ខេត្តបន្ទាយមានជ័យ ៖ មន្ត្រីជាន់ខ្ពស់ក្រសួងឧស្សាហកម្ម និងសិប្បកម្ម បានជំរុញឲ្យម្ចាស់រោងចក្រសហគ្រាសតូចធំត្រូវអនុវត្តតាមច្បាប់ និងស្តង់ដាគុណភាព ដើម្បីលើកកម្ពស់គុណតម្លៃ និងសុខភាពជូនប្រជាពលរដ្ឋ ។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការនូវអគាររដ្ឋបាលថ្មី នៃមន្ទីរក្រសួងឧស្សាហកម្ម និងសិប្បកម្មខេត្ត កាលពីថ្ងៃទី១២ កុម្ភៈ លោក ហេង សុខគង់ រដ្ឋលេខាធិការក្រសួងឧស្សាហកម្ម និងសិប្បកម្ម បានលើកឡើងថា វិស័យឧស្សាហកម្ម និងសិប្បកម្ម គឺជាវិស័យដ៏សំខាន់មួយដែលបាននិងកំពុងរួមចំណែកដល់ការរក្សាកំណើនសេដ្ឋកិច្ចជាតិសម្រេចបានក្នុងរង្វង់៧% អស់រយៈពេលជាច្រើនឆ្នាំមកនេះ ។
លោកថ្លែងថា ៖« ដើម្បីពង្រឹង និងពង្រីកវិសាលភាពនៃការគ្រប់គ្រងរោងចក្រ សហគ្រាស ឧស្សាហកម្ម សិប្បកម្ម ឲ្យមានប្រសិទ្ធ ភាពស្របតាមលិខិតបទដ្ឋានគតិយុត្ត មន្ទីរឧស្សាហកម្មនិងសិប្បកម្ម ក៏ត្រូវបង្កើនការយកចិត្តទុកដាក់ពង្រឹងការងារអធិការកិច្ចលើគុណភាពផលិតផលខ្សែសង្វាក់ផលិតកម្មបន្ថែមទៀត ពិសេសច្បាប់ស្តីពីការគ្រប់គ្រងរោងចក្រ និងសិប្បកម្ម ច្បាប់ស្តីពីស្តង់ដា និងច្បាប់ស្តីពីមាត្រាសាស្ត្រ ជាដើម » ។
យោងតាមលោក ញ៉ិល ប៊ុនធឿន ប្រធានមន្ទីរឧស្សាហកម្ម និងសិប្បកម្មខេត្ត បានឲ្យដឹងថា ខេត្តបន្ទាយមានជ័យមានតំបន់សេដ្ឋកិច្ចពិសេសចំនួន៣ និងមានឧស្សាហកម្មរោងចក្រ សហគ្រាសធុនតូច និងមធ្យម និងសិប្បកម្មសរុបជាង១ពាន់កន្លែង ចែកជាឧស្សាហកម្មរោងចក្រចំនួន១៣កន្លែង សហគ្រាសធុនតូចនិងមធ្យម និងសិប្បកម្មចំនួន៩៨៥កន្លែង ដែលផ្ដល់កម្លាំងពលកម្មជូនដល់ប្រជាពលរដ្ឋសរុប៩.១២៧នាក់ ។
លោកបានបន្ដថា អគាររដ្ឋបាលថ្មីនេះជាផ្នែកមួយនៃទំនាក់ទំនងរវាងធុរជន វិនិយោគិនជាតិ និងអន្តរជាតិ ពិសេសគឺជាកន្លែងផ្តល់សេវារដ្ឋបាលដល់សាធារណជនដ៏កក់ក្តៅ និងសមរម្យ ។
លោក អ៊ុ រាត្រី អភិបាលរងខេត្ត បានមានប្រសាសន៍ថា ដោយយោងតាមរបាយការណ៍មន្ទីរឧស្សាហកម្ម និងសិប្បកម្មខេត្ត ការរីកចម្រើនមានស្ថានីយប្រេងឥន្ធនៈ ដែលគិតរហូតមកដល់ពេលនេះ មានចំនួន៨៨ស្ថានីយ និងអាជីវកម្មទឹកស្អាតមានចំនួន១២កន្លែង ក្នុងនោះ ៤កន្លែងមិនទាន់ដំណើរការ និងមានពលកម្មសរុប១៩២នាក់ និងផ្គត់ផ្គង់ទឹកស្អាតបានចំនួន១១០.៧៥៣គ្រួសារ ប្រកបដោយទំនុកចិត្តជូនបងប្អូនប្រជាពលរដ្ឋ ក៏ដូចជារោងចក្រ សហគ្រាសនានាផងដែរ ៕
ចែករំលែកព័តមាននេះ