ខេត្តកំពត ៖ ដើម្បីការពារសុវត្ថិភាព សន្តិសុខ សណ្តាប់ធ្នាប់ជូនប្រជាពលរដ្ឋឲ្យបានល្អប្រសើរ នាឱកាសបុណ្យចូលឆ្នាំថ្មីប្រពៃណី ចិន វៀតណាម កូរ៉េ ខាងមុខនេះ ។ លោកឧត្តមសេនីយ៍ទោ ម៉ៅ ចន្ទ័មធុរិទ្ឋ ស្នងការខេត្តបានដាក់បទបញ្ជាដល់កងកម្លាំងនគរបាលទាំងអស់ទូទាំងខេត្ត ជួយផ្សព្វផ្សាយដល់បងប្អូនអាជីវករលក់ដូរនៅតាមមូលដ្ឋានផ្សារទីរួមស្រុក ហាមដាក់លក់ផាវ កាំជ្រួច និងហាមការបាញ់ផាវ បាញ់កាំជ្រួច ព្រមទាំងពង្រឹងការអនុវត្តន៍ភូមិឃុំមានសុវត្ថិភាពទាំង៩ចំណុច របស់ក្រសួងមហាផ្ទៃ ។
ពង្រឹងការស៊ើបអង្កេតស្រាវជ្រាវរាល់បទល្មើសផ្សេងៗ ដូចជាក្រុមក្មេងទំនើង ការប្រើប្រាស់ និងចែកចាយគ្រឿងញៀន ល្បែងស៊ីសងគ្រប់ប្រភេទ នៅគ្រប់មូលដ្ឋាន និងទីរួមស្រុកនានាទូទាំងខេត្ត ។ ទប់ស្កាត់ឲ្យបាននូវរាល់សកម្មភាពបង្កអុកឡុកពីសំណាក់ក្មេងទំនើង និងក្រុមបងតូចបងធំ ដែលធ្វើសកម្មភាពនៅកន្លែងកម្សាន្តនានា តាមរមណីដ្ឋាន ភោជនីយដ្ឋាន និងកន្លែងភ្ញៀវលេងកម្សាន្តតំបន់ផ្សេងៗទៀត នៅក្នុងខេត្តក្នុងកម្មវិធីបុណ្យចូលឆ្នាំចិន វៀតណាម កូរ៉េ ខាងមុខនេះ ។
ចំណែកនៅក្នុងទីរួមខេត្តកំពត កម្លាំងប្រចាំការចម្រុះតាមប៉ុស្តិ៍២៤ម៉ោងលើ២៤ម៉ោងត្រូវត្រៀមកម្លាំងជាស្រេច និងមានឧបករណ៍ដូចជាម៉ូតូធំសម្រាប់មធ្យោបាយ រថយន្តពន្លត់អគ្គិភ័យរួមជាមួយកម្លាំងចម្រុះមាន កម្លាំងអធិការនគរបាលក្រុង កម្លាំងអន្តរាគមន៍ពិសេសឈុតខ្មៅ និងកម្លាំងការិយាល័យពន្លត់អគ្គិភ័យរួមគ្នា ដើម្បីការពារសុវត្ថិភាពឲ្យបងប្អូនប្រជាពលរដ្ឋយើងដើរលេងកម្សាន្តនាឱកាសបុណ្យចូលឆ្នាំប្រពៃណីចិន វៀតណាម កូរ៉េ នេះផងដែរ ៕
ចែករំលែកព័តមាននេះ