ខេត្តព្រៃវែង ៖ បច្ចុប្បន្ននេះគេសង្កេតឃើញថា ខេត្តព្រៃវែងមានកាស៊ីណូដល់ទៅ៥កន្លែង ដែលកំពុងដំណើរការបើកលេងជារៀងរាល់ថ្ងៃ នៅតាមខ្សែបន្ទាត់ព្រំដែនកម្ពុជា-វៀតណាមក្នុងស្រុកចំនួន២ គឺស្រុកព្រះស្តេច២កន្លែង និងស្រុកពាមជរ៣កន្លែង ។ ហើយកាស៊ីណូទាំងអស់នោះ មានសន្តិសុខការពារសុវត្ថិភាពជូនភ្ញៀវដែលចូលលេងយ៉ាងកក់ក្តៅ បើទោះជាកាស៊ីណូទាំងនោះមានទ្រង់ទ្រាយតូច មិនត្រឹមត្រូវតាមលក្ខណៈស្តង់ដារជាកាស៊ីណូក៏ដោយ ។
កាស៊ីណូទី១ មានទីតាំងស្ថិតនៅចំណុចមាត់ច្រករបៀងកោះស្កូ ក្នុងឃុំកោះសំពៅ ស្រុកពាមជរ និងកាស៊ីណូ២កន្លែងទៀតស្ថិតនៅមាត់ច្រកទ្វាព្រំដែនអន្តរជាតិកោះរកា ក្នុងឃុំកោះរកា ស្រុកពាមជរ ។ កាស៊ីណូទាំង៣នេះ បើកលេងច្រើនឆ្នាំមកហើយ ដោយក្នុងនោះមានតែតុបៀរ២ទៅ៣តុ និងសង្វៀនជល់មាន់១ប៉ុណ្ណោះ ហើយពុំមានលើកស្លាកដាក់ឈ្មោះថា កាស៊ីណូអ្វីនោះទេ ឃើញតែខ្មែរចូលលេង ។
ចំណែកកាស៊ីណូចំនួន២កន្លែងទៀត ស្ថិតនៅមាត់ច្រកទ្វាព្រំដែនអន្តរជាតិបន្ទាយចក្រី ក្នុងឃុំបន្ទាយចក្រី ស្រុកព្រះស្តេច កាស៊ីណូទី១ ឈ្មោះថា កាស៊ីណូម៉ូណាកូ កាស៊ីណូនេះមានអាគារខ្ពស់ស្កឹមស្កៃតាមលក្ខណៈស្តង់ដារ ប៉ុន្តែកាស៊ីណូទី២ មានតែសង្វៀនជល់មាន់១ និងតុល្បែង២ទៅ៣តុ ប៉ុណ្ណោះ ហើយពុំមានដាក់ស្លាកយីហោអ្វីនោះទេ ។
រីឯកាស៊ីណូមួយកន្លែងទៀត ដែលបច្ចុប្បន្នបានផ្អាកដំណើរការហើយនោះ មានទីតាំងស្ថិតនៅមាត់ច្រកតំបន់ស្វាយអាង៉ោង ស្ថិតក្នុងឃុំចាម ស្រុកកំពង់ត្របែក និងមានម្ចាស់តែមួយជាមួយនឹងកាស៊ីណូម៉ូណាកូ នៅច្រកបន្ទាយចក្រីដែរ ។ ចំណែកមូលហេតុនៃការផ្អាកដំណើរការនោះ គឺដោយសារតែគ្មានភ្ញៀវចូលលេង ។
កាស៊ីណូស្ទើរតែទាំងអស់នៅខេត្តព្រៃវែង បើតាមអាណាចក្រដែនដីឆ្លើយថា រឿងមានច្បាប់ ឬអត់ច្បាប់ដឹងមិនច្បាប់ទេ ទាល់តែសួរទៅថ្នាក់ក្រសួងសេដ្ឋកិច្ចហិរញ្ញវត្ថុទើបដឹង ៕
ចែករំលែកព័តមាននេះ