រាជធានីភ្នំពេញ ៖ សំណុំរឿងក្តីលោកស្រី ថាក់ ឡានី អតីតសមាជិកព្រឹទ្ធសភាមកពីគណបក្ស សម រង្ស៊ី បានឡើងទៅដល់តុលាការកំពូលហើយពាក់ព័ន្ធករណីចោទប្រកាន់ថា សម្តេចតេជោនាយករដ្ឋមន្ត្រី…
រាជធានីភ្នំពេញ ៖ សំណុំរឿងក្តីលោកស្រី ថាក់ ឡានី អតីតសមាជិកព្រឹទ្ធសភាមកពីគណបក្ស សម រង្ស៊ី បានឡើងទៅដល់តុលាការកំពូលហើយពាក់ព័ន្ធករណីចោទប្រកាន់ថា សម្តេចតេជោនាយករដ្ឋមន្ត្រី ជាអ្នកសម្លាប់លោក កែម ឡី។
តាមប្រភពព័ត៌មានពីតុលាការកំពូលឱ្យដឹងថា ស្ថាប័នកំពូលមួយនេះសម្រេចយកព្រឹកថ្ងៃទី២៦ ខែកុម្ភៈ ឆ្នាំ២០១៨ ខាងមុខនេះ ដើម្បីបើកសវនាការជំនុំជម្រះលើសំណុំរឿងក្តីនេះ។
សូមបញ្ជាក់ថា លោកស្រី ថាក់ ឡានី ដែលកំពុងតែគេចខ្លួននៅក្រៅប្រទេស មានអាយុ៦៣ឆ្នាំ ត្រូវបានជាប់ចោទពីបទ «បរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ប្រព្រឹត្តនៅភូមិតាប៉ាង ឃុំប៉ាតាង ស្រុកលំផាត់ ខេត្តរតនគិរី កាលពីថ្ងៃទី២៩ ខែកក្កដា ឆ្នាំ២០១៦ តាមមាត្រា៣០៥ មាត្រា៤៩៤ និង មាត្រា៤៩៥នៃក្រមព្រហ្មទណ្ឌ។
កន្លងមក សាលាដំបូងរាជធានីភ្នំពេញ និងសាលាឧទ្ធរណ៍ បានសម្រេចដូចគ្នា គឺផ្តន្ទាទោសលោកស្រី ថាក់ ឡានី ដាក់ពន្ធនាគាររយៈពេល១ឆ្នាំ និងពិន័យ៨លានរៀល ព្រមទាំងសងសំណងជំងឺចិត្តដល់សម្ដេចតេជោ ហ៊ុន សែន ចំនួន១០០រៀល។ តាមរយៈមេធាវីតំណាង ដើម្បីស្វែងរកភាពយុត្តិធម៌ និងភាពស្អាតស្អំក្នុងនាមជាមេដឹកនាំកំពូលនៃប្រទេស សម្តេចតេជោ តាមរយៈលោកមេធាវី គី តិច បានដាក់ពាក្យបណ្ដឹងប្តឹងអតីតសមាជិកព្រឹទ្ធសភារូបនេះ ដោយសំណូមពរឱ្យតុលាការចាត់ការតាមច្បាប់ និងទាមទារសំណងជំងឺចិត្តត្រឹមតែ១០០រៀលប៉ុណ្ណោះ ៕
ចែករំលែកព័តមាននេះ