យោងតាមគេហទំព័រ MCOT របស់ថៃ ដែលផ្សាយជាភាសាអង់គ្លេស កាលពីថ្ងៃទី៣០ កញ្ញា ឱ្យដឹងថា មេបញ្ជាការយោធភូមិភាគ២ថ្មីរបស់ថៃ ឧត្តមសេនីយ៍ឯក Thawatchai Samutsakorn បានសន្យាថា រូបលោកនឹងជួយជំរុញធ្វើឱ្យប្រសើរឡើងនូវទំនាក់ទំនងរវាងប្រទេសថៃ និងប្រទេសកម្ពុជា ហើយថ្លែងថា រូបលោកក៏នឹងចូលរួមផងដែរ ក្នុងកិច្ចប្រជុំគណៈកម្មាធិការព្រំដែនប្រចាំតំបន់ (RBC) ដែលនឹងរៀបចំឡើងនៅក្នុងខេត្តសៀមរាប នាចុងខែតុលាខាងមុខនេះ ។
ឧត្តមសេនីយ៍ឯក Thawatchai ថ្លែងដូច្នេះក្នុងឱកាសនៃការទទួលតំណែងជាមេបញ្ជាការយោធភូមិភាគ២ ពីឧត្តមសេនីយ៍ឯក Veevalit Chomsamrit ដែលត្រូវចូលនិវត្តន៍នៅថ្ងៃទី៣០ កញ្ញា ។
ជាមួយគ្នានេះ ទាក់ទិនទៅនឹងទំនាក់ទំនងរវាងប្រទេសថៃជាមួយប្រទេសជិតខាង ជាពិសេសសណ្តាប់ធ្នាប់នៅតាមបណ្តោយព្រំដែនរវាងប្រទេសថៃ និងប្រទេសកម្ពុជា ឧត្តមសេនីយ៍ឯក Thawatchai ថ្លែងថា គោលនយោបាយរបស់លោកនឹងពុំមានអ្វីខុសប្លែកគ្នាពីគោលនយោបាយរបស់អ្នកមុនឡើយ ប៉ុន្តែថា លោកនឹងមានគោលនយោបាយបន្ថែមទៀត ដូចជាការបំពេញទស្សនកិច្ចញឹកញាប់មកកាន់ក្រុងភ្នំពេញ និងខេត្តសៀមរាបរបស់ប្រទេសកម្ពុជា ។ លោក Thawatchai ថ្លែងឱ្យដឹងទៀតថា រូបលោកនឹងជួបពិភាក្សាជាមួយមេបញ្ជាការយោធភូមិភាគ៤របស់កម្ពុជានៅក្នុងកិច្ចប្រជុំគណៈកម្មាធិការព្រំដែនប្រចាំតំបន់ដែលនឹងរៀបចំឡើងនៅក្នុងខេត្តសៀមរាប នាចុងខែតុលាខាងមុខនេះ ។ លោកឧត្តមសេនីយ៍ឯកថ្លែងទៀតថា ប្រសិនបើទំនាក់ទំនងរវាងប្រទេសថៃ និងប្រទេសកម្ពុជាមានលក្ខណៈល្អប្រសើរ នឹងនាំដល់ការពិចារណាអំពីការបើកសួនឧទ្យានភ្នំព្រះវិហារ ។ ជាមួយគ្នានេះ មេបញ្ជាការយោធភូមិភាគ២ថ្មីរូបនេះក៏បានសន្យាផងដែរថា រូបលោកនឹងខិតខំប្រឹងប្រែងឱ្យអស់ពីសមត្ថភាព ដើម្បីដោះស្រាយបញ្ហានៅតាមព្រំដែន ពង្រឹង និងពង្រីកទំនាក់ទំនងរវាងកងទ័ពនៃប្រទេសទាំង២កម្ពុជា-ថៃ ៕
ចែករំលែកព័តមាននេះ