រាជធានីភ្នំពេញ ៖ ខណៈពិធីបុណ្យចូលឆ្នាំថ្មីប្រពៃណីចិននឹងឈានមកដល់នៅថ្ងៃទី១៦ ទី១៧ និង១៨ ខែកុម្ភៈ នៅក្នុងរាជធានីភ្នំពេញ តាមគេហដ្ឋានអ្នកជាប់សែស្រឡាយចិន ហាងទំនិញ និងក្រុមហ៊ុនឯកជនជាច្រើនបានរៀបចំតុបតែងលម្អជា បណ្តើរៗហើយ ។
ជនជាតិខ្មែរជាប់សែស្រឡាយចិនបានចាប់ផ្តើមរៀបចំគេហដ្ឋានរបស់ខ្លួនដោយបិទអក្សរ ចងគោមភ្លើង និងដាក់តាំងដើមផ្កាអង្គារសិល និងផ្កាស្បៃរឿងទៅតាមចំណង់ចំណូលចិត្តរៀងៗខ្លួន ខណៈពេលដែលបណ្តាក្រុមហ៊ុន និងហាងជាច្រើនក៏បានតុបតែងដូចគ្នាដែរត្រៀមពិធីបុណ្យចូលឆ្នាំថ្មី ។ ការតុបតែងទៅតាមប្រពៃណីនេះគឺក្នុងគោលបំណងទទួលបានជោគជ័យ លាភសំណាង និងហុងស៊ុយល្អ សម្រាប់ឱកាសចូលឆ្នាំថ្មី ។
ការដាក់លក់ទាំងសម្ភារសម្រាប់សែនព្រេន ជាមួយនឹងដើមផ្កាអង្គារសិល្ប ផ្កាស្បៃរឿង និងដើមក្រូច បាន និងកំពុងតែមមាញឹកខ្លាំងនៅតាមដងវិថីមួយចំនួនក្នុងរាជធានីភ្នំពេញ ខណៈពេលដែលការលក់ទាខ្វៃ និងជ្រូកខ្វៃនៅតាមទីនានានោះក៏មានការមមាញឹកដូចគ្នាផងដែរ ។
លោកសុខ លី ម្ចាស់ហាងលក់អីវ៉ាន់មួយនៅផ្សារអូរឫស្សីឱ្យដឹងកាលពីថ្ងៃទី១៣ កុម្ភៈ ២០១៨ថា ហាងរបស់លោកបានត្រៀមរួចជាស្រេចនូវសម្ភារមួយចំនួនសម្រាប់ការដាក់សែន និងតាំងលម្អនៅក្នុងឱកាសបុណ្យចូលឆ្នាំចិនខាងមុខ ។ ហាងរបស់លោកមានលក់របស់របរគ្រប់រដូវកាលមិនថាចូលឆ្នាំនោះទេ ពោលគឺទាំងចូលឆ្នាំខ្មែរ ឆេងម៉េង ចូលឆ្នាំសាកល …។ ហាងរបស់លោកមានការលក់ទាំងបោះដុំ និងលក់រាយ ទៅតាមអតិថិជនត្រូវការ ហើយជិតមកដល់ចូលឆ្នាំចិននេះហាងរបស់លោកលក់ដាច់គួរសម ទាំងអតិថិជនដែលទិញទៅលក់បន្ត ។
បើតាមលោកសុខ លី ជាទូទៅការជាវសម្ភារយកទៅសែនពីអតិថិជន គឺមិនដូចគ្នាឡើយ ពោលគឺមានអ្នកខ្លះសែនតិច និងខ្លះសែនច្រើនទៅតាមទម្លាប់របស់ពួកគេ ។ បើអ្នកសែនសមរម្យល្មម ហើយមានសម្ភារគ្រប់គ្រាន់គឺត្រូវចំណាយចាប់ពី១០០ទៅ២០០ដុល្លារ ។
ហាងរបស់លោកបានត្រៀមសម្ភារទាំងអស់នេះប្រហែលជាកន្លះខែមុនពិធីបុណ្យចូលឆ្នាំចិនមកដល់ ហើយអតិថិជនជាវច្រើនគឺនៅកៀកបុណ្យតែម្តងចន្លោះពីមួយសប្តាហ៍ ពោលគឺមុនថ្ងៃដកជើងធូប ។
លោកឌួង វុទ្ធី មានអាសយដ្ឋាននៅចាក់អង្រែក្រោម ជាអ្នកជាប់សែស្រឡាយចិនឲ្យដឹងថា ក្រុមគ្រួសាររបស់លោកបានត្រៀមរួចជាស្រេចនូវគ្រឿងប្រដាប់ប្រដារ ផ្សេងៗ សម្រាប់ពិធីសែននាឱកាសចូលឆ្នាំចិនមកដល់ ។ ជាទូទៅក្រុមគ្រួសាររបស់លោកតែងតែរៀបចំនូវគ្រឿងសក្ការ ផ្សេងៗដូចទៅនឹងអ្នកជាប់សែស្រឡាយចិនផងដែរ ក្រដាសសែន នំ និងសម្ភារមួយចំនួនទៀត ។ សម្រាប់ដើមអង្គាសីលគឺលោកបានទិញរួចរាល់ហើយ សម្រាប់ដាក់តាំងជាមួយកន្លែងសែននេះ ព្រោះដើមនេះគឺជារបស់នាំលាភសំណាងដល់ក្រុមគ្រួសាររបស់លោក ។
