ខេត្តកណ្ដាល ៖ បុរសម្នាក់មានជំងឺរាក និងក្អកចេញឈាមធ្ងន់ធ្ងរ ហើយតូចចិត្តព្យាបាលមិនជា បានសម្រេចចិត្តចង.កសម្លាប់ខ្លួននៅជង្រុកស្រូវស្លាប់ បង្កការភ្ញាក់ផ្អើលយ៉ាងខ្លាំង ហើយត្រូវកម្លាំងនគរបាលចុះទៅពិនិត្យកោសល្យវិច័យនៅកន្លែងកើតហេតុ ដែលហេតុការណ៍នេះកើតឡើងកាលពីវេលាម៉ោង១១ និង១០នាទីព្រឹកថ្ងៃទី១៤ កុម្ភៈ ស្ថិតក្នុងភូមិព្រៃភក្តី ឃុំព្រៃពួច ស្រុកអង្គស្នួល ខេត្តកណ្ដាល។
សេចក្តីរាយការណ៍បន្តថា បុរសខាងលើឈ្មោះ សឿន សុភ័ណ អាយុ៣១ឆ្នាំ ជាកសិករ មានទីលំនៅក្នុងភូមិកើតហេតុ គ្មានប្រពន្ធនិងកូនទេ ហើយបានយកខ្សែភ្លើងចង.កជាប់ធ្នឹមរោងជង្រុកស្រូវ ។
បើតាមស្ត្រីឈ្មោះមៀច សុឃីម អាយុ៥១ឆ្នាំ ជាគ្រូបង្រៀន និងត្រូវជាម្ដាយបាននិយាយថា កន្លងមកកូនប្រុសគាត់ តែងផឹកស្រាជាប្រចាំ បើទោះបីជាគាត់ណែនាំយ៉ាងណាក៏មិនស្ដាប់តាមដែរ ។ ដោយឡែកនៅ២ ទៅ៣ថ្ងៃមុន កូនគាត់តែងតែត្អូញប្រាប់គាត់ថា គេចេះតែរាក និងក្អកមកចេញឈាមខ្លាំងណាស់ ។លុះដល់ថ្ងៃទី១៣ កុម្ភៈ បន្ទាប់ពីកូននិយាយបែបនេះ គាត់បានទិញថ្នាំឱ្យលេប៤ដង ប៉ុន្តែពេលនោះ កូនប្រុសគាត់ទើបតែលេបបាន១ដងប៉ុណ្ណោះ នៅ៣ដងទៀតតែមិនព្រមលេបទៀតទេ ។
ប្រភពដដែលបន្តទៀតថា នៅព្រឹកថ្ងៃកើតហេតុ គាត់បានចេញទៅបង្រៀនសិស្ស ដោយទុកឲ្យកូនប្រុសនៅផ្ទះម្នាក់ឯង ហើយគាត់មិនបានដឹងថា កូនប្រុសមានបំណងសម្លាប់ខ្លួនបែបនេះទេ ។ លុះពេលត្រឡប់មកពីសាលារៀនវិញគាត់បានស្រែកហៅរកកូន ដើម្បីឲ្យកូនហូបបាយនិងលេបថ្នាំ ប៉ុន្តែមិនឮឆ្លើយ ក៏បានដើររក ទើបប្រទះឃើញចងជាប់ធ្នឹមរោងជង្រុកស្រូវស្លាប់បាត់ទៅហើយ ។
ចែករំលែកព័តមាននេះ