គ្រូបង្វឹកជាត្រីវិស័យបង្ហាញផ្លូវសម្រាប់កីឡាករ-កីឡាការិនី
- ភ្នំពេញ
រាជធានីភ្នំពេញ ៖ លោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា បានថ្លែងថា គ្រូបង្វឹក…
រាជធានីភ្នំពេញ ៖ លោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា បានថ្លែងថា គ្រូបង្វឹក…
រាជធានីភ្នំពេញ ៖ លោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា បានថ្លែងថា គ្រូបង្វឹក គឺជាត្រីវិស័យដ៏សំខាន់ សម្រាប់បង្ហាញផ្លូវដល់ក្រុមកីឡាករ-កីឡាការិនីជម្រើសជាតិ ។ លោកថ្លែងបែបនេះនៅក្នុងឱកាសអញ្ជើញចូលរួមជាអធិបតីក្នុងពិធីបើកសិក្ខាសាលាស្ដីពីការរៀនរៀបចំផែនការ និងទ្រឹស្ដីហាត់ហ្វឹកហ្វឺនរបស់គ្រូបង្វឹកជម្រើស ជាតិឆ្នាំ២០១៨ នៅមជ្ឈមណ្ឌលជាតិហ្វឹកហ្វឺនកីឡា កាលពីថ្ងៃទី១២ កុម្ភៈ។
លោក ស៊ាន បូរ៉ាត បន្តថា ទេពកោសល្យ និងចិត្តសាស្ត្រគឺជាចំណុចសំខាន់ដែលលោកគ្រូអ្នកគ្រូត្រូវផ្ដោតការយកចិត្តទុកដាកក្នុងការបង្ហាត់បង្រៀនដល់កីឡាករ-កីឡាការិនីជម្រើសជាតិនៅក្នុងឆ្នាំ២០១៨នេះ ។ បច្ចុប្បន្ន រាជរដ្ឋាភិបាលក៏ដូចជាក្រសួងអប់រំ យុវជន និងកីឡាដែលជាសេនាធិការបាននិងកំពុងយកចិត្តទុកដាក់យ៉ាងខ្លាំង ក្នុងនោះក៏មានការចូលរួមពីលោកគ្រូអ្នកគ្រូដែលត្រូវបានចាត់ទុកថាជាអ្នកមានចំណេះដឹងខ្ពង់ខ្ពស់នៅក្នុងផ្នែកវិស័យអប់រំកាយនិងកីឡានេះផងដែរ ។ ដូច្នេះកត្តាសំខាន់ដែលត្រូវបន្តអនុវត្តគឺត្រូវធ្វើយ៉ាងណាបំពេញលក្ខខណ្ឌ ឱ្យបានគ្រប់គ្រាន់ទៅតាមពេលវេលាដែលបានកំណត់ ។ ក្នុងរយៈពេល៦ខែនៃការប្រមូលផ្ដុំនេះ គឺជាការត្រៀមលក្ខណៈសម្រាប់ចូលរួមប្រកួតនៅក្នុងព្រឹត្តិការណ៍នានាលើឆាកអន្តរជាតិ។
លោករដ្ឋលេខាធិការក្រសួងអប់រំ យុវជន និងកីឡារូបនេះក៏បានលើកឡើងពីចំណុចសំខាន់ កាលពីឆ្នាំកន្លងទៅដែលទាក់ទងទៅនឹងការរីកចម្រើន និងវឌ្ឍនភាពនៃការផ្ដល់ឱកាសដល់គ្រូបង្ហាត់ កីឡាករ-កីឡាការិនីជម្រើសជាតិក្នុងការចូលរួមប្រកួតថ្នាក់តំបន់ ថ្នាក់អន្តរជាតិដែលជាព្រឹត្តិការណ៍ធំៗនៅលើពិភពលោក។លោកបានសង្កត់ធ្ងន់ថា ការខិតខំប្រឹងប្រែងរបស់យើងពីមួយឆ្នាំទៅមួយឆ្នាំ ចន្លោះខ្វះខាតតែងតែនៅមាន ។
