រាជធានីភ្នំពេញ ៖ តំណាងអយ្យការអមសាលាដំបូងរាជធានី កាលពីព្រឹកថ្ងៃទី១៣ កុម្ភៈ បានសម្រេច ចោទប្រកាន់ស្ត្រីម្នាក់ ដែលអះអាងថា ជាភរិយាលោកប្រធានមន្ទីរពហុព្យាបាលវិសាលសុខ និងបុរសជាបងពីបទប្រើហិង្សា…
រាជធានីភ្នំពេញ ៖ តំណាងអយ្យការអមសាលាដំបូងរាជធានី កាលពីព្រឹកថ្ងៃទី១៣ កុម្ភៈ បានសម្រេច
ចោទប្រកាន់ស្ត្រីម្នាក់ ដែលអះអាងថា ជាភរិយាលោកប្រធានមន្ទីរពហុព្យាបាលវិសាលសុខ និងបុរសជាបងពីបទប្រើហិង្សា ដោយចេតនាមានស្ថានទម្ងន់ទោស យោងតាមមាត្រា២១៨ នៃក្រមព្រហ្មទណ្ឌ ។
ជនជាប់ចោទឈ្មោះ ទូច រស្មី ហៅម៉ី ភេទស្រី អាយុ៣៣ឆ្នាំ អះអាងថា ជាភរិយាលោក ជា សំអាន ប្រធានមន្ទីរព្យាបាលវិសាលសុខ ស្នាក់នៅផ្ទះលេខ១០៣៥ បុរីសេវិនវីឡា ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ និងម្នាក់ទៀតឈ្មោះ ទូច សុធា ហៅតុង ភេទប្រុស អាយុ៣៥ឆ្នាំ ត្រូវជាបងប្រុសរបស់នាង ទូច រស្មី ។
ប្រភពព័ត៌មានពីសាលាដំបូងរាជធានីភ្នំពេញឱ្យដឹងថា កាលពីវេលាម៉ោង៥ល្ងាចថ្ងៃទី៩ ខែកុម្ភៈ ស្ត្រីឈ្មោះ ទូច រស្មី បានមកដល់ផ្ទះរបស់ខ្លួននៅបុរីសេវិនវីឡា ស្រាប់តែឃើញប្ដីរបស់ខ្លួន គឺលោក ជា សំអាន នៅក្នុងបន្ទប់ដេកជាមួយស្រីក្មេងម្នាក់ ដែលមិនស្គាល់ឈ្មោះ ។ ពេលនោះ នាង ទូច រស្មី ក៏សួរនាំប្ដីថា ស្រីក្មេងនេះមកពីណាបានជាមករួមរ័កគ្នាដល់ក្នុងផ្ទះ? ការជជែកគ្នានោះ បានឈានដល់ការប្រវាយប្រតប់គ្នា និងស្រែកឡូឡាពេញផ្ទះ ក៏ឮដល់ឈ្មោះ ទូច សុធា ដែលនៅក្នុងបន្ទប់ផ្សេង ។
ពេលឮសំឡេងប្តីប្រពន្ធឈ្លោះគ្នា ឈ្មោះ ទូច សុធា បានស្ទុះមកចាប់ដៃកុំឲ្យលោក ជា សំអាន វាយប្រពន្ធដែលជាប្អូនស្រីរបស់ខ្លួន ដោយសារតែប្រពន្ធសួរនាំរឿងយកស្រីក្មេងមកដេកដល់ក្នុងផ្ទះ ។ ឆ្លៀតពេលឃើញបងប្រុសចាប់ដៃប្ដីជាប់ នាង ទូច រស្មី បានស្ទុះទៅយកកាតូទឹកជ័រមកវាយក្បាលលោកជា សំអាន ពីរបីប៉ូកបណ្ដាលឲ្យបែកហូរឈាម។ ក្រោយពីមានករណីនេះ កើតឡើង លោក ជា សំអាន ក៏បានប្ដឹងទៅកងរាជអាវុធហត្ថឲ្យឃាត់ខ្លួនប្រពន្ធ និងបងថ្លៃកសាងសំណុំរឿងចាត់ការតាមផ្លូវច្បាប់ ។
នេះគ្រាន់តែជាព័ត៌មានដែលទទួលបានពីសាលាដំបូងរាជធានីភ្នំពេញ ចំណែកដើមចោទកោះសន្តិភាពមិនអាចទាក់ទងបានទេ ។ ទោះយ៉ាងណាក្តី ជនសង្ស័យទាំង២នាក់បងប្អូន ត្រូវបានចៅក្រមសើុបសួរ និងសម្រេចឃុំខ្លួនដាក់ពន្ធនាគារជាបណ្តោះអាសន្ន តាមការស្នើពីតំណាងអយ្យការ ។
ចែករំលែកព័តមាននេះ