រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា មានយានដ្ឋានជួលជុលរថយន្តនៅភ្នំពេញ មានជាង៨០០កន្លែង ដែលអាជ្ញាធរមូលដ្ឋានកំពុងតែឃ្លាំមើល ប្រសិនបើរកឃើញថា មានយានដ្ឋានណា ដែលនៅតែបន្តអាជីវកម្មលួចតទ្រុងទៀតនោះ…
រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា មានយានដ្ឋានជួលជុលរថយន្តនៅភ្នំពេញ មានជាង៨០០កន្លែង ដែលអាជ្ញាធរមូលដ្ឋានកំពុងតែឃ្លាំមើល ប្រសិនបើរកឃើញថា មានយានដ្ឋានណា ដែលនៅតែបន្តអាជីវកម្មលួចតទ្រុងទៀតនោះ អាជ្ញាធររាជធានីនឹងបិទអាជីវកម្មតែម្តង។ វិធានការនេះ ត្រូវបានលោក ឃួង ស្រេង អភិបាលរាជធានីភ្នំពេញ លើកឡើងនៅក្នុងកិច្ចប្រជុំគណៈ បញ្ជាការឯកភាព រាជធានីភ្នំពេញ នាព្រឹកថ្ងៃទី១៤ កុម្ភៈ ២០១៨។ លោក ម៉េត មាសភក្តី អ្នកនាំពាក្យរដ្ឋបាល រាជធានីភ្នំពេញ បានឲ្យដឹងក្រោយកិច្ចប្រជុំនេះថា ក្នុងកិច្ចប្រជុំនេះ លោកអភិបាលរាជធានី បានដាក់ ចេញជាវិធានការយ៉ាងច្រើន ក្នុងនោះពាក់ព័ន្ធនឹងករណីកាត់រថយន្តតទ្រុង តាមបទបញ្ជាយ៉ាងម៉ឺងម៉ាត់របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានដាក់ចេញជាវិ ធានការជាច្រើនផងដែរ។
លោកបន្តថាចាប់ពីម៉ោង០០ថ្ងៃទី១០កុម្ភៈ កន្លងមកនេះ លោក ឃួង ស្រេង អភិបាលរាជធានីភ្នំពេញ បានដឹកនាំស្នងការដ្ឋាននគរបាលរាជធានីភ្នំពេញ មានការចូលរួមពីកងរាជអា វុធហត្ថ មន្ទីរសាធារណការ និងដឹកជញ្ជូនរាជធានីភ្នំពេញ និងខណ្ឌទាំង១២ បានបង្កើតក្រុមការងារចំនួន ១៦គោលដៅ ចុះធ្វើការត្រួតពិនិត្យរថយន្តធុនធំ ដែលតទ្រុងខុសលក្ខណៈបច្ចេកទេស ហើយរហូតមក ដល់យប់ថ្ងៃ១៣កុម្ភៈនេះ ឃាត់បានរថយន្តចំនួន២៦៦៣គ្រឿង ហើយក្នុងនោះមានចំនួន១៣០គ្រឿង គឺ ជារថយន្តដែលខុសលក្ខណៈខុសបច្ចេកទេស ហើយត្រូវបានអាជ្ញាធរ និងក្រុមការងារ ចម្រុះរបស់រដ្ឋបាល រាជធានីភ្នំពេញធ្វើការឃាត់ទុក និងកំពុងតែកាត់ទម្លាក់ទ្រុង និងទីតាំងកន្លែងដែលមាន លក្ខណៈខុសបច្ចេកទេស ដូចជាតខុស តលើសបន្ថែមផ្សេងៗជាដើម ត្រូវកាត់ចោលជាបណ្តើរៗហើយ។
លោក ម៉េត មាសភក្តី បានឲ្យដឹងទៀតថា ការងារត្រួតពិនិត្យរថយន្តតទ្រុងខុសលក្ខណៈបច្ចេទេសនេះ លោកអភិបាលរាជធានី បានដាក់បន្ថែមឲ្យមានក្រុមការងារចល័ត ដើម្បីកាត់តទ្រុងនៅនឹងកន្លែង ដែលអាជ្ញាធរឃាត់បានតែម្តង។ លោកបញ្ជាក់ថា យានដ្ឋានជួលជុលរថយន្តមានសរុបជាង៨០០កន្លែង នៅរាជធានីភ្នំពេញ យានដ្ឋានទាំងនេះនឹងមានការចុះទៅត្រួតពិនិត្យ ហើយបើរកឃើញទីតាំងណា ធ្វើការតទ្រុងរថយន្ត អាជ្ញាធររាជធានីនឹងបិទអាជីវកម្មទីតាំងនោះតែម្តង ដើម្បីជាការព្រមាន៕
ចែករំលែកព័តមាននេះ