រាជធានីភ្នំពេញ ៖ សម្តេចក្រុមព្រះ នរោត្តម រណឫទ្ធិ ព្រះប្រធានគណបក្ស ហ្វ៊ុនស៊ិនប៉ិច បានអះអាងបើកផ្លូវឲ្យសមាជិកបក្សដែលត្រូវបណ្តេញចេញ ប្តឹងទៅតុលាការ បើខ្លួនមិនពេញចិត្ត ។
ផ្តល់បទសម្ភាសជាមួយក្រុមអ្នកសារព័ត៌មានក្រោយចូលរួមសម័យប្រជុំវិសាមញ្ញរដ្ឋសភា នាព្រឹកថ្ងៃទី១៤ ខែកុម្ភៈ ឆ្នាំ២០១៨ សម្តេចក្រុមព្រះបញ្ជាក់ថា «ខ្ញុំ នរោត្តម រណឫទ្ធិ ជាប្រធានគណបក្ស មិនដែលបណ្តេញអ្នកចេញពីបក្សទេ ប៉ុន្តែគេឲ្យខ្ញុំហើយខ្ញុំត្រូវតែចុះហត្ថលេខា ដើម្បីឲ្យគណបក្ស ហ្វ៊ុនស៊ិនប៉ិច ជាគណបក្សរាជានិយមតែមួយគត់ ចេះរួបរួមគ្នា» ។
ព្រះអង្គក៏បានលើកឡើងថា បើមានបញ្ហាអ្វីមួយគួរដោះស្រាយផ្ទៃក្នុង ដោយមិនគួរប្តឹងទៅតុលាការនោះទេ ។ ប៉ុន្តែសម្តេចបានបញ្ជាក់ថា «អ្នកណាប្តឹងអ្វីប្តឹងទៅ ជាសិទ្ធិរបស់គេ ។ ខ្ញុំសូមជម្រាបអ្នកកាសែតថា អ្នកណាប្តឹងក៏ប្តឹងទៅ ជាសិទ្ធិរបស់គេ ក៏ប៉ុន្តែខ្ញុំសុំយោបល់មួយ ក្នុងប្រជាធានគណបក្ស សុំកុំមានការបែកបាក់គ្នា មានបញ្ហាអ្វីត្រូវដោះស្រាយគ្នា» ។
សូមជម្រាបថា ការលើកឡើងរបស់ សម្តេចក្រុមព្រះ បន្ទាប់ពីសមាជិកគណបក្ស ហ្វ៊ុនស៊ិនប៉ិច ចំនួន៥រូប នៅថ្ងៃទី១២ ខែកុម្ភៈ ឆ្នាំ២០១៨ នេះ បានដាក់ពាក្យប្តឹងទៅតុលាការដំបូងរាជធានីភ្នំពេញ ដើម្បីប្រឆាំងនឹងសេចក្តីសម្រេចរបស់ សម្តេចក្រុមព្រះ នរោត្តម រណឫទ្ធិ ព្រះប្រធានគណបក្ស ហ្វ៊ុនស៊ិនប៉ិច ដែលបណ្តេញពួកគេចេញពីគណបក្ស កាលពីចុងខែមករាកន្លងទៅ ។
ពាក្យបណ្តឹងរបស់សមាជិកទាំង៥នាក់របស់គណបក្ស ហ្វ៊ុនស៊ិនប៉ិច ដែលរួមមាន ៖ លោក សេង ហាក់ស្រ៊ុន, លោក មៀច សំរួល, លោក កាន់ វុឌ្ឍី, លោក សួន ផល្លី, លោក គឹម រ៉ាវី និងលោក ណុប ផន បានបញ្ជាក់ថា ការសម្រេចបណ្តេញពួកគេចេញពីគណបក្សនេះ គឺផ្ទុយទៅនឹងលក្ខន្តិកគណបក្ស ដែលជាហេតុធ្វើឱ្យប៉ះពាល់ដល់ផលប្រយោជន៍ស្របច្បាប់ ប៉ះពាល់ដល់កិត្តិយស សេចក្តីថ្លៃថ្នូរបស់ពួកគេ និងអយុត្តិធម៌ ។ អតីតសមាជិក ហ្វ៊ុនស៊ិនប៉ិច ដែលរងការបណ្តេញចេញទាំងនោះ បានស្នើឱ្យតុលាការជួយរកយុត្តិធម៌ដល់ពួកគេ និងផ្តល់ភាពជាសមាជិកគណបក្ស ហ្វ៊ុនស៊ិនប៉ិច ដល់ពួកគេវិញ ។
សូមបញ្ជាក់ថា កាលពីថ្ងៃទី២៥ ខែមករា ឆ្នាំ២០១៨ កន្លងទៅ សម្តេចក្រុមព្រះ នរោត្តម រណឫទ្ធិ ប្រធានគណបក្ស ហ្វ៊ុនស៊ិនប៉ិច បានចេញសេចក្តីសម្រេចមួយដោយបណ្តេញ អគ្គលេខាធិការរងម្នាក់ និងមន្ត្រី៣រូបផ្សេងទៀត ដែលគណបក្សចាត់ទុកថា បានបំផុសបំផុលញត្តិទាមទារឲ្យដកតំណែង លោក ប៉ោ ប៊ុនស្រ៊ឺ អនុប្រធានគណបក្ស និងលោក យឹម សាវី អគ្គលេខាធិការបក្ស ។ សមាជិកជាន់ខ្ពស់របស់គណបក្ស ហ្វ៊ុនស៊ិនប៉ិច ៤រូបនោះ រួមមាន ៖ លោក សេង ហាក់ស្រ៊ុន អគ្គលេខាធិការរង, លោក ណុប ផន, លោក មៀច សំរួល និងលោក ភាព ភាជន៍ ។
សេចក្តីសម្រេចរបស់គណបក្ស ហ្វ៊ុនស៊ិនប៉ិច បានធ្វើឡើងបន្ទាប់ពីមានសមាជិកមួយចំនួនដែលគេសង្ស័យដឹកនាំដោយ លោក សេង ហាក់ស្រ៊ុន អគ្គលេខាធិការង នៃគណបក្ស ហ្វ៊ុនស៊ិនប៉ិច បានបង្កើតញត្តិជាបន្តបន្ទាប់ ដើម្បីស្នើ សម្តេចក្រុមព្រះនរោត្តម រណឫទ្ធិ ដកតំណែងលោក ប៉ោ ប៊ុនស្រ៊ឺ អនុប្រធានគណបក្ស និងលោក យឹម សាវី អគ្គលេខាធិការគណបក្ស ដោយចោទប្រកាន់មន្ត្រីជាន់ខ្ពស់គណបក្សទាំង២រូបនេះថា ប្រកាន់បក្ខពួកនិយម និងមានអំពើពុករលួយ ៕
ចែករំលែកព័តមាននេះ