រាជធានីភ្នំពេញ ៖ ក្នុងជំនួបជាមួយលោក Edward Vaizey បេសកជននាយករដ្ឋមន្ដ្រីអង់គ្លេស ទទួលបន្ទុកពាណិជ្ជកម្ម នៅទីស្ដីការក្រសួង កាលពីព្រឹកថ្ងៃទី១២ កុម្ភៈលោកទេសរដ្ឋមន្ត្រី…
រាជធានីភ្នំពេញ ៖ ក្នុងជំនួបជាមួយលោក Edward Vaizey បេសកជននាយករដ្ឋមន្ដ្រីអង់គ្លេស ទទួលបន្ទុកពាណិជ្ជកម្ម នៅទីស្ដីការក្រសួង កាលពីព្រឹកថ្ងៃទី១២ កុម្ភៈលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងថា លោកបានស្នើដល់មន្ត្រីបេសកកម្មជនអង់គ្លេស នាំយកស្ករត្នោត អង្ករ និងម្រេចកំពតពីកម្ពុជាទៅកាន់ទីផ្សារអង់គ្លេស ។
យោងតាមមន្ត្រីក្រសួងការបរទេស ទំហំពាណិជ្ជកម្មរវាងប្រទេសទាំងពីរស្មើប្រមាណ
៣០០លានដុល្លារនៅក្នុងឆ្នាំ២០១៥ និងអំឡុងពីឆ្នាំ២០១៦-២០១៧ ការផ្លាស់ប្តូរពាណិជ្ជកម្មរវាងកម្ពុជានិងអង់គ្លេស ស្មើប្រមាណជាង១.២០០លានដុល្លារអាមេរិក ។
លោកទេសរដ្ឋមន្ត្រី ប្រាក់ សុខុន ថ្លែងថា ៖«លោកគាំទ្រ និងស្វាគមន៍ចំពោះលោក Edward Vaizey ដែលត្រូវបានតែងតាំងជាបេសកជនពិសេសរបស់នាយករដ្ឋមន្ត្រីអង់គ្លេស ទទួលបន្ទុកពាណិជ្ជកម្មប្រចាំនៅកម្ពុជា ។ កម្ពុជា និងអង់គ្លេសមានទំនាក់ទង និងកិច្ចសហប្រតិបត្តិការជាមួយគ្នាបានល្អប្រសើរ » ។
លោកក៏បានចាប់អារម្មណ៍នឹងកំណើនអ្នកធុរកិច្ច និងទេសចរមកកាន់កម្ពុជាផងដែរ ។ លោកសង្ឃឹមថា នៅពេលអនាគត ពាណិជ្ជកម្ម និងទំនិញរវាងប្រទេសទាំងពីរនឹងបន្តកើនឡើងទៀត ។
លោកបន្ថែមថា បេសកម្មជននាយករដ្ឋ មន្ត្រីអង់គ្លេសពីមុន ទទួលបន្ទុកពាណិជ្ជកម្ម លោក ដាវិត ភុតណាន់ បានកសាង និងសហប្រតិបត្តិការល្អរជាមួយកម្ពុជា លើការពង្រីកផ្នែកពាណិជ្ជកម្ម ។ លោកចង់ឲ្យមានការនាំចេញនូវផលិតផលកសិកម្មពីកម្ពុជាទៅកាន់អង់គ្លេស ដូចជា អង្ករកម្ពុជាដែលទទួលបានចំណាត់ថ្នាក់ពិភពលោក ម្រេច និងស្ករត្នោតកំពង់ស្ពឺ ព្រោះផលិតផលទាំងនេះត្រូវបានទទួលស្គាល់ និងវាយតម្លៃដោយសហភាពអឺរ៉ុបថា មានគុណភាពល្អ ។
លោកក៏ចង់ឲ្យមានកិច្ចសហប្រតិបត្តិការរវាងវិទ្យាស្ថានកិច្ចការបរទេស និងទំនាក់ទំនងអន្តរជាតិ ដែលបង្កើតឡើងនៅក្នុងក្រសួងការបរទេស ជាមួយវិទ្យាស្ថានការទូតអង់គ្លេសផងដែរ ។
លោក Edward Vaizey បានវាយតម្លៃខ្ពស់ចំពោះការងាររបស់អតីតបេសកកម្ម លោក ដាវិត ភុតណាន់ ជាមួយកម្ពុជាកន្លងមក ។ លោកសន្យាថា នឹងបន្តពង្រឹងកិច្ចសហប្រតិបត្តិការផ្នែកពាណិជ្ជកម្មរវាងអង់គ្លេស និងកម្ពុជា ព្រមទាំងជំរុញវិនិយោគិនបន្ថែមទៀតមកវិនិយោគនៅកម្ពុជា ។
លោកថា បន្ទាប់ពីការចាកចេញរបស់អង់គ្លេសពីសហភាពអឺរ៉ុប អង់គ្លេសនឹងបង្កើនទំនាក់ទំនងពាណិជ្ជកម្មជាមួយកម្ពុជា ។ លោកបានចាប់អារម្មណ៍ចំពោះការរីកចម្រើនរបស់កម្ពុជា ហើយអង់គ្លេសត្រៀមខ្លួនធ្វើជាដៃគូជាមួយកម្ពុជា ។
លោកបន្តថា លោកចាប់អារម្មណ៍ចំពោះគុណភាពស្ករត្នោត ហើយថ្ងៃអនាគត ស្ករត្នោតកម្ពុជានឹងមានវត្តមាននៅក្នុងទីផ្សារអង់គ្លេស ដោយលោកនឹងខិតខំជំរុញការនាំស្ករត្នោតកម្ពុជាទៅកាន់ទីផ្សារអង់គ្លេស ។
លោក ជុំ សុន្ទរី លើកឡើងទៀតថា បច្ចុប្បន្ន ប្រទេសកម្ពុជាបាននាំចេញសម្លៀកបំពាក់ទៅកាន់អង់គ្លេសស្មើ៩០% និងនាំចូលមកវិញនូវគ្រឿងម៉ាស៊ីន និងរថយន្ត ៕
ចែករំលែកព័តមាននេះ