ជាក់ស្ដែងវិស័យកីឡាបាល់ទាត់ បើប្រកួតនៅស្រុកខ្មែរទទួលស្គាល់ថាខ្លាំង ប៉ុន្តែបើចូលទៅលេងជាមួយគេនៅក្នុងអាស៊ានគឺនៅខ្សោយជាងគេ ហាក់ដូចជាចាញ់ប្រៀបគេទៅវិញ ។ ដូច្នេះបើចង់ឱ្យមានភាពរឹងមាំត្រូវផ្ដោតសំខាន់ទៅលើសីលធម៌ដែលជាកត្តាចាំបាច់មិនអាចខ្វះបាន ។ លោកបញ្ជាក់ថា បើកាលណា ខ្វះសីលធម៌ហើយ ទោះបីជាមានការតាំងចិត្តយ៉ាងណាក៏មិនអាចទទួលបានជោគជ័យឡើយ ។
លោកបានផ្ដែផ្ដាំដល់លោកគ្រូអ្នកគ្រូឱ្យបានដឹងថា ជំហានដំបូងត្រូវគិតពីសីលធម៌
ជាចម្បងបន្ទាប់មកគិតពីពេលវេលានៃការហ្វឹកហាត់ ត្រូវមានវិធីសាស្ត្រហ្វឹកហាត់ឱ្យបានត្រឹមត្រូវតាមឯកសារដែលមាននៅក្នុងដៃរបស់អស់លោកគ្រប់គ្នាស្រាប់ ។
សរុបសេចក្ដីទៅលោកគ្រូអ្នកគ្រូនេះហើយជាត្រីវិស័យបង្ហាញផ្លូវសម្រាប់កីឡាករ-កីឡាការិនីក្នុងការហ្វឹកហាត់ឱ្យទទួលបានជោគជ័យ ។ ដូច្នេះលោកគិតថា សិក្ខាសាលារយៈពេល៣ថ្ងៃគិតចាប់ពីថ្ងៃទី១២ដល់ថ្ងៃទី១៤ កុម្ភៈ វាពិតជាគ្រប់គ្រាន់ណាស់ហើយ បើសិនជាយើងយកចិត្តទុកដាក់ក្នុងការរៀនសូត្រ។
លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឱ្យដឹងថា យុទ្ធនាការនៃការប្រមូលផ្ដុំក្រុមកីឡាករ-កីឡាការិនីជម្រើសជាតិហាត់ហ្វឹកហ្វឺននៅក្នុងឆ្នាំ២០១៨នេះមាន៣១ប្រភេទកីឡា បូករួមទាំងក្រុមកីឡាជនពិការទៀតផងនោះមានចំនួន៣២ និងមានកីឡាករ៣៦៤នាក់ កីឡាការិនី៧៥នាក់ គ្រូបង្វឹក៧៣នាក់ និងអនុរក្ស៣៣នាក់ សរុប៤៤៥នាក់ ។ ដូច្នេះការរៀបចំផែនការ និងវិធីសាស្ត្រហាត់ហ្វឹកហ្វឺនរបស់គ្រូបង្វឹកនាពេលនេះ សំដៅធានាឱ្យគ្រូបង្វឹកមានចំណេះដឹង ជំនាញ សីលធម៌ និងមានសមត្ថភាពអនុវត្តវិជ្ជាជីវៈតាមរយៈការបណ្ដុះបណ្ដាលមុនពេលបំពេញការងារ និងក្នុងពេលបំពេញការងារ។
ការរៀបចំផែនការ និងវិធីសាស្ត្រហាត់ហ្វឹកហ្វឺននេះទៀត បានបង្ហាញពីយុទ្ធសាស្ត្រសំខាន់ៗសម្រាប់យកទៅអនុវត្ត សំដៅសម្រេចនូវចក្ខុវិស័យ គោលបំណង និងគោលដៅដែលបានកំណត់៕
ចែករំលែកព័តមាននេះ