយត្រូវបានបញ្ជូនទៅពន្ធនាគារ ។ ប៉ុន្តែមានការអះអាងថា កូនស្រីម្នាក់នេះ មិនមែនជា
កូនលោក ជា សំអាន ទេ គឺកូនប្តីមុន ឯកូនជាមួយលោក ជា សំអាន តូចជាងនេះ ។ អ្នកច្បាប់បានលើកឡើងថា ទោសនាងទូច រស្មី យកកាតូទឹកជ័រវាយក្បាលប្តីនៅពេលទាន់ប្តីនាំស្រីមកដេកក្នុងបន្ទប់ មិនគួរឃុំខ្លួននាងទេ ប្រសិនបើ៣ប៉័ងតោវិញយកទៅឃុំ អាចគ្មានអ្នកណាជួយឈឺឆ្អាលឡើយ។
ម្យ៉ាងទៀត ពេលឃុំខ្លួនស្ត្រីជាម្តាយ ដែលមានកូនតូចដល់ទៅ៣នាក់ សួរថា តើបន្ទុកចិញ្ចឹមបីបាច់ថែរក្សាកូននោះ អ្នកណាទទួលខុសត្រូវ បើនាង ជាកូនកំព្រាគ្មានឪពុកម្តាយផង ។ អ្នកច្បាប់លើកឡើងទៀតថា ចំណែកលោក ទូច សុធា ជាបងប្រុសបង្កើត និងជាបងថ្លៃលោក ជា សំអាន ដែរ ហើយគ្រាន់តែបានទៅឃាត់និងចាប់ដៃលោក ជា សំអាន កុំឲ្យកើតមានអំពើហិង្សាលើប្តីប្រពន្ធធ្ងន់ធ្ងរ រឿងអីត្រូវចោទប្រកាន់ និងឃុំខ្លួនលោក ទូច សុធា ដែរ ។ ចំណុចខាងលើនេះ អ្នកច្បាប់ចង់និយាយថា គួរតែតុលាការក្រឡេកមើលអង្គហេតុ និងអង្គច្បាប់ឡើងវិញផង កុំចេះតែឃុំតាមខ្យល់បក់បោក វាធ្វើឲ្យប៉ះពាល់ដល់សិទ្ធិអ្នកដទៃ និងកិត្តិ
យសតុលាការដែរ ។
ព័ត៌មានទាំងអស់នេះ ភ្នាក់ងារកោះសន្តិភាព ទទួលបានតែពីភាគីចុងចោទ ដែលបានបំភ្លឺប៉ុណ្ណោះ ចំណែកដើមបណ្តឹងមិនអាចទាក់ទងបានទេ ៕
ចែករំលែកព័តមាននេះ