រាជធានីភ្នំពេញ ៖ ជារៀងរាល់ឆ្នាំ នៅរដូវបុណ្យចូលឆ្នាំថ្មីប្រពៃណីចិន-វៀតណាម ដើមអង្គាសីលចាប់ផ្តើមមានទីផ្សារ ដោយសារប្រជាពលរដ្ឋដែលជាប់ខ្សែស្រឡាយចិន-វៀតណាម តែងមានជំនឿទិញយកទៅតាំងលម្អក្នុងថ្ងៃចូលឆ្នាំ ដើម្បីនាំមកនូវសិរីសួស្តី។ ទោះបីយ៉ាងណាក្ដី នៅឆ្នាំនេះ អ្នកលក់បាននិយាយថា តម្លៃទិញចូលបានឡើងខ្ពស់ជាងរាល់ឆ្នាំ ព្រោះវាមិនសូវសម្បូរ ។
អ្នកស្រី យ៉ាន់ លក្ខិណា អាជីវករលក់ដើមផ្កាអង្គាសីលនៅជាប់របងវត្តទឹកថ្លា បាននិយាយថា ក្នុងឆ្នាំនេះពិបាករកណាស់ មិនសូវសម្បូរដូចឆ្នាំមុនៗទេ ហើយតម្លៃក៏ថ្លៃជាងដែរ ។
អ្នកស្រីបន្ដថា ៖« ជារៀងរាល់ឆ្នាំ ខ្ញុំបានចំណាយប្រមាណ៥០០ទៅ៨០០ដុល្លារសម្រាប់ទិញដើមអង្គាសីលទុកសម្រាប់លក់បន្ដ តែឆ្នាំនេះខ្ញុំចំណាយរហូតដល់១.៨០០ដុល្លារឯណោះ ព្រោះវាថ្លៃពេក ហើយខ្សត់ទៀតផង »។
អ្នកស្រីបន្ដថា ៖« ដើមអង្គាសីលនេះ ខ្ញុំទិញតពីគេដែលដឹកមកពីភ្នំឱរ៉ាល់ ក្នុងខេត្តកំពង់ស្ពឺ និងខ្លះទៀតពីខេត្តពោធិ៍សាត់ និងថ្លៃជាងរាល់ឆ្នាំ ហើយអ្នកឡើងទៅកាប់លើភ្នំនោះប្រាប់ថា ទម្រាំរកបាន១ដើមៗមានការលំបាកណាស់ » ។
អ្នកស្រី អ៊ុច ខេមរ៉ា ដែលបានទិញដើមអង្គាសីល បាននិយាយថា រាល់ឆ្នាំ អ្នកស្រីតែងតែមកទិញនៅទីនេះយកទៅតាំងលម្អនៅថ្ងៃសែនចូលឆ្នាំចិន តែឆ្នាំនេះថ្លៃជាងឆ្នាំមុនៗ ដូច្នេះអ្នកស្រីត្រូវចំណាយប្រាក់ប្រមាណ៦០ដុល្លារឯណោះ។
អ្នកស្រីបន្ដថា ៖« ជារៀងរាល់ឆ្នាំ ខ្ញុំតែងតែទិញយកទៅតាំងនៅផ្ទះដើម្បីសិរីសួស្ដី ហើយបើអត់ទិញ ដូចជាខ្វះអ្វីម្យ៉ាង ដូច្នេះហើយទោះថ្លៃបន្ដិចក្ដី ក៏យើងទិញដែរ ទៅតាមលទ្ធភាព » ។
ទោះបីនៅឆ្នាំនេះ ដើមផ្កាអង្គាសីលមិនសូវសម្បូរ និងមានតម្លៃថ្លៃជាងនៅឆ្នាំមុនៗក្ដី តែសម្រាប់អ្នកលក់មួយចំនួនបានអះអាងថា ពុំអាចរកប្រាក់ចំណេញបាននោះទេ ព្រោះដើមផ្កាខ្លះមិនបានផ្តល់តម្លៃសេដ្ឋកិច្ចវិញទេ ដោយសារវាមិនចេញផ្កា ទោះបីជាខំបាញ់ទឹករាល់ថ្ងៃក៏ដោយ ។
អ្នកស្រី ភួក អ៊ី អាជីវករលក់ដើមផ្កាអង្គាសីលដែរនោះបានលើកឡើងថា នៅឆ្នាំនេះ អ្នកស្រីបាននាំចូលដើមផ្កាអង្គាសីលប្រហែល៥០បាច់ តែខូចអស់ជិតពាក់កណ្តាលទៅហើយ ព្រោះវាអត់ចេញផ្កា ដូច្នេះឆ្នាំនេះ សម្រាប់អ្នកស្រីប្រហែលមិនរួចថ្លៃដើមផង ។
ផ្កាអង្គាសីល ជារុក្ខជាតិមួយប្រភេទ ដែលភាគច្រើនគេប្រទះឃើញដុះនៅតាមបណ្តោយមាត់អូរ ប្រឡាយមានទឹកហូរ ឬនៅតាមតំបន់ព្រៃមួយចំនួនទៀត ។ វាបែកមែកសុះសាយ តែមិនខ្ពស់ឡើយ ។ មែករបស់វាមានពណ៌ត្នោតខ្ចី និងស្លឹកពណ៌បៃតងចាស់ ។ វានឹងជម្រុះស្លឹកចាស់នៅរដូវរំហើយ ហើយចាប់ផ្តើមលាស់ត្រួយស្លឹកពណ៌ត្នោត បន្ទាប់មក វានឹងបញ្ចេញក្រពុំ រហូតដល់មានផ្កាពណ៌លឿងរីកជា៥បំណែកច្រាលជាកញ្ចុំៗពាសពេញដើម នៅចន្លោះមុនថ្ងៃបុណ្យចូលឆ្នាំប្រពៃណីចិន-វៀតណាម ហើយវានឹងរុះរោយទៅវិញក្រោយថ្ងៃបុណ្យបានបញ្ចប់ ។
ពលរដ្ឋចិន-វៀតណាម នៅមុនថ្ងៃបុណ្យចូលឆ្នាំប្រពៃណី តែងជ្រើសរើសដើមផ្កាអង្គាសីលមករៀបដាក់តាំងលម្អក្នុងលំនៅឋានជានិច្ច ប្រសិនបើគ្មាន គេក៏អាចជ្រើសរើសផ្កានិមិត្តមកដាក់តាំងលម្អផងដែរ ៕
ចែករំលែកព័តមាននេះ