សហរដ្ឋអាមេរិក៖ ប៉ូលិសក្រុងញូវយ៉កគូសបញ្ជាក់ថា ភរិយារបស់កូនប្រុសច្បងប្រធានាធិបតីសហរដ្ឋអាមេរិកលោកដូណាល់ ត្រាំ គឺលោក DONALD TRUMP JR ត្រូវបានបញ្ជូនទៅមន្ទីរពេទ្យកាលពីថ្ងៃទី១២ កុម្ភៈ…
សហរដ្ឋអាមេរិក៖ ប៉ូលិសក្រុងញូវយ៉កគូសបញ្ជាក់ថា ភរិយារបស់កូនប្រុសច្បងប្រធានាធិបតីសហរដ្ឋអាមេរិកលោកដូណាល់ ត្រាំ គឺលោក DONALD TRUMP JR ត្រូវបានបញ្ជូនទៅមន្ទីរពេទ្យកាលពីថ្ងៃទី១២ កុម្ភៈ ជា ការប្រុងប្រយ័ត្នក្រោយពីលោកស្រីបើកសំបុត្រមួយច្បាប់ ដែលផ្ញើជូនស្វាមីហើយក្នុងសំបុត្រនោះមានម្សៅគួរឱ្យសង្ស័យមួយ ។
ស្ត្រីអ្នកនាំពាក្យប៉ូលិសក្រុងញូវយ៉កនិយាយថា លោកស្រី VANESSA TRUMP អាយុ៤០ឆ្នាំ បានបើកសំបុត្រនាវេលាម៉ោង១០ព្រឹកម៉ោងក្នុងស្រុក រួចបញ្ជូនទៅមន្ទីរពេទ្យភ្លាមៗ។ ការវិភាគបង្ហាញថា ម្សៅក្នុងស្រោមសំបុត្រនេះពុំមែនជាម្សៅនាំឱ្យមានគ្រោះថ្នាក់ឡើយ ។
ភ្នាក់ងារសម្ងាត់ទទួលបន្ទុកជាពិសេសការពារសន្តិសុខគ្រួសារប្រធានាធិបតីគ្រាន់តែអះអាងថា ការស៊ើបអង្កេតមួយកំពុងធ្វើតែពុំផ្តល់ភាពលម្អិតផ្សេងទៀតទេ ។
តាម TWITTER លោកស្រីអ៊ីវ៉ានកា កូនស្រីប្រធានាធិបតីបានផ្ញើសារមួយជូនបងថ្លៃស្រីសម្តែងការគាំទ្រ ។ លោកស្រីសរសេរថា ខ្ញុំគិតដល់បងថ្លៃ ហើយស្រឡាញ់បងថ្លៃនិងនៅក្បែរបងថ្លៃ ។ គ្មានមនុស្សណាម្នាក់អាចសម្លុតគំរាមបែបនេះទេ ។ គ្មានអ្វីដែលអត់អោនដល់ទង្វើបែបនេះឡើយ ។
ប៉ុន្មាននាទីក្រោយមក ស្វាមីលោកស្រី VANESSA លោក DONALD TRUMP JR បានសរសេរតាមបណ្តាញសង្គមថា ខ្ញុំដឹងថា ភរិយានិងកូនៗខ្ញុំ សុខសប្បាយក្រោយបទពិសោធន៍ស្ទើរពុំជឿនេះ នាំឱ្យមានការព្រួយបារម្ភនាព្រឹកថ្ងៃទី១២ កុម្ភៈនោះ ។ ខ្ញុំពិតជាស្អប់ជនមួយចំនួនដែលជ្រើសរើសយកការបញ្ចេញឥរិយាបថបែបថោកទាបយ៉ាងនេះ៕
ចែករំលែកព័តមាននេះ