បើតាមលោកវុទ្ធី ចំណីអាហារសម្រាប់សែនព្រេនផ្សេងទៀតនោះជាទម្លាប់ក្រុមគ្រួសាររបស់លោក គឺគ្មានអ្វីក្រៅពីសម្លចាប់ឆាយ និងឆាមីនោះឡើយ ព្រោះទាំងពីរមុខនេះវាហាក់ដូចជាប្រពៃណីដែលបានធ្វើជារៀងរាល់ឆ្នាំទៅហើយ ។
ដោយឡែកសម្រាប់ការជួបជុំសប្បាយនាឱកាសចូលឆ្នាំនោះលោកវុទ្ធី និងក្រុមគ្រួសារមិនមានគម្រោងធ្វើដំណើរកម្សាន្តតាមបណ្តាខេត្តណាមួយឡើយ ក្រៅតែពីការជួបជុំបងប្អូនសាច់ញាតិបន្តិចបន្តួចនៅឯផ្ទះនោះ ។
ជាមន្ត្រីរាជការមួយរូបអ្នកស្រីណាវី ឲ្យដឹងថា ក្រុមគ្រួសាររបស់អ្នកស្រីមិនជាប់សែស្រឡាយចិនច្រើនឡើយ ហើយការសែននោះទៀតសោតធ្វើឡើងបន្តិចបន្តួចប៉ុណ្ណោះ។ សម្រាប់ឱកាសបុណ្យចូលឆ្នាំចិន ក្រុមគ្រួសាររបស់អ្នកស្រីគ្រោងនឹងទៅលេងនៅខេត្តកំពត ដោយសារតែអ្នកស្រីមានប្អូនខ្លះដែលជាប់សែស្រឡាយចិននៅទីនោះ ។
ជានិស្សិតនៅសាលាឯកជនមួយលោកហម រ៉ុង និយាយថា នៅក្នុងឱកាសបុណ្យចូលឆ្នាំនេះលោកមានគម្រោងចង់ទៅដើរលេងក្នុងប្រទេសចិន ឬថៃ ព្រោះកន្លងមកលោកមិនសូវមានឱកាសបានដើរលេខាងក្រៅប្រទេសនោះឡើយ ។
ដោយកើតក្នុងគ្រួសារដែលាមានជីវភាពខ្ពស់លោកបានដាក់គោលដៅចម្បងគឺទៅប្រទេសចិន ស្របពេលដែលឱកាសពិធីបុណ្យចូលឆ្នាំផងនោះលោកយល់ថាប្រាកដជាសប្បាយ និងប្លែកភ្នែក ។
បុណ្យចូលឆ្នាំចិន ឬហៅម្យ៉ាងទៀតថា បុណ្យនានិទាឃរដូវ គឺថ្ងៃឈប់សម្រាកដ៏សំខាន់បំផុតសម្រាប់ជនជាតិចិន ។ មានមនុស្សមួយចំនួន ជាពិសេសជនជាតិចិននៅក្រៅប្រទេសបានហៅពិធីបុណ្យនេះថា បុណ្យចូលឆ្នាំចន្ទគតិថ្មី ។ ជាប្រពៃណី ពិធីបុណ្យនេះចាប់ផ្ដើម នៅថ្ងៃទីមួយនៃខែទីមួយ តាមចន្ទគតិ ក្នុងប្រតិទិនចិន ហើយបញ្ចប់ទៅវិញនៅថ្ងៃទី១៥ ដែលគេហៅថ្ងៃនេះថា ពិធីបុណ្យបង្ហោះគោម ។ ពិធីបុណ្យនេះត្រូវប្រារព្ធឡើង នៅតំបន់ដែលមានចំនួនប្រជាជនដ៏ច្រើនសន្ធឹកសន្ធាប់ ដូចជាប្រទេសកម្ពុជាយើងជាដើម ។ ពិធីបុណ្យចូលឆ្នាំចិន ត្រូវបានចាត់ទុកជាថ្ងៃដ៏មានសារសំខាន់សម្រាប់ជនជាតិចិន ហើយវាក៏មានឥទ្ធិពលទៅលើពិធីបុណ្យចូលឆ្នាំថ្មីរបស់ប្រទេសជិតខាងផងដែរ ជាពិសេសចំណងវប្បធម៌ជាមួយប្រជាជនដែលជនជាតិចិន ធ្វើអន្តរកម្មជាមួយ ។
មូលហេតុសំខាន់ដែលគេប្រារព្ធពិធីនេះឡើង មានតែ២ប៉ុណ្ណោះ គឺដើម្បីអបអរការខិតខំធ្វើការពេញមួយឆ្នាំ, ដើម្បីឲ្យមានការសម្រាកដ៏ប្រសើរ និងបានជួបជុំក្រុមគ្រួសារ និងដើម្បីផ្សងឲ្យមានសំណាងល្អ និងភាពរុងរឿង ថ្កុំថ្កើង នៅឆ្នាំខាងមុខ ។
ជនជាតិចិនជឿថា ការចាប់ផ្ដើមដ៏ល្អនៅដើមឆ្នាំថ្មីនឹងនាំឲ្យមានសំណាងល្អពេញមួយឆ្នាំ។ តាមប្រពៃណី ជនជាតិចិនបានប្រារព្ធការចាប់ផ្ដើមឆ្នាំថ្មី នៃការធ្វើកសិកម្ម ដោយផ្សងឲ្យមានការប្រមូលផលល្អ (សម្រាប់កសិករ)។ បច្ចុប្បន្នការប្រារព្ធពិធីមួយនេះមានការវិវឍ្ឍយ៉ាងខ្លាំង ដោយគេបានប្រារព្ធពិធីផ្ដើមឆ្នាំថ្មីនៃអាជីវកម្ម ផ្សេងៗ និងផ្សងឲ្យមានប្រាក់ចំណេញច្រើន ព្រមទាំងទទួលបានជោគជ័យក្នុងភារកិច្ចនានា ៕
ចែករំលែកព័តមាននេះ