ខេត្តកោះកុង ៖ ស្ត្រីម្នាក់ត្រូវប្តីចុងបាញ់សម្លាប់យ៉ាងឃោរឃៅចំនួន២គ្រាប់ ចំដើមទ្រូងស្លាប់មួយរំពេច កើតឡើងកាលពីវេលាម៉ោង០៧ និង៣០នាទីយប់ថ្ងៃទី១៣ កុម្ភៈ ស្ថិតនៅលើផ្ទះក្នុងភូមិស្មាច់មានជ័យ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។
ប្រភពពីសមត្ថកិច្ចឱ្យដឹងថា ស្ត្រីរងគ្រោះខាងលើមានឈ្មោះហាន ធឿន អាយុ៥០ឆ្នាំ ជាកម្មករសំណង់ ។ ចំណែកប្តីចុងដៃដល់ឈ្មោះសេង វិបុល អាយុជាង៥០ឆ្នាំ ជាកម្មករអារឈើ ។
សមត្ថកិច្ចបានបញ្ជាក់ទៀតថា ជនសង្ស័យជាប្តីចុង បានបាញ់សម្លាប់ប្រពន្ធដោយប្រើអាវុធអាកា៤៧បាញ់ចំដើមទ្រូងចំនួន២គ្រាប់ស្លាប់ភ្លាមៗនៅនឹងកន្លែង រួចហើយជនសង្ស័យរត់គេចខ្លួនបាត់ ។ តាមការរៀបរាប់របស់ប្អូនស្រីស្ត្រីរងគ្រោះបញ្ជាក់ដែរថា តាំងពីបានប្តីក្រោយនេះ បងស្រីរបស់ខ្លួន(ស្ត្រីរងគ្រោះ) តែងត្រូវបានប្តីស្រវឹងស្រារករឿងឈ្លោះប្រកែក និងឈានដល់ការវាយតប់គ្នាគ្មានលោះថ្ងៃឡើយ ។ ជាពិសេស នៅពេលឃើញប្រពន្ឋនិយាយរកប្រុសៗក្នុងភូមិ ឬជាសាច់ញាតិគឺដឹងតែរឿងធំតែម្តង ។
ប្អូនស្រីបន្តថា ភ្លើងប្រចណ្ឌចុងក្រោយនេះ គឺនៅពេលបងស្រីរបស់ខ្លួនរៀបការកូន កាលពីថ្ងៃសៅរ៍ចុង
សប្តាហ៍មុននេះ បងស្រីរបស់ខ្លួនបានហៅប្តីដើម ដែលបានលែងលះគ្នាហើយនោះ មកក្នុងនាមជាមេបាឱ្យកូនស្រីរបស់ខ្លួន ទើបធ្វើឱ្យប្តីចុងរូបនេះ ផ្ទុះភ្លើងប្រចណ្ឌ ឈានដល់ការបាញ់សម្លាប់បែបនេះ ។
ចែករំលែកព័តមាននេះ