ខេត្តព្រៃវែង ៖ កម្មករ កម្មការិនី ប្រមាណជិត៣០០នាក់ បានប្រមូលផ្តុំគ្នានៅខាងមុខរោងចក្រ YLT (រោងចក្រធ្វើរានទេវតា) ដែលស្ថិតនៅតាមបណ្តោយផ្លូវជាតិលេខ១ ក្នុងឃុំកំពង់សឹង្ហ…
ខេត្តព្រៃវែង ៖ កម្មករ កម្មការិនី ប្រមាណជិត៣០០នាក់ បានប្រមូលផ្តុំគ្នានៅខាងមុខរោងចក្រ YLT (រោងចក្រធ្វើរានទេវតា) ដែលស្ថិតនៅតាមបណ្តោយផ្លូវជាតិលេខ១ ក្នុងឃុំកំពង់សឹង្ហ ស្រុកព្រះស្ដេច ខេត្តព្រៃវែង កាលពីវេលាម៉ោង៨ព្រឹក ថ្ងៃទី១៣ កុម្ភៈនេះ ដោយទាមទារឲ្យថៅកែរោងចក្រ គោរពច្បាប់ការងារ និងបើកប្រាក់ខែកម្មករឲ្យបានទៀងទាត់។ ក្រុមកម្មករទាំងនោះ បានប្រាប់ឲ្យ កោះសន្តិភាពដឹងថា រោងចក្រនេះថៅកែជាជនជាតិកូរ៉េ មេការជាជនជាតិវៀតណាម មានកម្មករ កម្មការិនីសរុបជិត៣០០នាក់ និងបានដំណើរការរយៈពេល៣ឆ្នាំមកហើយ។ ក្រុមកម្មករដដែលនេះ បានបញ្ជាក់ថា រយៈពេល៣ឆ្នាំនេះ ថៅកែរោងចក្រធ្វើបាបកម្មករណាស់ ដោយបានបង្ខំកម្មករ ឲ្យធ្វើការថែមម៉ោង រហូតដល់ម៉ោង១១យប់ ពេលខ្លះដល់ភ្លឺក៏មាន ហើយបើកម្មករណាប្រកែកមិនព្រមធ្វើ គេគំរាមបញ្ឈប់ការងារ ឬគំរាមលែងឲ្យថែមម៉ោងរហូត។
ចំណែកប្រាក់ខែវិញ តែងតែពន្យាហួសថ្ងៃរហូត ដែលធម្មតាគ្រប់រោងចក្រទាំងអស់ គេបើកថ្ងៃទី១០ ចំណែករោងចក្រនេះពន្យាដល់ថ្ងៃទី១៥ ឬ១៦ឯណោះ ហើយចុងក្រោយនេះ ស្រាប់តែថៅកែរោងចក្របិទប្រកាសថា ប្រាក់ខែសម្រាប់ខែមករា ត្រូវពន្យាដល់ថ្ងៃទី១៧ខែកុម្ភៈ ទើបឲ្យកម្មករខ្ចីមុនម្នាក់១០០ដុល្លារសិន ហើយដល់ថ្ងៃទី២៤ ទើបបើកប្រាក់ខែឲ្យទាំងអស់។ ចំណុចនេះហើយទើបកម្មករ កម្មការិនីទាំងអស់ កើតទុកមិនសុខចិត្ត ហើយនាំគ្នាធ្វើបាតុកម្មតវ៉ានៅព្រឹកថ្ងៃទី១៣ កុម្ភៈ នេះតែម្តង។ គួរបញ្ជាក់ផងដែរថា ក្នុងពេលដែលក្រុមកម្មករនាំគ្នាធ្វើបាតុកម្មនោះ គេពុំឃើញមានវត្តមានអាជ្ញាធរ ឬមន្ត្រីមន្ទីរការងារណាម្នាក់ ចុះទៅសម្របសម្រួលដោះស្រាយឡើយ ចំណែកភាគីខាងថៅកែរោងចក្រ ក៏មិនឃើញចេញធ្វើការចរចាសម្របសម្រួល ជាមូយក្រុមកម្មករដែរ គឺមានតែក្រុមកម្មករ រាប់រយនាក់ នាំគ្នាឈរស្រែកតវ៉ានៅខាងមុខរោងចក្រប៉ុណ្ណោះ។
ចំពោះបញ្ហានេះ កោះសន្តិភាព បានព្យាយាមទំនាក់ទំនងទៅលោក សាញ សាម ប្រធានរដ្ឋបាលរោងចក្រ YLT ជាច្រើនដង ដើម្បីសុំការបំភ្លឺ ប៉ុន្តែទូរស័ព្ទរបស់លោកហៅចូលហើយគ្មានអ្នកទទួល។ ដោយឡែកលោក ភុន សម្ភស្ស អភិបាលស្រុកព្រះស្តេច បានប្រាប់តាមទូរសព្ទ័ថា លោកកំពុងជាប់រវល់នៅប្រទេសវៀតណាម តែលោកនឹងប្រញាប់ត្រលប់មកវិញ ហើយពិនិត្យមើលរឿងនេះ។ រីឯលោក ណុប សាវ៉ាត ប្រធានមន្ទីរការងារខេត្តព្រៃវែង មិនអាចទំនាក់ទំនងសុំការបំភ្លឺបានទេ ដោយទូរសព្ទ័របស់លោកហៅចូលជាច្រើនសារ តែគ្មានអ្នកទទួល៕
https://youtu.be/fQl6RQUSXjw
ចែករំលែកព័តមាននេះ