ប្រទេសអ៊ីស្រាអែល ៖ ប៉ូលិសអ៊ីស្រាអែលកាលពីថ្ងៃទី១៣ កុម្ភៈ បានស្នើដល់តុលាការឱ្យចោទប្រកាន់នាយករដ្ឋមន្ត្រី លោកបេនចាមីន នេតាន់យ៉ាហ៊ូ ពីបទពុករលួយ ក្លែងបន្លំ និងរំលោភសេចក្តីទុកចិត្ត…
ប្រទេសអ៊ីស្រាអែល ៖ ប៉ូលិសអ៊ីស្រាអែលកាលពីថ្ងៃទី១៣ កុម្ភៈ បានស្នើដល់តុលាការឱ្យចោទប្រកាន់នាយករដ្ឋមន្ត្រី លោកបេនចាមីន នេតាន់យ៉ាហ៊ូ ពីបទពុករលួយ ក្លែងបន្លំ និងរំលោភសេចក្តីទុកចិត្ត ខណៈនាយករដ្ឋមន្ត្រីរូបនេះអះអាងជាថ្មីពីភាពស្លូតត្រង់របស់លោក ហើយបដិសេធពុំព្រមលាលែងចេញពីតំណែង ។
ការសម្រេចឃុំខ្លួនលោកនេតាន់យ៉ាហ៊ូ អាយុ៦៨ឆ្នាំ ជាផ្លូវការពេលនេះផ្អែកលើអគ្គរដ្ឋអាជ្ញា លោក AVISHAI MANDELBIT ដែលអាចប្រើពេលច្រើនសប្តាហ៍ ឬច្រើនខែ ។
ក្នុងសេចក្តីប្រកាសមួយ ប៉ូលិសគូសបញ្ជាក់ថា ខ្លួនមានភស្តុតាងគ្រប់គ្រាន់ប្រឆាំងនាយករដ្ឋមន្ត្រីរូបនេះដើម្បីចោទប្រកាន់លោកពីបទទទួលសំណូក ពីបទក្លែងបន្លំនិងរំលោភសេចក្តីទុកចិត្តក្នុងរឿង២ ដែលប្រើពេលស៊ើបអង្កេត២ឆ្នាំ ។
ក្នុងបទអន្តរាគមន៍មួយតាមទូរទស្សន៍កាលពីយប់ថ្ងៃទី១៣ កុម្ភៈ លោកបេនចាមីន នេតាន់យ៉ាហ៊ូ បានបដិសេធការចោទប្រកាន់ទាំងនោះ ហើយក៏បដិសេធពុំព្រមលាលែងចេញពីតំណែង ។ លោកអះអាងថា រដ្ឋាភិបាលរបស់យើងនឹងបញ្ចប់អាណត្តិរបស់ខ្លួន ហើយខ្ញុំប្រាកដក្នុងចិត្តសម្រាប់ការបោះឆ្នោតនាពេលខាងមុខនាខែវិច្ឆិកា ឆ្នាំ២០១៩ ខ្ញុំនឹងទទួលបានជាថ្មីនូវទំនុកចិត្តរបស់លោកអ្នក ។ អនុសាសន៍ឱ្យចោទប្រកាន់លោកពុំមានតម្លៃខាងផ្លូវច្បាប់ឡើយក្នុងប្រទេសប្រជាធិបតេយ្យមួយ ។
ក្នុងរឿងសង្ស័យមួយក្នុងចំណោមរឿងសង្ស័យទាំង២ដែលចោទលោកនោះ គឺលោកនេតាន់យ៉ាហ៊ូ សង្ស័យទទួលសំណូកពីសំណាក់បណ្តាឥស្សរជនជាអ្នកមាន ដូចជាលោក JAMES PACKER មហាសេដ្ឋីអូស្ត្រាលី ឬលោក ARNON MILCHAN ជាផលិតករអីុស្រាអែលនៅហូលីវូដជាដើម ។
យោងតាមប៉ូលិសថា ទឹកប្រាក់ជាកាដូទាំងឡាយផ្តល់ដោយពួកពាណិជ្ជករទាំងនោះដល់លោកនេតាន់យ៉ាហ៊ូ ព្រមទាំងបណ្តាសមាជិកគ្រួសារលោកមានដល់ទៅ១លាន SHEKELS ប្រហែលជា២៣០.០០០អឺរ៉ូ រវាងឆ្នាំ២០០៧ និង២០១៦ ក្រោមរូបភាពជាសីុហ្គា ស្រាសំប៉ាញ និងគ្រឿងអលង្កា ។
ជាថ្នូរវិញយោងតាមប៉ូលិសថា លោកនេតាន់យ៉ាហ៊ូ ប៉ុនប៉ងឱ្យមានការអនុម័តច្បាប់ពន្ធដារដែលអនុគ្រោះដល់លោក ARNON MILCHAN ដោយសាកល្បងឱ្យទទួលបានពីជននោះនូវទិដ្ឋាការមួយចូលសហរដ្ឋអាមេរិក ហើយដោយផ្តល់ការជួយសម្រួលដល់សហគ្រាសមួយចំនួនរបស់គេ ។
ប៉ូលិសដែលសាកសួរសាក្សីមិនតិចជាង៨០នាក់ ក៏ស្នើឱ្យមានការចោទប្រកាន់ប្រឆាំង
លោក ARNON MILCHAN ពីបទសូកប៉ាន់ ។ប៉ូលិសក៏និយាយដែរថា លោកនេតាន់យ៉ាហ៊ូ ក៏ពុករលួយក្នុងក្របខណ្ឌនៃកិច្ចព្រមព្រៀងសម្ងាត់មួយដែលលោកប៉ុនប៉ងធ្វើជាមួយម្ចាស់កាសែត YEDIOT AHARONOT លោក ARNON MOSES ដើម្បីឱ្យមានការជួយទ្រទ្រង់លោកពីកាសែតដ៏ធំនោះរបស់អ៊ីស្រាអែល ។ ប៉ូលិសក៏ស្នើឱ្យឃុំខ្លួនលោក MOSES ពីបទពុករលួយ ៕
ចែករំលែកព័តមាននេះ