រាជធានីភ្នំពេញ ៖ អាជ្ញធរខណ្ឌពោធិ៍សែនជ័យដោយមានការចូលរួមពីសំណាក់កម្លាំងអាជ្ញាធរសង្កាត់ និងនគរបាលប៉ុស្តិ៍ចោមចៅ២រួមជាមួយប្រជាការពារភូមិផង បានចុះទៅធ្វើការរុះរើសំយ៉ាបផ្ទះមួយចំនួនដែលបានសាងសង់រំលោភចំណីផ្លូវសាធារណៈ ។ ប្រតិបត្តិការណ៍នោះបានធ្វើឡើងកាលពីវេលាម៉ោង១០ព្រឹក ថ្ងៃទី១៣ ខែកុម្ភៈ ឆ្នាំ២០១៨ ស្ថិតនៅតាមបណ្ដោយផ្លូវវ៉េងស្រេងក្បែរអតីតទីតាំងជញ្ជីងថ្លឹងរថយន្តក្នុងភូមិព្រៃជ្រៃកោង សង្កាត់ចោមចៅ២ ខណ្ឌពោធិ៍សែនជ័យ ។
អាជ្ញាធរបាននិយាយថា ប្រជាពលរដ្ឋរួមជាមួយម្ចាស់ផ្ទះសំណាក់ យីហោ«ដាណាវី»នៅតំបន់នោះបាននាំគ្នាសាងសង់សំយ៉ាបផ្ទះរំលោភមកលើចំណីផ្លូវល្មើសនឹងការហាមឃាត់ដែលបានធ្វើឲ្យផ្លូវគ្មានចិញ្ចើមសម្រាប់មនុស្សដើរឡើយ ។ ដោយសារតែបែបនេះអាជ្ញាធរមិនអាចនៅស្ងៀមឡើយទើបចុះទៅដើម្បិធ្វើការរុះរើចេញ រៀបចំសណ្ដាប់ធ្នាប់ និងរក្សាឲ្យមានចិញ្ចើមផ្លូវឡើងវិញ ព្រោះផ្លូវមិនអាចអត់មានចិញ្ចើមបានទេ ។
ប្រភពដដែលបានបន្តទៀតថា ប្រជាពលរដ្ឋមិនមែនមិនដឹងថា ការសាងសង់សំយ៉ាបរំលោភយកចំណីផ្លូវបែបនេះខុសច្បាប់នោះទេ ប៉ុន្តែពួកគាត់ធ្វើតាមគ្នា ។ ដោយឃើញម្នាក់ធ្វើបានម្នាក់ទៀតធ្វើតាមដែរហើយបើគ្មានការទប់ស្កាត់ទេនោះ យូរៗទៅនឹងរីករាលដាលគ្រប់កន្លែងតែម្ដង ។
លុះពេលឃើញកម្លាំងអាជ្ញាធរចុះទៅដល់ប្រជាពលរដ្ឋខាងលើ បានសុំឲ្យទុកពេលដើម្បីឲ្យពួកគាត់រុះរើដោយខ្លួនឯង ហើយអាជ្ញាធរក៏បានសម្រេចទុកពេលជូនពួកគាត់ក្នុងការអនុវត្តរយៈពេល២៨ថ្ងៃជាកំហិតហើយបើពួកគាត់នៅតែមិនព្រមរុះទៀតនោះអាជ្ញាធរ និងចុះទៅរុះ និងមិនទទួលខុសត្រូវរាល់ការខូចខាតឬបាត់បង់ផ្សេងៗឡើយ និងរឹបអូសយកទៅរក្សាទុកនៅសាលាខណ្ឌតែម្ដង ៕
ចែករំលែកព័តមាននេះ