រាជធានីភ្នំពេញ ៖ ម៉ូតូប្រដេញធុនត្រៃមួយគ្រឿង ត្រូវបានលោកគិត សុផា អភិបាលខណ្ឌដង្កោ ទិញប្រគល់ទៅឱ្យអធិការដ្ឋាននគរបាលខណ្ឌ សម្រាប់យកទៅប្រើប្រាស់ក្នុងការល្បាតស្ទាក់ចាប់បទល្មើសនានា ជាពិសេសការពារក្បួនគណៈប្រតិភូអាស៊ានដែលអញ្ជើញមកចូលរួមកិច្ចប្រជុំនៅរាជធានីភ្នំពេញនាពេលខាងមុខនេះ។ ពិធីប្រគល់ និងទទួលម៉ូតូខាងលើនោះបានប្រព្រឹត្តធ្វើកាលពីព្រឹកថ្ងៃទី៧ មីនា នៅសាលាខណ្ឌដង្កោ ដោយលោកប៊ន សំអាត អធិការនគរបាលខណ្ឌអញ្ជើញទៅទទួលដោយផ្ទាល់ និងមានការចូលរួមពីសំណាក់មន្ត្រីនគរបាលទូទាំងខណ្ឌផងដែរ។
លោកគិត សុផា បានថ្លែងថា ម៉ូតូប្រដេញធុនត្រៃមួយគ្រឿងនេះគឺលោកទិញប្រគល់ជូនដល់កម្លាំងនគរបាលអធិការដ្ឋានខណ្ឌ សម្រាប់ជិះរួមជាមួយនឹងម៉ូតូដែលមានស្រាប់ផ្សេងទៀត ដើម្បីធ្វើសកម្មភាពល្បាតស្ទាក់ចាប់បទល្មើសនានា ជាពិសេសការពារតាមដងផ្លូវពេលក្បួនគណៈប្រតិភូអាស៊ានមកចូលរួមប្រជុំនៅរាជធានីភ្នំពេញនាពេលខាងមុខ។ ជាងនេះទៀត រង្វាន់ម៉ូតូនេះគឺជាការលើកទឹកចិត្ត និងឆ្លើយតបទៅនឹងស្នាដៃដែលអធិការដ្ឋានខណ្ឌដង្កោបង្ក្រាបបានក្រុមជួញដូរ និងចែកចាយគ្រឿងញៀនជនជាតិស្បែកខ្មៅជាបន្តបន្ទាប់ក្នុងពេលថ្មីៗកន្លងមកផងដែរ។ លោកអភិបាលខណ្ឌបានសម្តែងនូវការកោតសរសើរយ៉ាងខ្លាំងដល់កម្លាំងនគរបាលនៃអធិការដ្ឋានខណ្ឌដែលបានឯកភាពគ្នាជាធ្លុងមួយអនុវត្តការងារចាប់បង្ក្រាបបទល្មើសផ្សេងៗ ជាពិសេសយុទ្ធនាការបង្ក្រាបចរាចរគ្រឿងញៀននេះតែម្តង ហើយទន្ទឹមនឹងនេះលោកក៏បានសំណូមពរឱ្យមានការខិតខំប្រឹងប្រែងជាបន្តទៀត។
លោកប៊ន សំអាត អធិការនគរបាលខណ្ឌដង្កោបានថ្លែងថា ការបង្ក្រាបក្រុមជួញដូរគ្រឿងញៀន ជាពិសេសក្រុមជនជាតិនីហ្សេរីយ៉ា ក្នុងពេលកន្លងមកនេះ គឺដោយសារបានការណែនាំពីអគ្គស្នងការនគរបាលជាតិ លោកអភិបាល និងស្នងការនគរបាលរាជធានីភ្នំពេញ ជាពិសេសការជួយជ្រោមជ្រែងជាថវិកា ក្នុងការស្រាវជ្រាវនានា។ មិនតែប៉ុណ្ណោះ ក្រោយពេលចាប់បានក្រុមជួញដូរគ្រឿងញៀនទាំងនោះលោកអភិបាលខណ្ឌតែងតែឧបត្ថម្ភថវិកាជាការលើកទឹកចិត្តជាបន្តបន្ទាប់ផងដែរ។ លោកអធិការ បានថ្លែងអំណរគុណយ៉ាងជ្រាលជ្រៅចំពោះលោកអភិបាលខណ្ឌដែលតែងតែគិតគូរដល់កងកម្លាំង នគរបាល ហើយក្នុងនាមលោកជាអធិការលោកសូមប្តេជ្ញាចិត្តថា នឹងខំប្រឹងប្រែងធ្វើការស្រាវជ្រាវរកបទល្មើសផ្សេងៗ និងបង្ក្រាបឱ្យបានជាបន្តទៀត៕
ចែករំលែកព័តមាននេះ