រាជធានីភ្នំពេញ ៖ អគ្គិភ័យបានឆាបឆេះគំនរក្រដាស នៅក្នុងឃ្លាំងស្តុករបស់រោងចក្រ គ្មានស្លាកយីហោមួយកន្លែងបង្កឲ្យមានការភ្ញាក់ផ្អើលទាំងព្រឹក តែភ្លាមៗអាជ្ញាធរមូលដ្ឋានបានចេញអន្តរាគមន៍ និងទាក់ទងទៅអង្គភាពពន្លត់អគ្គិភ័យ ចេញរថយន្តទឹកចំនួន១១គ្រឿង មកជួយបាញ់ពន្លត់ ដោយប្រើប្រាស់ទឹកអស់៧ស៊ីទែនភ្លើងក៏រលត់ទៅវិញទាំងស្រុង។ គ្រោះអគ្គិភ័យនេះខូចខាតក្រដាសអស់ប្រហែលជាង១០តោន ប៉ុន្តែមិនបានដឹងថា មានតម្លៃប៉ុន្មាននោះឡើយ ។ នៅក្នុងរោងចក្រនេះមានក្រដាសរាប់រយតោនឯណោះ តែកន្លែងដែលត្រូវភ្លើងឆេះនោះមានខាន់ដោយជញ្ជាំង ទើបគ្មានការឆេះរាលដាលធំដុំ ។
ហេតុការណ៍នោះ បានកើតឡើងកាលពីវេលាម៉ោង១០និង៣៥នាទីព្រឹកថ្ងៃទី១២ ខែកុម្ភៈ ឆ្នាំ២០១៨នៅក្នុងរោងចក្រផលិតក្រដាសគ្មានយីហោ ដែលមានទីតាំងស្ថិតនៅក្នុងភូមិព្រៃល្ង សង្កាត់ចោមចៅទី២ ខណ្ឌពោធិ៍សែនជ័យ ។ ការឆេះនេះសង្ស័យបណ្ដាលមកពីទុស្សេចរន្តអគ្គិសនី ហើយបានបង្កឲ្យមានការភ្ញាក់ផ្អើលយ៉ាងខ្លាំងដែលគ្រាន់តែរថយន្តពន្លត់អគ្គិភ័យចេញទៅអន្តរាគមន៍រហូតដល់ទៅ១១គ្រឿងឯណោះ ក្នុងនោះរថយន្តមកពីអង្គភាព៧១១ កងពលតូចលេខ៧០ និងរថយន្តរបស់ស្នងការដ្ឋាននគរបាលរាជធានីភ្នំពេញ ។
តាមប្រភពព័ត៌មានបានឲ្យដឹងថា កម្ទេចក្រដាសដែលត្រូវភ្លើងឆេះនោះគឺខាងរោងចក្រទុកសម្រាប់ផលិតចេញជាក្រដាសជូតមាត់ឬក្រដាសកាតុង និងក្រដាសផ្សេងៗទៀត ។ ភ្លើងដែលឆាបឆេះនេះបង្កឡើងដោយសារទុស្សេចរន្តអគ្គិសនី ប៉ុន្តែខណៈនោះត្រូវបានរថយន្តពន្លត់អគ្គិភ័យចេញទៅបាញ់ពន្លត់អស់ទឹក៧ស៊ីទែន ភ្លើងក៏រលត់ទៅវិញមិនបណ្ដាលឲ្យឆេះរាលដាលក្នុងរោងចក្រទាំងមូលទេ ។
ប្រភពដដែលបានបន្តទៀតថា ទោះជាយ៉ាងណាមិនមានមនុស្សណាម្នាក់រងគ្រោះនៅក្នុងហេតុការណ៍នេះទេ ហើយរោងចក្រនេះមានក្រដាសរាប់រយតោនឯណោះ ប្រសិនបើពន្លត់មិនទាន់ពេលទេនោះ នឹងត្រូវឆេះអស់គ្មានសល់ឡើយ និងត្រូវខាតបង់រាប់សិបម៉ឺនដុល្លារ ៕
ចែករំលែកព័តមាននេះ